ޒުވާން ފޯވާޑް އޮގީ ގްރީންއަށް ސޮއިކޮށްފި

ޒުވާން ފޯވާޑް މުޙައްމަދު ޖައިލަމް (އޮގީ) ކްލަބު ގްރީން ސްޓްރީޓްސްއަށް ސޮއިކޮށްފިއެވެ.

ށ. ފޯކައިދޫ ޓީމަށް ކުޅެމުން އައި ޒުވާން ފޯވާޑް ގްރީންއަށް ބަދަލުވިކަން އެ ކްލަބުން ވަނީ ކަށަވަރުކޮށްދީފައެވެ. އޮގީ ގްރީންއަށް ބަދަލުވީ ތިން އަހަރުގެ އެއްބަސްވުމެއްގެ ދަށުންނެވެ.

މިދިޔަ ސީޒަނުގައި މޮޅު ކުޅުމެއް ދެއްކި އޮގީ ގްރީންއަށް ބަދަލުވިއިރު، މިއީ ކުރިއަށް އޮތް ސީޒަނަށް ގްރީންއަށް ސޮއިކުރި ފުރަތަމަ ކުޅުންތެރިޔާއެވެ.

އދ. ހަންޏާމީދޫއަށް އުފަން އޮގީ ވަނީ އުމުރުން 16 އަހަރުގައި ބީޖީ ސްޕޯޓްސް ކްލަބަށް ކުޅެފައެވެ. އޭނާ ބޮޑަށް ފާހަގަވާން ފެށީ 2018 ވަނަ އަހަރު ދިރާގު ދިވެހި ޕްރިމިއާ ލީގުގައި ށ. ފޯކައިދޫ ޓީމުންނެވެ. އެއާއެކު އެ އަހަރު އޮގީ ވަނީ މޯލްޑިވްސް ފުޓްބޯލް އެވޯޑްސްގައި ހޮވި އެންމެ އުއްމީދީ ފުޓްބޯޅަ ކުޅުންތެރިޔާގެ މަގާމު ހޯދާފައެވެ.

އަދި މިދިޔަ އަހަރު އޮގީ ވަނީ 23 އަހަރުން ދަށުގެ ގައުމީ ފުޓްބޯޅަ ޓީމުގައި ހިމެނި، މިދިޔަ އަހަރުގެ ކުރީކޮޅުގައި އޮތް އޭއެފްސީ 23 އަހަރުން ދަށުގެ މުބާރާތުގެ ކޮލިފައިންގައި ކުޅެފައެވެ. އޭނާ ގައުމީ ސީނިއާ ފުޓްބޯޅަ ޓީމަށް އެންމެ ފުރަތަމަ ނަގާފައިވަނީ މިދިޔަ އަހަރު މޮރިޝަސްގައި އޮތް އިންޑިއަން އޯޝަން އައިލެންޑް ގޭމްސް (އައިއޯއައިޖީ) ށެވެ. އެއަށްފަހު ގައުމީ ސްކޮޑުން ގަވާއިދުން ޖާގަ ހޯދަމުން އައި އޮގީގެ ކަކުލަށް ސީރިއަސް އަނިޔާއެއްވެ އޭނާއަށް މިދިޔަ ސީޒަނުގެ ފަހުކޮޅު ބައެއް މެޗުތައް ވަނީ ގެއްލިފައެވެ.

އޮގީގެ ވާތު ކަކުލަށް އަނިޔާވީ ދިރާގު ދިވެހި ޕްރިމިއާ ލީގުގައި މިދިޔަ އަހަރުގެ ޑިސެމްބަރު މަހުގެ 21 ވަނަ ދުވަހު ކްލަބު އީގަލްސް އަތުން 3-2 އިން ފޯކައިދޫ މޮޅުވި މެޗުގައެވެ. އެ އަނިޔާއާ ގުޅިގެން އޮގީ ވަނީ ކަކުލުގެ އޮޕަރޭޝަނެއް ކޮށްފައެވެ.

ގްރީންއިން ކުރިއަށް އޮތް ސީޒަނަށް އޮގީގެ ސޮއި ހޯދިއިރު، އަންނަ ސީޒަން ޑިސެމްބަރު މަހުގެ ތެރޭގައި ފަށަން ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ން އަންނަނީ މަސައްކަތް ކުރަމުންނެވެ.