އޯޓިޒަމް ހުންނަ އެއްމާބަނޑު ދެބެން ގޮވައިގެން ޣައްޒާގައި އަސްމާ ކުރަމުންދާ ވަރުގަދަ ޖިހާދު....
ދިރިއުޅުމަށް ބޭނުންވާ ހުރިހާ ޚިދުމަތަކުން އެ ޢާއިލާ ވަނީ މަޚްރޫމުވެފައި
ފަލަސްތީނުގެ މަންމަ އަސްމާ އަބޫ އަބޭދު އޭނާގެ އޯޓިސްޓިކް އެއްމާބަނޑު ދެ ދަރިންނާއެކު ޣައްޒާގެ ދެކުނުގެ ރަފަހުގައި
ސުޖޫދްއާއި މުޢުތަސިމް އަބޫ ޢާބިދުއަކީ އެއްމާބަނޑު ދެބެންނެވެ. އެ ދެބެންގެ ދިރިއުޅުން ބަދަލުވެގެން ދިޔައީ ހީވެސް ނުކުރާ ފަދަ ގޮތަކަށެވެ. އެއީ، ޔަހޫދީންގެ މުށްދަށުލައި، ދުލާއި ގަލަމުން ސިފަކޮށްދެވެން ނެތް ޤަތުލުޢާންމެއް ހިންގަމުންދާ ޣައްޒާގައި ދިރިއުޅެމުންދާ އެ ދެބެން، ގެދޮރު ދޫކޮށް ނުކުންނަން ޖެހުނު ހިސާބުންނެވެ.
ސުޖޫދްއާއި މުޢުތަސިމްއަކީވެސް ސިކުނޑީގެ ނުކުޅެދުންތެރިކަމެއް ކަމަށް ވާ އޯޓީޒަމް ހުންނަ 2 ކުދިންނެވެ. ޢާންމު ދިރިއުޅުމުގެ އުސޫލުތަކާއި އާދަތަކަށް ކުޑަ ނަމަވެސް ބަދަލެއް ގެނައުމަކީ އެ ކުދިންގެ އިތުރުން މައިންބަފައިންނަށްވެސް އުފުލަންޖެހޭ ވޭނީ ތަކުލީފެކެވެ.
ސުޖޫދްއާއި މުޢުތަސިމްގެ މަންމަ، އަސްމާ އަބޫ ޢާބިދު ކިޔައިދިން ގޮތުގައި ދިރިއުޅުމަށް ބޭނުންވާ ހުރިހާ ޚިދުމަތަކުން އެ ޢާއިލާ ވަނީ މަޚްރޫމުވެފައެވެ. ސުޖޫދްއާއި މުޢުތަސިމްއަށް ކާންދެނީވެސް އަސްމާގެ ފަހަރިއެއްގެ އަތުން ލިބޭ ޕާންކޮޅެއް އެކަންޏެވެ.
ވަގުތީ ހިޔާވައްސެއްގެ ގޮތުގައި ޓެންޓެއްގައި ދިރިއުޅެން މަޖުބޫރުވެފައި ވާ އިރު، ފާޚާނާ ކުރުމުގެ ކަންކަމަކީ މިއަދު އުފުލަން ޖެހިފައި އޮތް އެންމެ ބޮޑު ބުރައެވެ.
ދަރިންނަށް ބޭނުންވާ އެންމެ ޒަރޫރީ ބޭސް ހޯދުމަކީވެސް ޣައްޒާގައި އިންތިހާއަށް ދަތިކަމެކެވެ.
އިޒްރޭލުން ބޮން އަޅަމުންދާ އަޑުފަށްގަނޑާ ހެދި ސުޖޫދްއާއި މުޢުތަސިމްއަށް ކޮށްފައިވާ ނަފުސާނީ އަސަރުގެ ވާހަކަ ކިޔައިދޭނެ ގޮތެއް އެއްވެސް މީހަކަށް ނޭނގެއެވެ.
ޣައްޒާ ކޮންޓްރޯލް ކުރަމުން ދާ ޙަމާސް ޖަމާޢަތުގެ ވަސް، މި ބިންމަތިން ފޮހެލާނެ ކަމަށް ބުނެ، އޮކްޓޯބަރ 7 ވަނަ ދުވަހު އިޒްރޭލުން ޤަތުލުޢާންމު ފެށިފަހުން ޣައްޒާއިން މަރުވި މީހުންގެ ޢަދަދު 18000 އަށް ވުރެ މައްޗަށް އަރައެވެ. އެޔެއް މިޔެއް ބެލުމެއް ނެތި ދެމުންދާ ޙަމަލާތަކުގައި ބިމާ ހަމަ ކުރަމުންދާ ޢިމާރާތްކުގެ ދަށުވެ މަރުވެ، ހޯދާ ނުފެނި ތިބި މީހުންގެ ޢަދަދު އަންދާޒާކޮށްލަންވެސް ނޭނގެއެވެ. ބައެއް ސަރަޙައްދުތަކަކީ، އެމްބިއުލާންސްތަކަށްވެސް ވަދެވޭ ހިސާބުތަކެއް ނޫނެވެ. އިޒްރޭލުގެ ޢުދުވާންތަކުގައި ފުރާނަ ގެއްލިދިޔަ މީހުންނާއި ޒަޚަމްވީ މީހުންގެ ބޮޑު އިންސައްތައެއް ހިއްސާ ކުރަނީ އަންހެނުންނާއި ކުޑަ ކުދިންނެވެ.
2.3 މިލިއަން މީހުންގެ އާބާދީއެއް ދިރިއުޅޭ ޣައްޒާގައި މިއަދު 80 ޕަސެންޓަށް ވުރެ ގިނަ މީހުންނަކީ ގެދޮރު ގެއްލިފައިވާ ރެފިއުޖީންނެވެ. އިންސާނަކަށް ވީތީ ލިބިދޭން ޖެހޭ އެންމެ އަސާސީ ޙައްޤުތަކުން މުޅި ޣައްޒާ މަޚްރޫމުކޮށް، އެއްގަމާއި، ކަނޑާއި ވައިގެ މަގުން ޣައްޒާ ހަފުސްކޮށް ނަސްލު ދޮވެލުމުގެ ލާއިންސާނީ ޤަތުލުޢާންމު ހިންގަމުން ދާ އިރު، އެމެރިކާއާއި ހުޅަނގުގެ ޤައުމުތަކަށް އެ މަންޒަރެއް ނުފެއެވެ. އަވަށްޓެރި ޤައުމުތަކަށްވެސް ޣައްޒާގެ ރުއިމުގެ އަޑު، ނުއިވޭ ފަދައެވެ.
