ކްލަބް ވެލެންސިއާގެ ކެޕްޓަން ޝާފިއު އަހުމަދު (ޝާފީ) އާއި ގައުމީ ޓީމުގެ ކުރީގެ ކުޅުންތެރިޔާ މުޚުތާރު ނަސީރު (ޓޫކިލޯ) އަދި ސްލޮވާކިއާގެ މިޑްފިލްޑާ ވިލިއަން މަކޯ ކްލަބް ގްރީން ސްޓްރީޓާ ގުޅިއްޖެއެވެ.
މުޅިން އަލަށް ފުރަތަމަ ޑިވިޝަނަށް ކޮލިފައިވެ މާލެ ލީގުގެ ދެވަނަ މަގާމު ހޯދައިގެން ޕްރެމިއާ ލީގަށް ކޮލިފައިވެފައިވާ ކްލަބް ގްރީން ސްޓްރީޓުން އަންނަނީ ސްކޮޑް ވަރުގަދަ ކުރުމަށް މަސައްކަތް ކުރަމުންނެވެ.
ކްލަބް ވެލެންސިއާއިން ކެރިއަރު ފެށި ޝާފީ ވަނީ މީގެ ކުރިން ވިކްޓީ އާއި ނިއުރޭޑިއަންޓަށްވެސް ކުޅެފައެވެ. ގައުމީ ޓީމުގައިވެސް މޮޅު ކުޅުމެއް ދައްކަމުން އަންނަ ޝާފީ އަކީ މިހާރު ރާއްޖޭގައު ހުރި އެންމެ އިތުބާރު އެއް ޑިފެންޑަރެވެ.
ގްރީން ސްޓްރީޓާއި ގުޅިފައިވާ މުޚުތާރު ނަސީރު (ޓޫކިލޯ) އަކީ މިހާތަނަށް ރާއްޖޭގައި އުފެދުނު އެންމެ މޮޅު އެއް ވިންގާއެވެ. އެގޮތުން 2008 ވަނަ އަހަރު ސާފް ޗެމްޕިއަންޝިޕް ކާމިޔާބުކޮށް ރާއްޖެއަށް ފުރަތަމަ ފަހަރަށް ފުޓުބޯޅައިން ރަން މެޑަލްއެއް ހޯދައި ދިނުމުގައި ޓޫކިލޯ ވަނީ މުހިންމު ދައުރެއް އަދާކޮށްފައެވެ. އެ ރަން ކާމިޔާބީ ހޯދި ގައުމީ ސްކޮޑުގައި، ޓޫކިލޯ އާއި އެކު، މިހާރު ގްރީން ސްޓްރީޓަށް ކޯޗްކަން ކޮށްދެމުން އަންނަ ސޮބާހް މުހަންމަދު (ސޮބާ) ކުޅެފައި ވާއިރު، ޓޫކިލޯ އަކީ ފައުނަލުގައި އިންޑިއާކޮށް ރަން ގޯލް ޖަހައިދިން ކުޅުންތެރިޔާއެވެ.
ގްރީންއަށް ގެނައި ބިދޭސީ ކުޅުންތެރިޔާ، ސްލޮވާކިއާގެ މިޑްފިލްޑަރު ވިލިއަން މަކޯ ވަނީ މީގެ ކުރިން ސޮބާގެ ކޯޗުކަމުގެ ދަށުގައި ނިއުރޭޑިއަންޓް ސްޕޯޓްސް ކުލަބަށް ކުޅެފައެވެ. މީގެ އިތުރުންވެސް އޭނާ އަކީ އަމިއްލަ ގައުމު، ސްލޮވާކިއާ އަދި ހަންގޭރީގެ ފުރަތަމަ ޑިވިޝަނުގައިވެސް މޮޅު ކުޅުމެއް ދައްކާފައިވާ ތަޖުރިބާކާރު ޑިފެންޑަރެކެވެ.
މި ތިން ކުޅުންތެރިންގެ އިތުރުން ވިކްޓްރީ ސްޕޯޓްސް ކުލަބަށް ކުޅެމުން އައި އުންމީދީ ކުޅުންތެރިޔާ އަލީ ޝާމިޝް (ތޮއްޕެ) ވެސް ވަނީ ވިކްޓްރީ ދޫކޮށް ގްރީން ސްޓްރީޓާއި ގުޅިފައެވެ. މާލެ ލީގުގެ ފުރަތަމަ ކޮޅުގައި ވިކްޓްރީއަށް މޮޅު ކުޅުމެއް ދެއްކި ނަމަވެސް ދެވަނަ ބުރުގައި އަނިޔާގައި ހުރުމުގެ ސަބަބުން ތޮއްޕެއަށް ގިނަ މެޗުތަކުން ފުރުސަތު ލިބިފައެއް ނުވެއެވެ.
ޝާފީ ވެލެންސިއާ ދޫކޮށްލާފައި ވާއިރު، ވެލެންސިއާ އަށް މިފަހަރުގެ ސީޒަން ވަނީ ގާތްގަނޑަކަށް ނިމިފައެވެ. މާލެ ލީގުގެ ގަދަ ހަތަރެއްގައި ނުހިމެނުމުން ދެން އެޓީމަށް ޖެހުނީ ރެލިގޭޝަނުން ސަލާމަތް ވުމަށްޓަކާ މާލެ ލީގުގެ ޕްލޭއޮފްގައި ކުޅޭށެވެ. ނަމަވެސް ދެވަނަ ޑިވިޝަނުގެ ގަދަ ދެޓީމް ކަމަށްވާ ކްލަބް ޒެފްރޯލް އާއި ކުޑަހެންވޭރު ޔުނައިޓެޑް ޕްލޭއޮފްގައި ވާދަ ނުކުރާގޮތަށް ނިންމުމުން އެފްއޭއެމްއިން ވަނީ ޕްލޭއޮފް ކެންސަލް ކޮށްލާފައެވެ. އެހެންކަމުން ވެލެންސީއާގެ އިތުރުން ޔުނައިޓެޑް ވިކްޓްރީ، އީގަލްސް އަދި ވިކްޓްރީއަށްވެސް ވަނީ އަންނަ ސީޒަނުގެ މާލެ ލީގުން ޖާގަ ލިބިފައެވެ. ނަމަވެސް މި ޓީމްތަކުގެ ގިނަ އަދަދެއްގެ ކުޅުންތެރިންތަކެއް އަންނަނީ ކްލަބް ދޫކޮށް ޕްރެމިއާ ލީގުގައި ހިމެނޭ ކްލަބް ތަކާއި ގުޅެމުންނެވެ.
