ރާއްޖޭގައި ފުރަތަމަ ފަހަރަށް ފިޝަރީޒް ކޮލެޖެއް ގާއިމުކުރަނީ
މަސްވެރިކަން ޒަމާނީކޮށް، މަސްވެރިންގެ ގަދަރު އުފުލައި، މަސްވެރިކަން ތިޔާގިކުރުމަށް ބޭނުންވާ ކަމަށް ރައީސް ވިދާޅުވި
ރައީސް މުއިއްޒު މަސްވެރިންގެ ދުވަހުގެ ޖަލްސާގައި ވާހަކަފުޅުދައްކަވަނީ
ދިވެހިރާއްޖޭގެ ޤައުމީ ޔުނިވަރސިޓީއާ ގުޅިގެން ރާއްޖޭގައި ފުރަތަމަ ފަހަރަށް ފިޝަރީޒް ކޮލެޖެއް ގާއިމުކުރުމުގެ މަސައްކަތް ކުރައްވަމުން ގެންދަވާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވިދާޅުވެއްޖެއެވެ.
އެމަނިކުފާނު މިފަދައިން ވިދާޅުވީ 43 ވަނަ މަސްވެރިންގެ ދުވަހުގެ މުނާސަބަތުގައި އާދީއްތަ ދުވަހުގެ ރޭ ދަރުބާރުގައި ބޭއްވި ހާއްސަ ހަފްލާގައި ވާހަކަފުޅު ދައްކަވަމުންނެވެ. އެމަނިކުފާނު ވިދާޅުވީ މަސްވެރިކަމަކީ ޤައުމު ބިނާ ކުރުމަށްޓަކައި ކުރެވޭ މުހިންމު ޖިހާދެއް ކަމުގައި ގަބޫލުކުރައްވާ ކަމަށެވެ. އެގޮތުން އިލްމާއި ހުނަރު ލިބިފައިވާ ދިވެހި ދަރިންނަކީ ދިވެހި މަސްވެރިކަމުގެ ސަބަބުން އުފެދުނު އިލްމުވެރިކަން އެމަނިކުފާނު ފާހަގަކުރެއްވިއެވެ.
ރައީސް ވިދާޅުވީ އިގްތިސާދީ، އިންސާނީ އަދި އެ މަސައްކަތުގެ ސަބަބުން ދަސްވާ ދިރިއުޅުމުގެ ހުނަރާއި އަޚްލާގާއި މަސައްކަތްތެރިކަމަށްޓަކައި މަސްވެރިކަމަކީ އެ މަސައްކަތަކަށް ސަރުކާރުން ވަރަށް ތޫނު ލޮލެއް ދޭން ޖެހޭ މަސައްކަތެއްކަމަށެވެ. އަދި މަސްވެރިންނަކީ ގައުމީ ފެންވަރުގައި މުހިންމު ބައެއްކަން ގަބޫލުފުޅުކުރައްވާތީ އެމަނިކުފަނުގެ މެނިފެސްޓޯގައި މަސްވެރިންނަށް ހާއްސަ އިސްކަމެއް ދެއްވާފައިވާނެ ކަމަށާއި ސަރުކާރު ހިންގުމާއި ސިޔާސަތުތައް ކަނޑައަޅައި ތަންފީޒު ކުރުމުގައި މަސްވެރިންގެ ލާބައާއި މަންފާއަށް ސަމާލުކަން ދެއްވާނެ ކަމަށް ވެސް ވިދާޅުވިއެވެ.
ރައީސް އިތުރަށް ވިދާޅުވީ މަސްވެރިކަން ޒަމާނީކޮށް، މަސްވެރިންގެ ގަދަރު އުފުލައި، މަސްވެރިކަން ތިޔާގިކުރުމަކީ އެމަނިކުފާނު ބޭނުންފުޅުވާ ކަމެއް ކަމަށެވެ. އެކަމަށްޓަކައި މަސްވެރިކަން އިލްމުވެރިކުރުން އެއީ ބޭނުންތެރި ކަމެއް ކަމުގައި ދެކެވަޑައިގަންނަވާ ކަމަށް ވެސް ރައީސް ވިދާޅުވިއެވެ.
މި ސަރުކާރު ފަށައިގެން ތިން ހަފުތާ ވެފައިވާއިރު އެ ތިން ހަފުތާގައި މަސްވެރިންނަށް ވެވަޑައިގެންފައިވާ ވައުދުފުޅުތަކަށް އިސްކަން ދެއްވާފައިވާ ކަމަށް ރައީސް ވިދާޅުވިއެވެ. އެގޮތުން އެންމެ ފުރަތަމަ އެމަނިކުފާނު ކުރެއްވި ރަސްމީ ދަތުރުފުޅުގައި ވެސް ދިވެހި މަސްވެރިކަމަށް ލާބައާއި މަންފާ ހޯދޭނެ ގޮތްތައް ފަހިކުރުމަށް މަސައްކަތް ކުރެއްވިކަން އެމަނިކުފާނު ފާހަގަކުރެއްވިއެވެ.
މީގެ އިތުރުން އެމަނިކުފާުގެ ކެބިނެޓުން އެންމެ ފުރަތަމަ ކަންތައްތަކެއްގެ ގޮތުގައި ވެސް ނިންމެވީ މަސްވެރިކަމާ ގުޅިފައިވާ ކަންތައްތަކެއް ކަމަށް ރައީސް ފާހަގަކުރެއްވިއެވެ.
