ރައީސް އޮބާމާ އާއިލާއެކު އިންޑޮނީޝިއާގައި ޗުއްޓީ ހޭދަކުރައްވަނީ

އެމެރިކާގެ ކުރީގެ ރައީސް ބަރަކް އޮބާމާ އެމަނިކުފާނުގެ އާއިލާއާ އެކު އިންޑޮނީޝިއާގައި ޗުއްޓީ ހޭދަ ކުރައްވަމުން އެެބަ ގެންދަވައެެވެ.

ޖާވާގައި ހުންނަ ގަދީމީ ބުޑިސްޓް ފައްޅިއަށް ބުދަ ދުވަހު ވަޑައިގެންނެވުމުގެ ކުރިން އަނބިކަނބަލުންނާ ދެ ދަރިކަނބަލުންނާ އެކު ވަޑައިގެންފައި ވަނީ ރިޒޯޓް ރަށެއް ކަމަަށްވާ ބާލީއަށެވެ.

އޮބާމާއަކީ އިންޑޮނީޝިއާގައި މަގުބޫލު ފަރާތަކަށްވާއިރު ޗުއްޓީ ދަތުރުފުޅަށް މީޑިއާގެ ސަމާލުކަން ވަނީ ލިބިގެން ގޮސްފައެވެ.

އޮބާމާ ވަނީ އެމަނިކުފާނުގެ ތުއްޕުޅުއިރު އިންޑޮނީޝިއާގައި ހަތަރު އަހަރު ހޭދަ ކުރައްވާފައެވެ. ކެންޔާއަށް ނިސްބަތްވެ ވަޑައިގަންނަވާ އެެމަނިކުފާނުގެ ބައްޕާފުޅު ވަރިކުރެއްވުމުން މަންމާފުޅު ދެން ކައިވެނި ބައްލަވައިގެންނެވީ އިންޑޮނީޝިއާގެ ރައްޔިތަކާއެވެ. އެހެން ކަމުން ދޮންބައްޕާފުޅުގެ އަރިހުގައި އުމުރުން ހަ އަހަރުން ފެށިގެން 10 އަހަރު ވަންދެން ދިރިއުޅުއްވީ އިންޑޮނީޝިއާގައެވެ.

އިންޑޮނީޝިއާ ދޫކުރައްވާ ވަޑައިގަތުމަށް ފަހު ދެން އެ މަނިކުފާނު އެ ގައުމަށް ވަޑައިގަތީ 2010 ވަނަ އަހަރު އެމެރިކާގެ ރައީސްގެ ގޮތުގައި އަނބިކަނބަލުންނާ އެކުއެވެ.

މި ފަހަރުގެ ދަތުރުފުޅުގައި ދެ ދަރިކަނބަލުން ކަމަށްވާ މަލައިއާ އަދި ސާޝާ ބައިވެރިވެ ވަޑައިގަންނަވައެވެ.

މި ދަތުރުފުޅުގައި އިންޑޮނޭޝިއާގެ ވެރިރަށް ޖަކާޓާގައި ރައީސް ޖޯކޯ ވިޑޯޑޯއާ ހުކުރު ދުވަހު ބައްދަލުކުރެއްވުމަށް ވަނީ ހަމަޖެހިފައެވެ. މި ބައްދަލުކުރެއްވުން އޮަންނާނީ ރައީސްގެ ގެކޮޅުގައެވެ.

އޮބާމާގެ އާއިލާ ޖަކާޓާއަށް ވަޑައިގަންނަވާނީ ހޮނިހިރު ދުވަހުއެވެ.