ކެޓަލޯނިއާ ގެ މިނިވަންކަން 10 އޮކްޓޯބަރު ވީ އަންގާރަ ދުވަހު އިއުލާން ކުރަން މަސައްކަތް ކުރިއެވެ. ވަރަށް މަސައްކަތް ކުރިއެވެ. އެހެންނަސް އެކަން ނުވިއެވެ. ނޫނީ ޕްރެޝަރުގެ ސަބަބުން އެކަން ކުރަން ނުކެރުނީއެވެ.
ކެޓަލޯނިއާގައި އޮކްޓޯބަރު 1 ގައި ބޭއްވި ވޯޓަށް، ކެޓަލޯނިއާގެ ރައްޔިތުންގެ ތާއިދު ލިބުނެވެ. މާބޮޑަށްވެސް ލިބުނެވެ. ކެޓަލޯނިއާގެ މިނިވަންކަން އިއުލާން ކުރަން ފެނޭތޯ ބެލުމަށް އޮކްޓޯބަރު 1 ގައި ބޭއްވި ވޯޓުގައި، 90 ޕަސެންޓް މީހުން ސްޕެއިން އިން މިނިވަން ވާން ފެންނަ ކަމަށް އާނ ބަސް ބުނެފައި ވެއެވެ. ކެޓަލޯނިއާގައި ނެގި ވޯޓާ ގުޅިގެން ސްޕެއިންގެ މައި ސަރުކާރުން ބުނެފައި ވަނީ އެ ވޯޓަކީ ގާނޫނު އަސާސީއާ ޚިލާފު ބާތިލް އެއްޗެއް ކަމަށެވެ. ވޯޓު ނިމުނުތާ ކުޑަވަގުތުކޮޅެއްގެ ތެރޭގައި ސްޕެއިންގެ ބޮޑުވަޒީރު މާރިއާނޯ ރަޚޮއި ވިދާޅުވީ ޣައިރު ގާނޫނީ ވޯޓެއްގައި ބައިވެރިކޮށް ކެޓަލޯނިއާގެ ރައްޔިތުން މޮޔަ ހައްދާފައިވާ ކަމަށެވެ. ބޮޑުވަޒީރު ވަނީ އެ ވޯޓަކީ ޑިމޮކްރަސީއަށް ކުރި ފުރައްސާރައެއް ކަމަށް ވިދާޅުވެފައެވެ.
10 އޮކްޓޯބަރު ވީ އަންގާރަ ދުވަހު ކެޓަލޯނިއާގެ މިނަވަންކަން އިއުލާން ކުރައްވަން ހަމަޖެހިފައި އޮތީ، ކެޓަލޯނިއާގެ ލީޑަރު ކާލެސް ޕުއިޖްޑެމޮންޓް އެވެ. އެހެންނަމަވެސް ޕުއިޖްޑެމޮންޓް ކަންކަން ކުރެއްވި ގޮތަށް ބަލާލަމާތޯއެވެ. ކެޓަލޯނިއާގެ ލީޑަރު ކުރެއްވި ކަމަކީ އެ ސަރަހައްދުގެ މިނިވަންކަން އިއުލާންކުރުމުގެ ގަރާރުގައި ސޮއެ ކުރެއްވުމެވެ. މަޝްވަރާކުރުމަށް ވަގުތު ދޭންކަމަށް ވިދާޅުވެ ގަރާރު ތަންފީޒު ކުރުން ވަނީ ފަސްކޮށްފައެވެ.
ކެޓަލޯނިއާގެ މިއަމަލާ ބެހޭ ގޮތުން ސްޕެއިން އިން ކަންކަން ކުރި ގޮތަށް ބަލާލަމާތޯއެވެ. ސްޕެއިން އިން ބުނީ ކެޓަލޯނިއާގެ ލީޑަރު ކާލެސް ޕުއިޖްޑެމޮންޓް ކެޓަލޯނިއާގެ މިނިވަންކަން އިއުލާން ކުރައްވައިފިތޯ ނުވަތަ ނޫންތޯ ސާފުކޮށްދެއްވުމަށް ފަސް ދުވަހުގެ މުހުލަތެއް ދޭނެ ކަމަށެވެ. އަދި މިނިވަންކަން އިއުލާން ކުރައްވައިފި ކަމަށް ވިދާޅުވެއްޖެ ނަމަ، މިނިވަންކަން އަނބުރާ ގެންދިއުމަށް ޕުއިޖްޑެމޮންޓް އަށް އިތުރު ތިން ދުވަސް ދޭނެކަމަށެވެ. އަދި އެ ގޮތަށް އަމަލު ނުކޮށްފި ނަމަ ސްޕެއިންގެ ސަރުކާރުން ކެޓަލޯނިއާގެ މިނިވަންކަން ސަސްޕެންޑްކޮށް ސްޕެއިންގެ މައި ސަރުކާރުގެ ފުރިހަމަ ބާރު ހިންގާނެ ކަމަށެވެ.
ކޮންމެއަކަސް، ކެޓަލޯނިއާގެ މިނިވަންކަން އިއުލާންކޮށްފިތޯ ބަލަން ދިން މުހުލަތު ހަމަވެއްޖެއެވެ. ކެޓަލޯނިއާގެ ލީޑަރު ކާލެސް ޕުއިޖްޑެމޮންޓް ކެޓަލޯނިއާގެ މިނިވަންކަން އިއުލާން ކުރައްވައިފިތޯ ނުވަތަ ނޫންތޯ ސާފުކޮށްދެއްވުމަށް ސްޕެއިންގެ ސަރުކާރުން ކެޓަލޯނިއާގެ ލީޑަރަށް ދިން ފަސް ދުވަހުގެ މުހުލަތުގައި އެކަން ކުރެވިފައިވާ ނުވާ ކަމަށް ސްޕެއިން އިން ބުނެފިއެވެ.
ކެޓަލޯނިއާގެ ލީޑަރު ޕުއިޖްޑެމޮންޓް ސްޕެއިންގެ މައި ސަރުކާރަށް ހޯމަ ދުވަހު ފޮނުއްވި ސިޓީފުޅެއްގައި ގޮވާލެއްވީ ކުރިއަށް އޮތް ދެމަސްތެރޭގައި ކެޓަލޯނިއާ އާއި ސްޕެއިންގެ މައި ސަރުކާރާ މަޝްވަރާ އަށް ގޮވާލާ ކަމަށެވެ. ޕުއިޖްޑެމޮންޓް، ސްޕެއިންގެ ބޮޑު ވަޒީރު މާރިއާނޯ ރަޚޮއި އަށް ފޮނުއްވި ސިޓީފުޅުގައި އިތުރަށް ވިދާޅުވީ މަޝްވަރާ ކުރުމަށްޓަކައި ވީހާވެސް އަވަހަކަށް ބައްދަލުވުމަކަށް އެދޭ ކަމަށާއި، ކަންކަން ގޯސްނުކުރެއްވުމަށް އެދޭ ކަމަށެވެ. އަދި އިޚްލާސްތެރިކަމާއެކު، މައްސަލަ ދެނެގަނެ އެކަމާ ކުރިމަތިލައިފި ނަމަ ރަނގަޅު މަގަށް ދެވި ހައްލެއް ފެންނާނެ ކަމަށެވެ.
ކެޓަލޯނިއާ އިން މިނިވަންކަން އިއުލާން ކޮށްފިތޯ ސްޕެއިން އަށް ސާފުކޮށްދީފައި ނުވާތީ އެކަމާ ގުޅިގެން ސްޕެއިންގެ ބޮޑު ވަޒީރުގެ ނައިބު ސޮރަޔާ ސައެންޒް ހޯމަ ދުވަހު ވިދާޅުވީ، ކެޓަލޯނިއާގެ ލީޑަރު އެ ސަރަހައްދުގެ މިނިވަންކަން އިއުލާންކޮށްފިތޯ ސާފުކުރަން ބުރާސްފަތި ދުވަހާ ހަމައަށް އިތުރު ފުރުސަތު ދޭ ކަމަށެވެ. އެކަމަނާ ވިދާޅުވީ ސްޕެއިންގެ މައި ސަރުކާރާއި ކެޓަލޯނިއާ ގެ ސަރުކާރާ އެކު ބާއްވާ މަޝްވަރާ ތައް ބާއްވަން ޖެހޭނީ "ގާނޫނުގެ ތެރެއިން ކަމަށެވެ."
އުފެދޭ ސުވާލަކީ ކެޓަލޯނިއާ އިން ސްޕެއިން ބުނާ ބަސް އަހާނެތޯއެވެ. ކަންކަން އެގި ސާފުވާކަށް މާގިނަ ދުވަހެއް ނެތެވެ.
