މަޖިލީހުގެ މެންބަރުކަމުން ވަކިވެވަޑައިނުގަންނަވައި، ރައީސް ނަޝީދު ސިޔާސީ މަސައްކަތްތަކުން ދުރަށް
12 ޑިސެމްބަރު 2023 | އަންގާރަ 15:35ރައީސް ނަޝީދު ސިޔާސީ މަސައްކަތްތަކުން ދުރަށް ޖެހިވަޑައިގަންނަވަން ނިންމަވާފައިވަނީ ކްލައިމެޓް ވަލްނަރަބަލް ފޯރަމްގެ ސެކްރެޓަރީ ޖެނެރަލްގެ މަގާމު އެމަނިކުފާނަށް ލިބިވަޑައިގަތުމުގެ ސަބަބުން
ކުރީގެ ރައީސް، މުޙައްމަދު ނަޝީދު
ކުރީގެ ރައީސް އަދި މަޖިލީހުގެ މައްޗަންގޯޅި މެދު ދާއިރާގެ މެންބަރު މުޙައްމަދު ނަޝީދު، މެންބަރު ކަމުގެ މަގާމުން ވަކިވެވަޑައިނުގަންނަވައި ސިޔާސީ މަސައްކަތްތަކުން ދުރަށް ޖެހިވަޑައިގެންނަވަން ނިންމަވައިފި އެވެ.
ސިޔާސީ ކަންކަމުން އަހަރުތަކަކަށް ދުރަށް ޖެހިވަޑައިގަންނަވާކަން އިއުލާން ކުރައްވަމުން ރައީސް ނަޝީދު ނެރުއްވި ބަޔާނެއްގައި ވަނީ ކުރިއަށް އޮތް މަޖިލީހުގެ އިންތިހާބުގައި ވާދަ ނުކުރައްވާނެ ކަން ވެސް ވިދާޅުވެފަ އެވެ.
އެގޮތުން އެމަނިކުފާނުގެ އެ ބަޔާނުގައި ވިދާޅުވީ ސިޔާސީ މަސައްކަތްތަކުގައި އެމަނިކުފާނު އުޅުއްވާތާ އަހަރުތަކެއް ވެއްޖެ ކަމަށާއި، ސިޔާސީ މަސައްކަތްތަކުގައި ގިނަ ގުނަ ފަރާތްތަކެއްގެ އެހީތެރިކަން އެމަނިކުފާނަށް ލިބިވަޑައިގެންނެވި ކަމަށެވެ.
އަދި އެމަނިކުފާނު ސިޔާސީ މަސައްކަތްތަކުގައި އުޅުއްވީީ ގިނަ ޕާޓީ އެކުލެވޭ ވެރިކަމުގެ ނިޒާމެއް ފައްކާ ކުރެއްވުމުގެ މަސައްކަތް ކުރެއްވުމުގެ އިތުރުން، ރާއްޖެ އަކީ އިސްލާމީ މަތިވެރި އުސޫލުތައް ހިފަހައްޓައި، އިންސާނީ ހައްގުތަކަށް އިހްތިރާމު ކުރާ އަދި ދުލާއި ގަލަމުގެ މިނިވަންކަން ރައްޔިތުންނަށް ލިބިފައިވާ ގައުމަކަށް ހެއްދެވުމަށް ކަމަށެވެ.
މީގެ އިތުރުން އެބަޔާނުގައި އެމަނިކުފާނުގެ މަޖިލީހުގެ މެންބަރުކަމުން ވަކިވެވަޑައިގެންނެވި ފަދަ ވާހަކަކޮޅެއް ވެސް ހިމެނުއްވި އެވެ. އެގޮތުން އެމަނިކުފާނު އެންމެ ފަހުން ހުންނެވީ ރައްޔިތުންގެ މަޖިލީހުގެ މައްޗަންގޯޅި މެދު ދާއިރާގެ މެންބަރުކަމުގައި ފާހަގަ ކުރައްވައި، އެ ދާއިރާގެ ރައްޔިތުންނަށް އެމަނިކުފާނު ޝުކުރު އަދާކުރެއްވި އެވެ.
އެއާއެކު، ރައީސް ނަޝީދު މެންބަރު ކަމުން ވަކިވެވަޑައިގެންނެވިކަމުގެ ސުވާލު މަޖިލީހުގެ ކޮމިއުނިކޭޝަންސް ޑިރެކްޓަރު ހަސަން ޒިޔާއު ވިދާޅުވީ އެފަދަ މައުލޫމާތެއް މަޖިލީހުގެ އިދާރާއަށް އަދި ލިބިފައިނުވާ ކަމަށެވެ.
ރައީސް ނަޝީދުގެ އެ ބަޔާނުގައި ވަނީ އެމަނިކުފާނުގެ ސިޔާސީ ހަޔާތުގައި ހިނގި ބައެއް ކަންކަމުގެ މައްޗަށް ވެސް އަލި އަޅުއްވާފަ އެވެ. އެގޮތުން ގިނަ އަނިޔާތަކާއި ޖަލުގައި އެތައް ފަހަރަކު ހުންނަވަން ޖެހިވަޑައިގެންނެވި ނަމަވެސް، އެ ހަޔާތުގައި ގިނަ އުފާވެރި ކަންތައްތަކެއް ހިނގި ކަމަށް ރައީސް ނަޝީދު ވިދާޅުވި އެވެ.
އެގޮތުން ރާއްޖޭގެ ރައީސުލްޖުމްހޫރިއްޔާ ކަމުގެ މަގާމުގެ އިތުރުން، ރައްޔިތުންގެ މަޖިލީހުގެ 19 ވަނަ ދައުރުގެ ރައީސްކަން ކުރެއްވި ކަން ވެސް އެމަނިކުފާނު ފާހަގަ ކުރެއްވި އެވެ.
ރައީސް ނަޝީދު ސިޔާސީ މަސައްކަތްތަކުން ދުރަށް ޖެހިވަޑައިގަންނަވަން ނިންމަވާފައިވަނީ ކްލައިމެޓް ވަލްނަރަބަލް ފޯރަމްގެ ސެކްރެޓަރީ ޖެނެރަލްގެ މަގާމު އެމަނިކުފާނަށް ލިބިވަޑައިގަތުމުގެ ސަބަބުން، އެކަމަށް ވަގުތު ހުސްކުރެއްވުމުގެ ބޭނުމުގައި އެވެ.
