ރޯމާގައި ލުކާކޫ އަށް ހުއްޓުމެއް ނެތް

އިޓާލިއަން ލީގުގައި ފިއޮރެންޓީނާއާ ދެކޮޅަށް ކުޅުނު މެޗުން ރޯމާ އެއްވަރުވެއްޖެ އެވެ.

ރޯމާގެ އަމިއްލަ ދަނޑުގައި ކުޅުނު މެޗު ނިމުނީ ދެ ޓީމު 1-1 އިން އެއްވަރުވެގެންނެވެ. މެޗުގައި ފުރަތަމަ ލަނޑު ޖަހައި ކުރި ހޯދީ ވެސް ރޯމާ އިންނެވެ. މެޗު ފަށައިގެން ފަސް ވަނަ މިނެޓުގައި ރޯމާ އިން ވަނީ ލަނޑު ޖަހައި ލީޑު ނަގައިފަ އެވެ. އާޖެންޓީނާގެ ޕައުލޯ ޑިބާލާ ތަނަވަސްކޮށްދިން ފުރުސަތެއްގައި ރޯމާ އަށް ލީޑު ނަގައިދިނީ، ބެލްޖިއަމްގެ ރޮމެލޫ ލުކާކޫ އެވެ. މިއީ ރޯމާގައި މޮޅަށް ކުޅެމުން އަންނަ ލުކާކޫ މި ސީޒަންގައި އެ ޓީމަށް ޖަހައިދިން 11 ވަނަ ލަނޑެވެ. އޭގެ ތެރެއިން އިޓާލިއަން ލީގުގައި އޭނާ ވަނީ ހަތް ލަނޑު ޖަހައިފަ އެވެ. ފިއޮރެންޓީނާ އިން މެޗުގެ ނަތީޖާ ހަމަހަމަ ކުރީ ދެ ވަނަ ހާފުގަ އެވެ. 66 ވަނަ މިނެޓުގައި އެ ޓީމަށް ނަތީޖާ ހަމަހަމަ ކޮށްދިނީ ލޫކަސް މާޓިނޭޒް އެވެ. އޭނާ ލަނޑު ޖަހަން ފުރުސަތު ތަނަވަސްކޮށްދިނީ ކްރިސްޓިއަން ކުއާމޭ އެވެ.

ނަތީޖާ އާއެކު ރޯމާ އޮތީ ލީގު ތާވަލްގެ ހަތަރު ވަނައިގަ އެވެ. އެއީ މިހާތަނަށް ކުޅުނު 15 މެޗުން 25 ޕޮއިންޓު ހޯދައިގެންނެވެ. ތިން ވަނައިގައި އޮތް އޭސީ މިލާނާ ދެމެދު އޮތީ ހަތަރު ޕޮއިންޓުގެ ފަރަގެކެވެ.