ރައީސް ޔާމީން ޕީއެންއެފަށް ސޮއިކުރައްވައިފި
ރައީސް ޔާމީން ޕީއެންއެފަށް ސޮއިކުރެއްވީ ޕީއެންއެފް އޮފީހުގައި އޮތް ރަސްމިއްޔާތެއްގައި
ރައީސް ޔާމީން ޕީއެންއެފަށް ސޮއިކުރެއްވުން
ކުރީގެ ރައީސް އަބްދުﷲ ޔާމީން އަބްދުލް ގައްޔޫމް ޕީޕަލްސް ނޭޝަނަލް ފްރޮންޓް (ޕީއެންއެފް)އަށް ސޮއިކުރައްވައިފިއެވެ.
އެމަނިކުފާނު އެ ޕާޓީގެ މެމްބަރަކަށް ވެވަޑައިގަތުމަށްޓަކައި ސޮއިކުރެއްވީ، އާދިއްތަ ދުވަހު ރޭ ޕީއެންއެފް އޮފީހުގައި އޮތް ހަރަކާތެއްގައެވެ.
ރައީސް ޔާމީންގެ ފޯމާ ހަވާލުވެެވަޑައިގަތީ، ޕީއެންއެފް އުފެއްދުމުގައި އެންމެ އިސްކޮށް ހަރަކާތްތެރިވެވަޑައިގަންނަވާ ބޭފުޅުންގެ ތެރޭގައި ހިމެނޭ، ކުރީގެ މިނިސްޓަރު މަލީހް ޖަމާލެވެ.
މި ހަރަކާތުގައި، ޏ. ފުވައްމުލަކުން ޕީއެންއެފާ ގުޅުނު މީހުންގެ ފޯމްތައްވެސް ވަނީ އެމަނިކުފާނަށް އަރުވާފައެވެ. އެ ފޯމްތައް ރައީސް ޔާމީން އަތްޕުޅަށް އެރުވީ އެމަނިކުފާނުގެ ގާނޫނީ ވަކީލުންގެ ޓީމުގައި ކުރިން ހުންނެވި އާދަމް އާސިފެވެ.
ރައީސް ޔާމީން އުފައްދަވާ ޕީޕަލްސް ނޭޝަނަލް ފްރޮންޓް (ޕީއެންއެފް) އުފެއްދުމަށް 3،000 މެމްބަރުންގެ ފޯމު މިހާރުވެސް ހަމަކުރެވިފައި ވާކަމަށާއި، މިހާރު ކުރެވެމުންދަނީ އިލެކްޝަންސް ކޮމިޝަނަށް އެ ފޯމުތައް ހުށަހެޅުމުގެ މަސައްކަތް ކަމަށް މަލީހު ވަނީ މީގެކުރިން ވިދާޅުވެފައެވެ. މަލީހު ވިދާޅުވީ ޕާޓީ އުފެއްދުމަށް ބޭނުންވާ އަދަދަށް ފޯމުތައް ހަމަކުރެވިފައިވާ ކަމަށާއި، މިހާރު ކުރިއަށް ދަނީ އިލެކްޝަންސަށް ހުށަހެޅުމަށްޓަކައި އެ ފޯމުތައް ވެރިފައިކުރުމުގެ މަސައްކަތް ކަމަށެވެ.
