މެންޗެސްޓަރ ސިޓީ އަށް ކުޅެމުން އަންނަ ނޯވޭގެ ފޯވާޑް އާލިން ހާލަންޑް، އެ ޓީމުގެ ފަރިތަކުރުންތަކަށް ބުރާސްފަތި ދުވަހު ނިކުންނަން ފަށާނެ ކަމަށް އެ ޓީމުގެ ކޯޗު ޕެޕް ގާޑިއޯލާ ބުނެފި އެވެ.

އެންމެ ފަހުން ހާލަންޑް ސިޓީގައި ކުޅުނީ އިނގިރޭސި ޕްރިމިއާ ލީގުގައި އެސްޓަން ވިލާ އަތުން ބަލިވި މެޗުގަ އެވެ. އެ މެޗުގެ ފުރަތަމަ 11 ގައި ހިމެނިގެން، ފުރިހަމަ ވަގުތު ހަމަވަންދެން ހާލަންޑް ވަނީ ކުޅެފަ އެވެ. ނަމަވެސް އޭގެ ފަހުންް ލީގުގައި ސިޓީން ލޫޓަން ޓައުނާ ދެކޮޅަށް ކުޅުނު މެޗުގައި ހާލަންޑް ކުޅެފައެއް ނުވެ އެވެ. އެ މެޗުގައި އޭނާ ކުޅެފައި ނުވަނީ އަނިޔާގެ ސަބަބުންނެވެ.

ސިޓީގެ ކޯޗު ގާޑިއޯލާ ބުނީ، އޭނާ އަށް އުންމީދު ކުރެވޭ ގޮތުގައި ބުރާސްފަތި ދުވަހު ސިޓީން ކުރިއަށް ގެންދަން ނިންމާފައިވާ ފަރިތަކުރުންތަކަށް ހާލަންޑް ނިކުންނާނެ އެވެ. ހާލަންޑުގެ އަނިޔާއާ ގުޅޭ ގޮތުން އިތުރަށް އެއްޗެއް ބުނަން އިނގޭނީ އެ ފަރިތަކުރުމަށް ފަހު ކަމަށް ވެސް ގާޑިއޯލާ ވަނީ ބުނެފަ އެވެ. އިތުރަށް އޭނާ ބުނީ، ހާލަންޑުގެ އަނިޔާ ސީރިއަސް ކަމަށް ޤަބޫލު ނުކުރާ ކަމަށާއި، އުންމީދަކީ ޕްރިމިއާ ލީގުގައި ދެން ސިޓީން ކުޅޭ މެޗުގައި އޭނާ އަށް ކުޅެވުން ކަމަށެވެ.

ޖަރުމަނުގެ ބޮރޫޝިއާ ޑޯޓްމަންޑުގައި ހުރުމަށްފަހު މިދިޔަ އަހަރު ސިޓީ އަށް ބަދަލުވި ހާލަންޑް އަންނަނީ އެ ޓީމުގައި މޮޅަށް ކުޅެމުންނެވެ. މި ސީޒަންގެ މިހާތަނަށް ވެސް އޭނާ ވަނީ ސިޓީ އަށް ކުޅެދިން 22 މެޗުން 19 ލަނޑު ޖަހައިފަ އެވެ. އޭގެ ތެރެއިން 14 ލަނޑަކީ އިނގިރޭސި ޕްރިމިއާ ލީގުގައި ހާލަންޑް ޖަހާފައިވާ ލަނޑެވެ. ސިޓީގެ ކޯޗު ގާޑިއޯލާ ވެސް އެންމެ ބޮޑަށް ބަރޯސާވާ އެއް ކުޅުންތެރިޔަކީ ހާލަންޑް އެވެ.

މިވަގުތު ސިޓީ އޮތީ ލީގު ތާވަލްގެ ހަތަރު ވަނައިގަ އެވެ. ލީގު ތާވަލްގައި އެ ޓީމުގެ މަގާމު ކުރިއަށް ޖައްސާލަން ސިޓީން ކުރާ މަސައްކަތުގައި ކްރިސްޓަލް ޕެލެސްއާ ދެކޮޅަށް ކުޅޭ މެޗު އެ ޓީމަށް ވަރަށް މުހިންމު ވާނެ އެވެ.