ކްލަބް އީގަލްސްއަށް ކުޅެމުން އައި ތަޖުރިބާކާރު މިޑްފިލްޑަރ މުހައްމަދު އާރިފް (ބަކާ) ކްލަބް ގްރީން ސްޓްރީޓްސް އަށް ސޮއިކޮށްފިއެވެ.
ކުރިޔަށް އޮތް ސީޒަނަށް ތައްޔާރުވުމުގެ ގޮތުން ގްރީންއިން އަންނަނީ އެޓީމު ވަރުގަދަކުރުމުގެ ގޮތުން ގިނަ ކުޅުންތެރިންގެ ސޮއި ހޯދަމުންނެވެ. އެގޮތުން އެޓީމުން ވަނީ މިހާތަނަށް ރާއްޖޭގައި އުފެދުނު އެންމެ މޮޅު ކުޅުންތެރިޔާ އަލީ އަޝްފާގު (ދަގަނޑޭ) އާއި މުހައްމަދު އުމެއިރު ވެސް އެޓީމަށް ގެންގޮސްފައެވެ.
ބަކާ ގެނައުމާ އެކު ގްރީންގެ ސްކޮޑު އިތުރަށް ވަރުގަދަވެގެންދާނެއެވެ. ރާއްޖޭގެ ގިނަ ކްލަބްތަކަށް ކުޅެފައިވާ ބަކާ ގްރީންއަށް ބަދަލުވެފައިވާއިރު، އޭނާ މީގެ ކުރިން އެ ކްލަބަށް ކުޅެފައެއް ނުވެއެވެ.
ބަކާ ގްރީންއަށް ބަދަލުވެފައި ވަނީ އޭނާ ހޯދުމަށް ގިނަ ކްލަބްތަކުން ހުށަހަޅަމުން ދަނިކޮށްކަމަށް މައުލޫމާތު ލިބެއެވެ. އަދި އޭނާ ގްރީންއަށް ބަދަލުވީ އެ ކްލަބުން ރަނގަޅު ހުށަހެޅުމެއް ހުށަހެޅުމުން ކަމަށް ވެސް މައުލޫމާތު ލިބެއެވެ.
މީގެ ކުރިން ރާއްޖޭގެ އެންމެ ނަން ހިނގާ ޓީމުތައް ކަމަށްވާ ނިއު ރޭޑިއަންޓް، ވެލެންސިއާ، މާޒިޔާ، ވިކްޓްރީ އަދި ވީބީ ސްޕޯޓްސްއަށް ވެސް ކުޅެފައިވާ ބަކާ ވަނީ ވަނީ މިޔަންމާގެ ކްލަބެއް ކަމަށްވާ ކޭބީޒެޑަށް ވެސް ކުޅެފައެވެ.
