މި ސަރުކާރާ ޔަހޫދީ ދައުލަތުގެ އިސް ފަރާތްތަކާ ގޮތް ނޭނގޭ ގުޅުމެއް އޮވޭ: ރައީސް ޔާމީން
އެގޮތުން އިނގިރޭސިވިލާތުގައި ހުންނަވާ ދިވެހި ރާއްޖޭގެ އެމްބެސެޑަރު އިރުތިޝާމް އާދަމް، އިސްރާއީލްގެ ސަފީރާ އެކު އުޅުއްވާ ކަމަށް ރައީސް ޔާމީން ވިދާޅުވި
ކުރީގެ ރައީސް އަބްދުﷲ ޔާމީން ޕީއެންއެފްގެ ޖަލްސާގައި
ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒުގެ ސަރުކާރާއި، ޔަހޫދީ ދައުލަތުގެ އިސް ފަރާތްތަކާ ދެމެދު ގޮތް ނޭނގޭ ގުޅުމެއް އޮންނަ ކަމަށް ކުރީގެ ރައީސް ޢަބްދުﷲ ޔާމީން ޢަބްދުލް ޤައްޔޫމް ވިދާޅުވެއްޖެ އެވެ.
ރައީސް ޔާމީން މިހެން ވިދާޅުވީ، އެމަނިކުފާނުގެ ޕާޓީ، ޕީޕަލްސް ނެޝަނަލް ފްރޮންޓް (ޕީއެންއެފް) އިން ބޭއްވި ޖަލްސާއެއްގައި ވާހަކަ ދައްކަވަމުންނެވެ.
އެގޮތުން ރައީސް ޔާމީން ވިދާޅުވީ، މި ސަރުކާރުން އުޅެނީ ދިވެހި ރާއްޖޭގެ ވަރަށް ކާމިޔާބު ޚާރިޖީ ސިޔާސަތެއް އޮވެގެން ކަމަށެވެ. އަދި އެއް އަހަރަށް ފަހު ނަމަވެސް އިސްރާއީލް ޕާސްޕޯޓު މަނާ ކުރުމަކީ، ޚާރިޖީ ދާއިރާ އިން ހޯދުނު ވަރަށް ބޮޑު ކާމިޔާބެއް ކަމަށް ރައީސް މުޢިއްޒު ވިދާޅުވެފައިވާކަން ފާހަގަ ކުރެއްވި އެވެ.
އެހެން ނަމަވެސް، އިސްރާއީލްގެ ޕާސްޕޯޓު މަނާ ކުރުމަކީ ކިހާ ވަރަކުން ކުރެވުނު ކަމެއްކަން އިނގޭނީ ރާއްޖޭގައި ދިރިއުޅޭ ރައްޔިތުންނަށް ކަމަށް ވެސް އެމަނިކުފާނު ވިދާޅުވި އެވެ.
ރައީސް ޔާމީން ވިދާޅުވީ، ރައީސް މުޢިއްޒު އާއި ސަރުކާރުން ބޭނުންވީމަ އެންމެ ހައެއްކަ ގަޑިއިރުގެ ތެރޭގައި ޤާނޫނު އަސާސީ އެއްކޮޅުން އަނެއްކޮޅަށް ބަދަލުކޮށްލާ ކަމަށެވެ. އަދި ސުޕްރީމް ކޯޓުގެ ފަނޑިޔާރުން "ނަގައި އެއްލާލަންވީމާ" ނަގަނީ ދެ ތިން މިނެޓު ކަމަށް ވެސް އެމަނިކުފާނު ވިދާޅުވި އެވެ. އެކަމުގައި އިޖުރާއަތެއް ނުވަތަ އެހެން އެއްވެސް ކަމެއް ބެއްލެވުމެއް ވެސް ނޯންނަ ކަމަށް ވިދާޅުވި އެވެ.
އެކަން ފާހަގަ ކުރައްވައި ރައީސް ޔާމީން ވިދާޅުވީ، މިއަދުގެ ސަރުކާރާއި ޔަހޫދީ ދައުލަތުގެ އިސްވެރިންނާ ދެމެދު ގޮތް ނޭނގޭ ގުޅުންތަކެއް އޮންނަ ކަމަށް މީގެ ކުރިން ވެސް ޝައްކު ކުރެވުނު ކަމަށެވެ.
އެގޮތުން އިނގިރޭސިވިލާތުގައި ހުންނަވާ ދިވެހި ރާއްޖޭގެ އެމްބެސެޑަރު އިރުތިޝާމް އާދަމް، އިސްރާއީލްގެ ސަފީރާ އެކު އުޅުއްވާ ކަމަށް ރައީސް ޔާމީން ވިދާޅުވި އެވެ. އެގޮތުން އިރުތިޝާމް އިސްރާއީލްގެ ސަފީރާ ވެސް ބައްދަލު ކުރައްވައި އުޅުއްވަނީ، "ލައިފް އިސް ނޯމަލް" ގޮތެއްގައި ކަމަށް ރައީސް ޔާމީން ވިދާޅުވެ އެވެ.
އަޅުގަނޑުމެންގެ މުނާފިޤުކަން، ދެ ފުށް ދެ ގޮތް ހުންނަކަން މި ދެންނެވީ މިކަމުގައި. އެހެންވީމަ، ކުރިން ވެސް އަޅުގަނޑު ތުހުމަތު ކުރިން، ޝައްކު ކުރިން މި ބޭފުޅުންނާ ކޮންމެ ވެސް ކަަހަލަ ގޮތް ނޭނގޭ ގުޅުންތަކެއް ޔަހޫދީ ދައުލަތުގެ އިސް ފަރާތްތަކާ އެބަ އޮތޭ. އިހަށް ދުވަހު އިނގިރޭސިވިލާތުގައި އިރުތިޝާމް، އަޅުގަނޑުމެންގެ އެމްބެސެޑަރު އެތާ ހުންނަވައި. އިސްރާއީލްގެ ސަފީރާ އެކީ މި އުޅުއްވަނީ. ބައްދަލު ކުރައްވައި، ކަންތައްތަކެއް ކުރައްވައި، ހަމަ އޭޒް ލައިފް އިޒް ނޯމަލް އިނގޭތޯ.ޢަބްދުﷲ ޔާމީން ޢަބްދުލް ޤައްޔޫމް / ކުރީގެ ރައީސުލްޖުމްހޫރިއްޔާ
މި ސަރުކާރު ވެރިކަމަށް އައިއިރު، އެންމެ ބޮޑަށް ދެއްކި އެއް ވާހަކަ އަކީ އިސްރާއީލްގެ ޕާސްޕޯޓު މަނާ ކުރުމުގެ ވާހަކަ އެވެ. އެހެން ނަމަވެސް، މި ސަރުކާރުން އިސްރާއީލްގެ ޕާސްޕޯޓު މަނާ ކޮށްފައި ވަނީ އާންމު ރައްޔިތުންގެ ތެރެއިން ގިނަ ބައެއްގެ ޕްރެޝަރު ބޮޑުވުމުންނެވެ.
މެއި މަހު ރައީސް މުޢިއްޒު ބޭއްވި ނޫސްވެރިންގެ ބައްދަލުވުމުގައި ވިދާޅުވެފައި ވަނީ، އިސްރާއީލްގެ ޕާސްޕޯޓު މަނާ ކުރުމަކީ މި ސަރާކާރުގެ ޚާރިޖީ ސިޔާސަތުގެ ފުރިހަމަކަމެއް ކަމަށެވެ.
ގަލޮޅު ދެކުނު ދާއިރާގެ މެމްބަރު މީކާއީލް އަޙުމަދު ނަސީމް ހުށަހެޅުއްވި އިސްރާއީލް ޕާސްޕޯޓުގެ ބިލުގައި ހިމަނާފައި ވަނީ، އިސްރާއީލް ޕާސްޕޯޓު މަނާކޮށް، އިސްރާއީލް ޕާސްޕޯޓާ އެކު ޑުއަލް ޕާސްޕޯޓު ގެން ގުޅޭ މީހުންނަށް ވެސް ރާއްޖެ ނާދެވޭ ގޮތް ހެދުމަށެވެ.
ރައްޔިތުންގެ މަޖިލީހުން އެ ބިލު ފާސް ކުރި އިރު، އިސްރާއީލް ޕާސްޕޯޓު އޮންނަ މީހަކަށް ވިޔަސް، އެހެން ޕާސްޕޯޓެއް ދައްކައިފި ނަމަ ރާއްޖޭ އެތެރެ ވެވޭނެ އެވެ. އަދި އިސްރާއީލުން ދެމުން އަންނަ ހަމަލާތައް ހުއްޓާލައިފި ނަމަ. އިސްރާއީލްގެ ކޮންމެ މީހަކަށް ވެސް ރާއްޖެ އާދެވޭނެ ކަމަށް ބިލުގައި ވަނީ ބުނެފަ އެވެ.
