މަޖިލީހުގެ ދައުރު ދިގު ދަންމާލުމާއި މެދު މިއަދު ވޯޓަށް އަހަނީ
18 ޑިސެމްބަރު 2023 | ހޯމަ 05:07މެޖޯރިޓީ ލީޑަރާއި މައިނޯރިޓީ ލީޑަރާއި މަޝްވަރާކުރެއްވުމަށް ފަހު އެ ރިޕޯޓް އިސްލާހުކުުރުމަށް ކޮމިޓީއަށް އަނބުރާ ފޮނުވާލައްވަން މަޖިލީހުގެ ރައީށް އަސްލަމް ވަނީ ނިންމަވާފަ
މުޅި މަޖިލީހުގެ ކޮމިޓީ
ރައްޔިތުންގެ މަޖިލީހުގެ ދައުރު ދިގު ދަންމާލުމާއި މެދު މިއަދު ވޯޓަށް އަހާނެކަން ރިޔާސަތުން ހާމަކުރައްވައިފިއެވެ.
މަޖިލީހުގެ ރައީސް މުހައްމަދު އަސްލަމް ވަނީ މިއަދަކީ މި ދައުރުގެ ފަހު ދުވަހުގެ ގޮތުގައި މީގެ ކުރިން ހަމަޖައްސާފައިވާކަން ހާމަކުރައްވާފައެވެ. މިއަދަކީ 2023 ވަނަ އަހަރުގެ 3 ވަނަ ދައުރުގެ އެންމެ ފަހު ދުވަސްކަމަށް މީގެ ކުރިން ހަމަޖައްސާފައި އޮތް ނަމަވެސް މި ދައުރުގެ ތެރޭގައި ވަޒީރުންނަށް ރުހުން ދިނުމަށް ވޯޓު ނަގަން ބޭނުންފުޅުވާކަމަށް އަސްލަމް ވިދާޅުވިއެވެ. އެހެންކަމުން ކޮމިޓީގެ ރިޕޯޓް ނިންމާ މި ދައުރުގެ ތެރޭގައި ވަޒީރުންނަށް ރުހުން ދިނުމަށް މަސައްކަތް ކުރައްވާނެކަން އަސްލަމް ވަނީ ވިދާޅުވެފައެވެ.
ވަޒީރުންނަށް ރުހުން ދިނުމުގެ މައްސަލަ އެޖެންޑާގައި ހިމަނާފައި ވަނީ މަޖިލީހުގެ ޤަވާއިދުގެ 200ވަނަ މާއްދާގެ ވ އަދި ރ، ކ އަދި އގައި ބަޔާންކުރާ ހަމަތަކާއި ޚިލާފަށް ކަމަށް ތުޅާދޫ ދާއިރާގެ މެމްބަރު ހިސާން ހުސައިން ވަނީ ނިޒާމީ ނުކުތާ އެއް ނަންގަވައިގެން މަޖިލީހުގައި ފާހަގަކުރައްވާފައެވެ. އަދި އެ މާއްދާތަކުގައިވާ ކަންކަން އެ މައްސަލައިގައި ފުރިހަމަ ނުވާތީ އެ ރިޕޯޓަށް ވޯޓަށް އެހިދާނެ ކަމަށް ޤަބޫލުނުކުރައްވާ ކަމަށް އޭނާ ވިދާޅުވިއެވެ. ވުޒާރާތަކުގެ މަސައްކަތްތައް މަޖިލީހަށް ހުށަހަޅާ ފާސްކުރަން ޖެހޭ ކަމަށް އޭނާ ވިދާޅުވިއެވެ. ހިސާން ވިދާޅުވީ ކޮމިޓީ އަށް މެންޑޭޓް ފޮނުވާފައި ނުވާތީ އެކަން ދިރާސާކުރެވިދާނެ ކަމަށް ޤަބޫލުނުކުރައްވާ ކަމަށެވެ. އަދި މެންޑޭޓް ދިރާސާނުކޮށް އެ ބޭފުޅުންނަށް ރުހުން ދެނީ އެ ބޭފުޅުން ކޮން މެންޑޭޓެއް ފުރިހަމަކުރަންތޯ އޭނާ ސުވާލު އުފެއްދެވިއެވެ. ހަމައެހެންމެ އެ ބޭފުޅުންނަށް ރުހުން ދެނީ ކޮންކަމެއްގެ ޤާބިލިއްޔަތުކަން ހުރެގެންކަން ނުވަތަ ނޫންކަން ވެސް ސާފު ނުވާ ކަމަށް އޭނާ ވަނީ ވިދާޅުވެފައެވެ.
އެއާއި އެކު މެޖޯރިޓީ ލީޑަރާއި މައިނޯރިޓީ ލީޑަރާއި މަޝްވަރާކުރެއްވުމަށް ފަހު އެ ރިޕޯޓް އިސްލާހުކުުރުމަށް ކޮމިޓީއަށް އަނބުރާ ފޮނުވާލައްވަން މަޖިލީހުގެ ރައީސް އަސްލަމް ވަނީ ނިންމަވާފައެވެ.
