ރައީސް މުއިއްޒު ވެރިކަން ހޯދީ އޮޅުވާލައިގެން ކަމަށް ގިނަ ރައްޔިތުން މިއަދު ގަބޫލުކުރޭ: ޖަމީލް
16 ޑިސެމްބަރު 2023 | ހޮނިހިރު 05:39ރައީސް މުއިއްޒު، އެމަނިކުފާނުގެ ކެމްޕޭން ބިނާ ކުރެއްވީ ރައީސް ޔާމީނުގެ ޙުކުމްތަކަކީ ހަރާން ހުކުމްތަކެއް ކަމަށާއި އިންޑިއާ ސިފައިން ތިބެގެން ނުވާނުކަމަށް ވިދާޅުވެ
ކުރީގެ ރައީސް ޔާމީންގެ ގާނޫނީ ވަކީލު ޑރ. ޖަމީލް
ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވެރިކަން ހޯއްދެވީ އޮޅުވާލައިގެންކަން މިއަދު ގިނަ ރައްޔިތުން ގަބޫލުކުރާ ކަމަށް ކުރީގެ ރައީސް އަބްދުﷲ ޔާމިންގެ ގާނޫނީ ވަކީލު އަދި ކުރީގެ ނައިބު ރައީސް ޑރ. މުޙައްމަދު ޖަމީލު އަހުމަދު ވިދާޅުވެއްޖެއެވެ.
ޖަމީލު މިފަދައިން ވިދާޅުވީ ބުރާސްފަތި ދުވަހު ރައީސް އޮފީހުން ބޭއްވި ނޫސްވެރިންގެ ބައްދަލުވުގައި ޔާމީން މިނިވަން ކުރުމާ ގުޅޭގޮތުން ކުރި ސުވާލަށް ސަރުކާރުން ސީދާ ޖަވާބެއް ނުދޭތީ އެކްސްގައި ކުރެއްވި ޕޯސްޓެއްގައެވެ. ޔާމީން މިނިވަންކުރުމާމެދު ސުވާލު ކުރުމުން، ރައީސް އޮފީހުގެ އަންޑަރ ސެކްރެޓަރީ ފޯ ޕަބްލިކް ޕޮލިސީ، މުހައްމަދު ފިރުޒުލް އަބްދުﷲ ޚަލީލު ދެއްކެވީ ޝަރުއީ ދާއިރާ މިނިވަންކުރުމާއި އެ ދާއިރާ އިސްލާހުކުރުމުގެ ވާހަކަތަކެވެ.
މިކަމާ ގުޅިގެން ޖަމީލު ވިދާޅުވީ އެއީ ސަމާސާ ކަމެއް ނޫން ކަމަށާއި ރައީސް މުއިއްޒު، އެމަނިކުފާނުގެ ކެމްޕޭން ބިނާ ކުރެއްވީ ރައީސް ޔާމީނުގެ ޙުކުމްތަކަކީ ހަރާން ހުކުމްތަކެއް ކަމަށާއި އިންޑިއާ ސިފައިން ތިބެގެން ނުވާނެކަމަށް ވިދާޅުވެ ކަމަށެވެ. އެހެންވެ މިއަދު ޖިނާއީ އަދި މަދަނީ އަދުލު ކިޔައިގެން އޮޅުވާލެވޭނެ ޖާގައެއް ނެތް ކަމަށް އެމަނިކުފާނު ވިދާޅުވިއެވެ.
ވެރިކަން ބަދަލުވެފައިވާކަން ފާހަގަކުރައްވައި ޖަމީލު ވިދާޅުވީ އަދިވެސް ރައީސް ޔާމީނަށް ލުޔެއް ނުލިބޭ ކަމަށެވެ. އަދި އެމަނިކުފާނުގެ ހުކުމްވެސް އަވަސް ނުވާ ކަމަށާއި އިންޑިއާ ސިފައިން ފުރަތަ ހަފުތާ ފާއިތުވި އިރު ތިބިކަމެއް، އަދި އަދަދުވެސް ސަރުކާރަށް ނޭނގޭކަން ފާހަގަކުރެއްވިއެވެ.
މި ސަބަބުތަކާހުރެ ރައީސް މުއިއްޒު ވެރިކަން ހޯއްދެވީ އޮޅުވާލައިގެންކަން މިއަދު ގިނަ ރައްޔިތުން ގަބޫލުކުރާ ކަމަށާއި އެހެންވެ ވެރިކަމުގެ މޯރަލް ލެޖިޓިމަސީ ގެއްލިފައިވާ ކަަމަށް ވެސް ޖަމީލު ވިދާޅުވިއެވެ.
ރިޝްވަތު ހިފުމާއި މަނީލޯންޑަރިންގެ ކުށް ސާބިތުވުމާއި ގުޅިގެން 11 އަހަރުގެ ޖަލު ހުކުމެއް ތަންފީޒް ކުރައްވަމުންދާ ޔާމީން މިނިވަންކޮށްދެއްވުމަކީ ރައީސް މުއިއްޒުގެ ރިޔާސީ ވައުދުފުޅެކެވެ. އަދި އެ މަސައްކަތް ވެރިކަމުގެ ފުރަތަމަ ދުވަހު ކުރައްވާނެ ކަމަށްވެސް، ރިޔާސީ އިންތިޚާބުގެ ކެމްޕެއިން ދުވަސްވަރު އެމަނިކުފާނު ވިދާޅުވިއެވެ. ރައީސް މުއިއްޒު އޭރު ވިދާޅުވީ ޔާމީން މިނިވަން ނުކުރެވި ވަނީ އޭރުގެ ސަރުކާރުން ޝަރުއީ ދާއިރާއަށް ސިޔާސީ ނުފޫޒު ފޯރުވާތީ ކަމަށެވެ. ނަމަވެސް ކުރީގެ ސަރުކާރުން ޔާމީނަށް ދިން ލުއިތައް ފިޔަވައި އިތުރު އެއްވެސް ލުޔެއް މި ސަރުކާރުން ދީފައެއްނުވެއެވެ.
