ބަހްރައިންގެ މަޝްހޫރު އެކްޓިވިސްޓް ނަބީލް ރަޖަބަށް ބޭސްފަރުވާ ފޯރުކޮށްދޭން ޖެހޭ: މަދަނީ ޖަމިއްޔާތައް

ބަހްރައިން އިންސާނީ ހައްގުތަކަށް މަސައްކަތްކުރާ މަޝްހޫރު އެކްޓިވިސްޓް ނަބީލް ރަޖަބުގެ ސިއްހީ ހާލަތު ގޯސްވަމުންދާ ކަމަށާއި އޭނާއަށް ބޭސްފަރުވާ ފޯރުކޮށްދޭން ޖެހޭ ކަމަށް އިންސާނީ ހައްގުތަކަށް މަސައްކަތް ކުރާ ގްރޫޕްތަކުން ބުނެފިއެވެ.

އިންސާނީ ހައްގުތަކަށް މަސައްކަތް ކުރާ 63 މުއައްސަސާއަކުން ސޮއިކޮށް ނެރެފައިވާ ބަޔާނެއްގައި ބުނީ ބަހްރައިންގެ ސަރުކާރުން ނަބީލް ރަޖަބަށް ބޭސްފަރުވާ ލިއްބައި ނުދޭކަމުގެ ހެކި އެބަހުރި ކަމަށާއި "މިކަންކަން ސަރުކާރުން ކުރަނީ އޭނާގެ ސަލާމަތައް ނުރައްކާކުރުމަށް" ކަމަށެވެ.

ބަހްރައިންގެ ސަރުކާރުން ވަނީ ނަބީލް ރަޖަބު ނޫނަސް "އެހެނިހެން ވެސް އެކްޓިވިސްޓުންނަށް "ބޭސްފަރުވާ ލިއްބައިނުދީ ކަމަށާއި، ނޫނީ ޖަލަށްލުން އަދި އަނިޔާކުރުން ފަދަ ކަމެއް ކޮށްފައި ކަމަށެވެ."

އިންސާނީ ހައްގުތަކަށް މަސައްކަތްކުރާ ފަރާތްތަކުން ނަބީލް ރަޖަބަށް ސިއްހީ ފަރުވާ ފޯރުކޮށްދިނުމަށް އެދުނުއިރު، އެ ފަރާތްތަކުން ނެރުނު ބަޔާން ޝާއިއުކޮށްފައި "އިންޓަނޭޝަނަލް ފެޑެރޭޝަން ފޯ ހިއުމަން ރައިޓްސް، (އެފްއައިޑީއެޗް)" ގެ ވެބްސައިޓުގައެވެ. އެފްއައިޑީއެޗް އަކީ 112 ގައުމެއްގެ 184 މުއައްސަސާއެއްގެ މައްޗަށް ހިމެނޭ މަދަނީ ޖަމިއްޔާއެކެވެ.

ނަބީލް ރަޖަބާ ބެހޭ ގޮތުން އެފްއައިޑީއެޗްގެ ރައީސް ޑިމިޓްރިސް ކްރިސްޓޮޕިއުލޮސް ވިދާޅުވީ "ނަބީލް ރަޖަބުގެ ސިއްހީ ހާލުކޮޅާ މެދު ނުހަނު ކަންބޮޑުވެވަޑައިގަންނަވާ ކަމަށާއި އޭނާ މިހާރުން މިހާރަށް ބަންދުން ދޫކޮށްލަން ޖެހޭ ކަމަށެވެ."

2011 ވަނަ އަހަރު ބަހްރައިން ގައި އެގައުމުގެ ސަރުކާރާ ދެކޮޅަށް ކުރެވުނު މުޒާހަރާތަކުގައި ނަބީލް ރަޖަބު ވަރަށް އިސްދައުރެއް އަދާ ކުރިއެވެ. އަދި މިދިޔަ އަހަރު ނަބީލް ރަޖަބުގެ މައްޗަށް ވަނީ "ދޮގު މައުލޫމާތު ފެތުރުމާއި" ގުޅިގެން ދެއަހަރު ދުވަހުގެ ޖަލު ހުކުމެއް އިއްވާފައެވެ.