އެންޑޮމެޓްރިއޯސިސް އަދި ޕީސީއޯއެސްއަށް އަދިވެސް ކަވަރޭޖެއް ނުލިބޭ، މެޑިކަލް ޗެކްއަޕްގައި ހިމެނެނީ މިހާރުވެސް ހެދޭ އާދައިގެ ޓެސްޓްތައް

އަންހެނުންނަށް ދިމާވާ 'އެންޑޮމެޓްރިއޯސިސް' އަދި 'ޕީސީއޯއެސް' ފަދަ ޞިއްޙީ މައްސަލަތަކަށް ޚާއްޞަ ފަރުވާ އާއި ބޭސްތައް، ކޮންމެ ޑައިގްނޯސިސްއެއްގެ ދަށުންވެސް އާސަންދަ ސްކީމްއިން ލިބޭނެ އިންތިޒާމް ހަމަޖެއްސުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ނިންމެވި ނަމަވެސް އެ ހިދުމަތްތަކަށް އާސަންދަ ކަވަރޭޖް އަދިވެސް ނުލިބޭކަން ހާމަވެއްޖެއެވެ.

އަންހެނުންނަށް ދިމާވާ 'އެންޑޮމެޓްރިއޯސިސް' އަދި 'ޕީސީއޯއެސް' ފަދަ ޞިއްޙީ މައްސަލަތަކަށް ޚާއްޞަ ފަރުވާ އާސަންދައިގެ ތެރެއިން ލިބޭގޮތަށް ހަމަޖެއްސީ މި މަހުގެ 10 ވަނަ ދުވަހުއެވެ. ’އެންޑޮމެޓްރިއޯސިސް‘ އަދި ’ޕީސީއޯއެސް‘ ފަދަ އަންހެނުންނަށް ދިމާވާ ސިއްހީ މައްސަލަތަކަށް ހާއްސަ ފަރުވާ އާސަންދަ މެދުވެރިކޮށް ލިބޭނެ އިންތިޒާމު ހަމަޖައްސައިދިނުމަކީ ރައީސް މުއިއްޒުގެ ހަފްތާ 14 ގައި ވެސް ހިމެނޭ ކަމެކެވެ.

Advertisement

ނަމަވެސް ވަޒީރުންގެ މަޖިލީހުގެ ބައްދަލުވުމުގައި މިނިސްޓްރީ އޮފް ސޯޝަލް އެންޑް ފެމިލީ ޑިވެލޮޕްމަންޓް އިން ހުށަހެޅުއްވި ކަރުދާހުގެ މައްޗަށް މަޝްވަރާ ކުރެއްވުމަށް ފަހު، އެންޑޮމެޓްރިއޯސިސް އަދި ޕީސީއޯއެސް ފަދަ ޞިއްޙީ މައްސަލަތަކަށް ޚާއްޞަ ފަރުވާ އާއި ބޭސްތައް، ކޮންމެ ޑައިގްނޯސިސްއެއްގެ ދަށުންވެސް އާސަންދަ ސްކީމްއިން ލިބޭނެ އިންތިޒާމް ވަޒީރުންގެ މަޖިލީހުގެ ލަފާފުޅާއެކު ރައީސުލްޖުމްހޫރިއްޔާ ހަމަޖައްސަވާފައިވާ ކަމަަށެވެ.

މިކަމާއި ގުޅިގެން އެސްއޯއީ ކޮމިޓިގައި އާސަންދައާއި ސުވާލުކުރުމުން، އެ ކުންފުނީގެ މެނޭޖިންގ ޑިރެކްޓަރ އާމިނަތު ޒީނިޔާ ވިދާޅުވީ އެމްއެފްޑީއޭއިން މަސައްކަތް ކުރަމުން ދަނީ ސަރުކާރުން ފާސްކޮށްފައިވާ ކަންކަން ކުރިއަށް ގެންދިއުމަށް ކަމަށެވެ. އެގޮތުން ޕީސީއޯއެސް އަދި އެންޑީމެޓްރޯސިސްގެ ޗެކްއަޕްތަކަކީ ވަރަށް އަވަހަށް ކުރެވޭނެ ކަމެއް ކަމަށާއި، އެކަމަކީ މިހާރު ވެސް ސްކީމްގެ ތެރެއިން ހޯދަން އެދޭ ކަންކަން ކަމަށާއި، އެހެންނަމަވެސް އެ ހިދުމަތް ރިޖެޓްކުރަމުންދާ ކަމަށެވެ.

މީގެ އިތުރުން ޑޮކްޓަރުން ވަކި ކަމަކަށް ލަފާ ދީފިނަމަ، އެ ދޭ ލަފާގެ މައްޗަށް އަހަރަކު ދެފަހަރު އާސަންދައިގެ ތެރެއިން އެކި ކަހަލަ ޕްރޮފައިލްތައް ހެދޭނެ ކަމުގައިވެސް ރައީސުލްޖުމްހޫރިއްޔާ ވިދާޅުވިނަމަވެސް، އަދިވެސް އެ ހިދުމަތް ދޭން ނުފަށާކަން ވަނީ ހާމަވެފައެވެ.

ރައީސް ޑރ. މުއިއްޒު ވިދާޅުވީ އާސަންދައިގެ ތެރޭގައި ހިމެނޭ ޚިދުމަތެއްގޮތުގައި މެޑިކަލް ޗެކްއަޕް ފޯރުކޮށްދީ، އެކަމަށް މީހުން އަހުލުވެރިކުރުވުމުގެ ހަރަކާތްތައް ކުރިއަށް ގެންދަވާނެކަމަށެވެ. ހަމަ އެއާއެކު އެކި އުމުރުފުރަޔަށް ބަހާލައިގެން އެކިކަހަލަ ޕެކޭޖްތައް ކަނޑައަޅައި ޢިއުލާން ކުރައްވާނެ ކަމުގައިވެސް އެމަނިކުފާނު ވިދާޅުވިއެވެ.

އެސްއޯއީ ކޮމިޓީގައި މިކަމާއި ގުޅޭގޮތުން ޒީނިޔާ ވިދާޅުވީ، މީގެ ތަންކޮޅެއް ކުރިން ވެސް މެޑިކަލް ޗެކްއަޕް ފަށަން ވެގެން، ޕެކޭޖުތައް ހެދި އިރު ވެސް އަހަރަކު އެއް ފަހަރު ނުވަތަ ދެ އަހަރުން އެއް އަހަރު ހެދޭ ކަހަލަ ޓެސްޓުތައް ވެސް ލާފައި ޗެކްއަޕްތަކެއް ހަދަން ހިމެނި ކަމަށެވެ. އަދި މެޑިކަލް ޗެކްއަޕް ކީ ކަމުގައިވީ ނަމަވެސް، އޭގައި ހިމެނެނީ ވަރަށް ބޭސިކް ސްކްރީނިންތަކެއް ކަމަށެވެ. އެގޮތުން ބްލަޑް އަދި ޔޫރިން ޓެސްޓްތަކެއް ހެދުމަށް ފަހު، އިތުރަށް ކަންކަން ޗެކް ކުރާނީ ޓެސްޓްތަކުގެ ނަތީޖާއިން ކަމެއް ފާހަގަކުރެވޭ ކަމުގައިވާ ނަމަ ކަމަށް ޒީނިޔާ ވިދާޅުވިއެވެ.