އިންސާނީ ހައްގުތަކަށް މަސައްކަތްކުރި ޗައިނާގެ އެންމެ މަޝްހޫރު އެކްޓިވިސްޓް ޝިއާބޯ އަވަހާރަވެއްޖެ

ނޮބެލް އިނާމް ލިބިވަޑައިގެންފައިވާ އަދި އިންސާނީ ހައްގުތަކަށާއި ޑެމޮކްރަސީއަށް މަސައްކަތް ކުރި ޗައިނާގެ އެންމެ މަޝްހޫރު އެކްޓިވިސްޓް ލިއު ޝިއާ ބޯ އުމުރުން 61 އަހަރުފުޅުގައި އަވަހާރަވެއްޖެއެވެ.

އަވަހާރަވީއިރު އޭނާ ގެންދެވީ ޗައިނާގެ އިރުއުތުރުގެ ހޮސްޕިޓަލެއްގައި ފުރަމޭގެ ކެންސަރަށް ފަރުވާ ހޯއްދަވަމުންނެވެ.

"ސަރުކާރު" ބަދަލް ކުރަން އުޅުމުގެ ކުށުގައި 11 އަަހަރުގެ ޖަލުހުކުމެއް ތަންފީޒުކުރަމުން ދިއަ ޝިއާބޯ ހޮސްޕިޓަލަށް ގެންގޮސްފައިވަނީ މިދިއަ މަހުއެވެ.

ޔުނިވާސިޓީ ޕްރޮފެސަަރެއްގެ ގޮތުގައި އުޅުއްވުމަށްފަހު ހައްގުތަކަށް މަސައްކަތް ކުރައްވަން ފެއްޓެވުމަށްފަހު ވަރުބަލިކަމެއް ނެތި މަސައްކަތް ކުރައްވަމުން ގެންދެވި ޝިއާބޯއަކީ ކުށްވެރިއެއްކަމަށް ދައްކައި ތަކުރާރުކޮށް އެތައް ފަހަރެއްގެ މަތީންވަނީ ޖަލަށްލާފައެވެ.

ޖަލުގައި ނެތް ދުވަސްވަރުތަކުގައިވެސް އޭނާގެ މައްޗަށް ވަނީ ހަރުކަށި އުސޫލުތަކެއް ކަނޑައަޅާ ކަންތައްތަކެއް މަނާކޮށްފައެވެ. އަދި އޭނާގެ އަނބިކަނބަލުން ހުންނެވީ ގޭ ބަންދުގައެވެ.

ޝިއަބޯއަށް 2009 ގައި ހުކުމް ކުރެވުނު އިރު އޭގެ އެއް އަހަރު ފަހުން ނޮބެލް ސުލްހައިގެ އިނާމު އޭނާއަށް ވަނީ ލިބިވަޑައިގެންފައެވެ. ޝިއަބޯ ގެ މައްޗަށް ދައުވާ ކުރެވުނީ ޑިމޮކްރަސީ އާއި އިންސާނީ ހައްގުތައް ޗައިނާގައި ދިރުވުމަށް އެދި ގޮވާލާ ލިޔުންތަކެއް ލިޔެ، ބަހުމުގެ ސަބަބުންނެވެ.

މެއި 23 ގައި ޝިއަބޯއަށް މޭގެ ކެންސަރު ޖެހިފައިވާކަމަށް އެނގުނުއިރު ޝިއަބޯގެ މައްޗަށް ކުރެވުނު ހުކުމުގައި ބާކީ ދެން އޮތީ ތިން އަހަރެވެ.

ޖަލު ބަންދުގައި ހުރުމުގެ ސަބަބުން ޝިއަބޯއަށް ލިބުނު ނޯބެލް ސުލްހައިގެ އިނާމު ބަލާ އޭނާއަށް ވަޑައިގެންނެވިފައިނުވާއިރު ރިޕޯޓުތައް ބުނާ ގޮތުން އޭނާއަށް އިނާމާ އެކު ލިބުނު 1.4 މިިލިއަން ޑޮަލަރުގެ ފައިސާވެސް ހޯއްދަވާފައެއް ނުވެއެވެ.