ރައީސުލްޖުމްހޫރިއްޔާ ފެންވަރުގައި ލައްވާނެ އިތުރު ބޭފުޅަކު ނެތްތޯ؟

ސަރުކާރެއް ޤާއިމުވެފައި އޮންނަނީ އާންމު ރައްޔިތުންނަށް ޚިދުމަތް ކުރުމަށެވެ. ސަރުކާރުގެ މުއައްސަސާތަކާއި އިސްވެރިންގެ ޒިންމާ އަކަށް ވާން ޖެހޭނީ ރައްޔިތުންނާ ގުޅުން ހުރި އެންމެހާ ކަންކަމުގައި މަސައްކަތް ކުރުމެވެ. އެއްވެސް ޙާލެއްގައި މަހުން މަހަށް މުސާރަ ނަންގަވައިގެން، ދެ ފައި އޮޅާލައިގެން ތިއްބަވާކަށް ނޫނެވެ. އަމުދުން ސަރުކާރަކީ ތިމާމެންގެ ސިޔާސީ ކުދިން ކޮޅަށް ނުވަތަ، ޘަނާ ކިޔަން ތިބޭ ސިޔާސީ މީހުންނަށް "ދޮލަނގަށް" ލައިގެން ވަޒީފާ ބަހަން އޮންނަ ތަނެއް ވެސް ނޫނެވެ. އެހެން ބުންޏަސް، މިފަހަރު މި އޮތީ ވަރުގަދަ ކަމަކާ ޖެހިފަ އެވެ. ހަމަ ބަހަނީ އެވެ. ނަގަނީ އެވެ. ޖެހުނު ތަނަކުން، ޖެހުނު ތަނަކަށް ނަގަނީ އެވެ. އެކި ފަންތީގެ، އެކި ގިންތީގެ މަގާމުތަކަށެވެ.

ވަޒީރުންގެ ނައިބު ކަމުގެ މަގާމުން ފަށަމާ ބަހީ އެވެ. އެއާ ވިދިގެން ސްޓޭޓް މިނިސްޓަރުންގެ މަގާމެވެ. ނުވިތާކަށް ވަޒީރުންގެ މަގާމެވެ. ވުޖޫދުގައި ނެތް މަގާމުތައް ވެސް، މޫލައިގެން އެއޮށް އަރަނީ އެވެ. އުތުރި އަރަނީ އެވެ. ވަޒީފާތައް އުތުރި އެރިވަރު ނިކަން ދެކިބަލާށެވެ. ވުޖޫދު ކުރަން ހަމަޖެހުނީ ރަސްމީކޮށް 22 ވުޒާރާއަށްވާ، 22 ވަޒީރުންނެވެ. އެކަމަކު، މި އަދަދު ބޮއްސުން ލައިގެން ގޮސް، ވުޒާރާތަކުގައި ތިއްބަވާ ވަޒީރުންނާއި، ރައީސުލްޖުމްހޫރިއްޔާގެ އޮފީހުގައި ތިއްބެވި ވަޒީރުންގެ އިތުރަށް، އެ ވަޒީރުންނާ އެއް ފެންވަރަށް، އެކި ވުޒާރާތަކަށް ޖުމުލަ އިތުރު 21 ބޭފުޅަކު އެބަ ތިއްބެވި އެވެ. ވަޒީރުންގެ ފެންވަރުގައި ތިއްބެވި ބޭފުޅުންގެ އަދަދު 43 އަށް އެރީ އެވެ. އަޅެ ފަހެ، މީހަކު މޮޔަ ނުވާނެ ހެއްޔެވެ؟

މިއީ، މިދިޔަ ސަރުކާރުގެ މަތި ބަރުވެގެން، އެކަމާ ހިތްޕުޅާ ނުވެ، ރޭގަނޑުގެ ނިދި ނަންގަވަައިގެން، ޓުވީޓު ކުރައްވައި، ޕޯޑިއަމްތަކުގައި މޮޅެތި ވާހަކަ ދައްކަވައިގެން، ރައްޔިތުން ގުނބޯ ހެއްދެވި، ލީޑަރުންގެ ފެންވަރެވެ. މިސާލަކަށް ބަލާލަމާ ހިންގަވާށެވެ. ނިމުނު ރައީސް އިބްރާހީމް މުޙައްމަދު ޞާލިޙުގެ ސަރުކާރުގައި ރައީސް އޮފީހުގައި ތިއްބެވީ ފަސް ވަޒީރުންނެވެ. އަދުގެ ރައީސް ޑރ މުޙައްމަދު މުޢިއްޒުގެ ވެރިކަމުގައި ރައީސް އޮފީހުގައި 13 ވަޒީރުން އެބަ ތިއްބަވަ އެވެ. ދެން ވެސްވީ، އަތުން ހަންދާ ވަރަށް އަތް ޖައްސަވަން ހެއްޔެވެ؟

ސްޓޭޓް މިނިސްޓަރުންގެ ފެންވަރުގައި މީގެ ކުރިން ތިއްބެވީ 38 ބޭފުޅުންނެވެ. ރައީސް މުޢިއްޒުގެ ވެރިކަމަށް 27 ދުވަސްވީއިރު، އެ އަދަދު ހުރީ 63 ގައެވެ. ނިމުނު ފަސް އަހަރު އެއްކޮށް، ވަޒީރުންގެ ނައިބުންގެ ގޮތުގައި ތިއްބެވީ 48 ބޭފުޅުންނެވެ. ރައީސް މުޢިއްޒުގެ ސަރުކާރުގައި މިހާތަނަށް 72 ނައިބު ވަޒީރުން އެބަ ތިއްބެވި އެވެ. ނިމުނު ފަސް އަހަރު ރައީސުލްޖުމްހޫރިއްޔާގެ އޮފީގުގައި 319 ބޭފުޅުން ތިއްބެވިއިރު، މިހާތަނަށް މި ސަރުކާރުގައި 343 ބޭފުޅުން އެބަ ތިއްބެވި އެވެ. ރައީސުލްޖުމްހޫރިއްޔާގެ ރަސްމީ ގެކޮޅު، މުލީއާގޭގައި މީގެ ކުރިން 65 ބޭފުޅުން ތިއްބެވިއިރު، މިހާތަނަށް މި ސަރުކާރުގައި 69 ބޭފުޅުން އެބަ ތިއްބެވި އެވެ. ރައީސުލްޖުމްހޫރިއްޔާގެ ނައިބުގެ ގެކޮޅުގައި މީގެ ކުރިން 22 ބޭފުޅުން ތިއްބެވި ނަމަވެސް، މިހާރު އެ އަދަދު ހުރީ 43 ގައެވެ.

މިއޮތީވާ ކަމަކާ ޖެހިފަ އެވެ. ވަޒީރުންގެ ފެންވަރުގައި އެއް ވުޒާރާއެއްގައި ތިން ބޭފުޅުން ތިބޭ ހިސާބަށް ސަރުކާރު ގޮސްފި އެވެ. ވަޒީރަށް އެޑްވައިޒް ދެއްވާނެ ބޭފުޅަކު ވެސް އައްޔަން ކުރެއްވީ ވަޒީރު ފެންވަރުގަ އެވެ. އަނެއްކާ އެ އެޑްވައިޒަރަށް އެޑްވައިޒް ދޭން ވަޒީރު ފެންވަރުގައި ބޭފުޅަކު ލާންވީ ހެއްޔެވެ؟ އެ ވުޒާރާ އަށް ވެސް ވަޒީރުންގެ ފެންވަރުގައި އެ ޢައްޔަން ކުރެއްވީ، ކުރީގެ މާލީ ވަޒީރާއި، ކުރީގެ ގަވަރުނަރެވެ. ވިސްނާ ވިސްނާ ބޯ ގޮވާ ހިސާބަށް ގޮސްފި އެވެ.

ދެން އޮތީ އެންމެ ގޮތެކެވެ. އެއީ ރައީސުލްޖުމްހޫރިއްޔާ ފެންވަރުގައި އެހެން ބޭފުޅަކު ލެއްވުމެވެ. ވާނީވެސް އެެހެންތާ އެވެ! ސަރުކާރު ޕާޓީ ހިފަހައްޓަން ވަޒީފާ ދޭން އޮތް ލިސްޓު މާ ދިގީއޭ ރަށު ތެރެއިން ވެސް އެބަ ކިޔަ އެވެ. ރަށު ތެރެއިން އެ ގޮވާ ގޮވެލި ފަތި، މިއަދު މި ދަނީ ހަގީގަތަކަށް ވަމުން ނޫން ހެއްޔެވެ؟ ރަށު ތެރޭގައި މިހާރު އަމުދުން މި ވާހަކަ މާ ބާރަށް ދެކެވެން ފަށައިފި އެވެ. އެވެރިން ބުނާ ގޮތުގައި، ދުވަސް ކޮޅެއް ފަހުން، ރައީސުލްޖުމްހޫރިއްޔާގެ ފެންވަރުގައި އިތުރު ބޭފުޅުން ވެސް ފެނިދާނެ އެވެ. މިއޮތީވާ ސަރުކާރެކެވެ.