ބޮބީ ގްރީންއަށް ސޮއިކޮށްފި
ބޮބީ ވަނީ މިދިޔަ ސީޒަނުގައި ނިއުގައި މޮޅު ކުޅުމެއް ދައްކާފައި
ބޮބީ ގްރީންއަށް ސޮއިކުރުމުގެ ތެރެއިން
މިދިޔަ ސީޒަނުގައި ނިއުރޭޑިއަންޓް ސްޕޯޓްސް ކްލަބަށް ކުޅުނު ރިހާމް އަބްދުލްގަނީ (ބޮބީ) ގްރީން ސްޓްރީޓްސްއަށް ސޮއިކޮށްފިއެވެ.
ޓާމިނަލް ކެފޭގައި ބޭއްވި ރަސްމިއްޔާތެއްގައި ބޮބީގެ އިތުރުން ގްރީންއަށް ސޮއިކުރީ އެ ކްލަބަށް ކުރިން ކުޅުނު ތަޖުރިބާކާރު ފޯވާޑް އަހުމަދު ރަޝީދު (އައްމަޑޭ) އެވެ. އަދި އެ ކްލަބުގެ ޑިފެންޑަރު މުހއްމަދު ފަރުހާން (ފަރުއްކޮ) ވަނީ ކްލަބާއެކު ހަދާފައިވާ އެއްބަސްވުން އާކޮށްފައެވެ.
ކްލަބް އީގަލްސްއިން ވިދާލި ބޮބީ ވަނީ މިދިޔަ ސީޒަނުގައި ނިއުއަށް މޮޅު ކުޅުމެއް ދައްކާ ލަނޑުތަކެއްވެސް ކާމިޔާބުކޮށްދީފައެވެ. އޭނާ ވަނީ ގައުމީ ސްކޮޑުގައި ހިމެނި، މެޗުތަކެއްވެސް ކުޅެފައެވެ.
ދިވެހި ފުޓުބޯޅަ ސީޒަން ޖޫން މަހު ފަށާއިރު، ގްރީންއިން ވަނީ އެ ކްލަބު ވަރުގަދަ ކުރުމުގެ ގޮތުން ރާއްޖޭގައި އުފެދުނު އެންމެ މޮޅު ކުޅުންތެރިޔާ އަލީ އަޝްފާގު (ދަގަނޑޭ) ގެ އިތުރުން މުހައްމަދު އުމެއިރުވެސް އެ ކްލަބަށް ގެނެސްފައެވެ. އަދި އެ ކްލަބުގެ ގޯލު ކީޕަރު ލަބާން ޝަރީފްވެސް ވަނީ ކްލަބާއެކު ހަދާފައިވާ އެއްބަސްވުން އާކޮށްފައެވެ.
