އީރާންގެ ހިއުމަންރައިޓްސް އެކްޓިވިސްޓް މަހްސާ އަމީނީގެ ޝަރަފްގައި ދޭ އެވޯޑެއްބަލާ އޭނާގެ އާއިލާ ފްރާންސް އަށް ދިއުމަށް އެއާޕޯޓްގައި ތިއްބާ ހުއްޓުވައިފިއެވެ. އަމީނީގެ މަންމައާއި ބައްޕަ އަދި ބޭބެ އެއާޕޯޓްގައި ތިއްބާ އެމީހުންގެ ޕާސްޕޯޓް އަތުލާ ފްލައިޓަށް އެރުން ހުއްޓުވާފައިވާކަމަށް އެމީހުންގެ ލޯޔަރު ބުނެފައި ވެއެވެ.
އަމީނީގެ އާއިލާއިން ދަތުރު ކުރަން އުޅުނީ އަމީނީގެ ހިތްވަރު ފާހަގަކޮށް ދޭގޮތަށް ހަމަޖެހިފައިވާ އީޔޫގެ "ސަޚަރޯވް ޕްރައިޒް" ބަލައި ފްރާންސްގެ ސްޓްރަސްބަރގް އަށް ދިއުމަށެވެ. ލޯޔަރު ބުނެފައިވަނީ އެއާއިލާގެ ވިސާގެ ކަންކަންވެސް ފުރިހަމަ ކޮށްފައި ހުރުމާއެކުވެސް ހިފަހައްޓާފައިވާ ކަމަށެވެ.
މަހްސާއަމީނީ ވަނީ ފުލުހުންގެ ހައްޔަރުގައި ހުއްޓާ މިދިޔަ އަހަރުގެ ސެޕްޓެމްބަރު މަހުގެ 16 ވަނަ ދުވަހު މަރުވެފައެވެ. އެއާއެކު އީރާންގައި މިއިން ޒަމާނަކު ފެނިފައިނުވާފަދަ، ސަރުކާރާ ދެކޮޅު މުޒާހަރާތައް ފެށިގެން ގޮސްފައި ވެއެވެ. މަހްސާ ހައްޔަރު ކުރީ ބުރުގާ އަޅާފަ ހުރީ ރަގަޅަށް ނޫން ކަމަށް ބުނެ އީރާންގެ މޯރަލިޓީ ފުލުހުންނެވެ. މަންޒަރު ދުށްމީހުންނާ ހަވާލާދީ ލިބުނު ޚަބަރުތައް ބުނާ ގޮތުން ހައްޔަރު ކުރުމަށްފަހު މަހްސާއަށް ފުލުހުން ވަރަށް އަނިޔާ ކުރިއެވެ. އަދި މަރުވެފައިވަނީ ބޮލަށް ލިބުނު އަނިޔާގެ ސަބަބުންނެވެ. ނަމަވެސް ފުލުހުން ބުނެފައިވަނީ އޭނާ މަރުވީ ކުއްލި ހާޓް އެޓެކްއެއްޖެހިގެން ކަމުގައެވެ.
އަމީނީ ދުނިޔޭގައި ނެތް ނަމަވެސް އީޔޫއިންދޭ އެންމެ މަތީ ހިއުމަންރައިޓްސް ޕްރައިސް މިއަހަރު ދޭނީ މަހްސާ އަމީނީ އަދި އީރާންގެ ހިތްވަރުގަދަ އަންހެނުންނަށް ކަމަށް އޮކްޓޯބަރުމަހު އީޔޫއިން އިއުލާން ކޮށްފައި ވެއެވެ.
މަހްސާ އަމީނީގެ އާއިލާ އީރާން ސަރުކާރުން ހިފަހައްޓާފައިވާތީ އެކަމާ ޔޫރަޕިއަން ޕާލަމެންޓް ގެ ރައީސް ވަނީ ކަންބޮޑުވުން ފާޅު ކުރައްވާ އެނިންމުން ބަދަލުކޮށް އެމީހުންނަށް ފުރޭނެ ގޮތް ހަދާދިނުމަށް ގޮވާލައްވާފައެވެ. އަދި އަންގާރަ ދުވަހު ސްޓްރަސްބަރގް ގައި އޮންނަ އެވޯޑް ދިނުމުގެ ހަފްލާ ގައި އީރާންގެ އެހެންވެސް ބައެއްހިއްވަރުގަދަ އަންހެނުންނާއެކު އެއާއިލާ ތިބެންޖެހޭނެ ކަމަށް ވިދާޅުވެފައި ވެއެވެ.
