އެމްޑީޕީގެ މެންބަރުންގެ ވޯޓުން އެކަނި ވެސް ރައީސާއި ނައިބު ރައީސް އަޒުލް ކުރެވޭ ގޮތް ހެދުމަށް ކޮމެޓީން ފާސްކޮށްފި
15 ޑިސެމްބަރު 2023 | ހުކުރު 12:49މައުލޫމާތު ލިބޭ ގޮތުގައި މިއަންނަ ހޯމަ ދުވަހު މިހުށަހެޅުން މަޖިލީހުގެ ތަޅުމަށް ފޮނުވާނެ
ރައީސުލްޖުމްހޫރިއްޔާ ޑރ. މުހައްމަދު މުއިއްޒު
ރައްޔިތުންގެ މަޖިލީހުގެ ބޮޑު މެޖޯރިޓީއެއް އޮތް ދިވެހިރައްޔިތުންގެ ޑިމޮކްރެޓިކް ޕާޓީ (އެމްޑީޕީ)ގެ މެންބަރުންގެ ވޯޓުން އެކަނި ވެސް ރައީސުލްޖުމްހޫރިއްޔާ އާއި ރައީސުލްޖުމްހޫރިއްޔާގެ ނައިބު އަޒުލް ކުރެވޭ ގޮތް ހެދުމަށް މަޖިލީހުގެ ގަވާއިދަށް އިސްލާހު ގެންނަން ހުށަހަޅާފައިވާ ހުށަހެޅުން އާންމު ކޮމެޓީން ފާސްކޮށްފިއެވެ.
ރައީސް އާއި ނައިބު ރައީސް މަގާމުން ވަކިކުރުން ކުރިޔަށް ގެންދާނެ ގޮތް ބަޔާންކޮށްފައި ވަނީ މަޖިލީހުން އެކުލަވައިލި ގަވާއިދުގެ 41 ވަނަ ބާބުގަ އެވެ. އެ ބާބުގެ މާއްދާތަކަށް ބަދަލު ގެންނަން އާންމު ކޮމިޓީއަށް ހުށަހެޅުއްވީ ދަ ޑިމޮކްރެޓްސްގެ ޕާލިމެންޓަރީ ގްރޫޕުގެ ލީޑަރު، މެދުހެންވޭރު ދާއިރާގެ މެންބަރު އަލީ އާޒިމެވެ.
ބުރާސްފަތި ދުވަހު ކުރިއަށް ގެންދިޔަ އާއްމު ކޮމެޓީގައި މި އިސްލާހު ވަނީ ފާސްކޮށްފައެވެ.
އާންމު ކޮމެޓީގެ އަގުލަބިއްޔަތުން ރައްޔިތުންގެ މަޖިލީހުގެ ގަވާއިދުގެ 49، 202 އަދި 203 ވަނަ މާއްދާއަށް އިސްލާހުތަކެއް ގެނައުމަށް ފާސްކޮށްފައިވާއިރު، މައުލޫމާތު ލިބޭ ގޮތުގައި މިއަންނަ ހޯމަ ދުވަހު މިހުށަހެޅުން މަޖިލީހުގެ ތަޅުމަށް ފޮނުވާނެއެވެ. އަދި އެ ހުށަހެޅުން މަޖިލީހުން ފާސްކުރާނެ ކަމަށް މައުލޫމާތު ލިބެއެވެ.
ގަވާއިދުތަކަށް އިސްލާހު ގެނައުމަށް ކޮމެޓީން ފާސްކޮށްފައިވަނީ ރައީސް ނުވަތަ ނައިބު ރައީސް މަގާމުން ވަކިކުރުމަށް މަޖިލީހުގެ މެމްބަރުންގެ މަދުވެގެން ތިން ބައިކުޅަ އެއް ބައި މެމްބަރުން ސަބަބު ބަޔާންކުރައްވައި ސޮއިކުރައްވައި ލިޔުމަކުން މަޖިލީހަށް ހުށަހަޅާ ގަރާރުގެ ނޯޓިސް ދެ ދުވަހުގެ ތެރޭގައި ރައީސް އާއި ނައިބު ރައީސްއަށް ދިނުމާއި، އެ ނޯޓިސް ދޭތާ 14 ދުވަހުގެ މުއްދަތަކަށް ފަހު އެންމެ އަވަހަށް އަންނަ ރަސްމީ ބަންދު ނޫން ދުވަހަކު ބާއްވާ ޖަލްސާއަށް އެ ގަރާރު ހުށަހެޅުން އަދި އެ ޖަލްސާގައި އިތުރު އެއްވެސް މަސައްކަތެއް ކުރުމަށް އެޖެންޑާ ނުކުރުން އަދި ރައީސް އާއި ނައިިބު ރައީސްއަށް ދިފާއުވާން ދޭ 30 މިނެޓު އުނިކުރުމަށް ފަހު ގަރާރުގެ ބަހުސަށް ގިނަވެގެން ތިން ގަޑިއިރު ދިނުމަށެވެ.
މި އިސްލާހުތަކާއެކު ގަވާއިދު ފާސްވެއްޖެނަމަ 19 ވަނަ ރައްޔިތުން މަޖިލީހުގެ އެމްޑީޕީގެ މެންބަރުންގެ ވޯޓުން އެކަނި ވެސް ރައީސް އާއި ނައިބު ރައީސް މަގާމުން ވަކިކުރެވޭނެއެވެ. އެއީ ރައީސް އާއި ނައިބު ރައީސް ވަކި ކުރަން ހުށަހަޅަން މި ދައުރުގައި ބޭނުންވާނީ 27 މެންބަރުންގެ ސޮއެވެ. އަދި އެ ގަރާރު ފާސްކުރަން ބޭނުންވާނީ 54 މެންބަރުންގެ ވޯޓެވެ.
19 ވަނަ ރައްޔިތުން މަޖިލީހުގައި މިވަގުތު 80 މެންބަރުން ތިއްބަވާއިރު، 56 މެންބަރުންނަކީ އެމްޑީޕީގެ މެންބަރުންނެވެ. ދަ ޑިމޮކްރެޓްސްގެ 13 މެންބަރުން، ޕީޕީއެމް 2 މެންބަރުން، ޕީއެންސީގެ 2 މެންބަރުން، ޖުމްހޫރީ ޕާޓީގެ 2 މެންބަރުން، އެމްޑީއޭގެ 2 މެންބަރުން، އަދި ވަކި ޕާޓީއަކަށް ނިސްބަތްނުވާ 3 މެންބަރެއް ހިމެނެއެވެ.
