ސްޕެއިންގެ ބާސެލޯނާ އަށް ކުޅެމުން އަންނަ އުރުގުއޭގެ ޑިފެންޑަރު ރޮނާލްޑް އަރައުހޯއާ ގުޅުވައިގެން ވާހަކަ ދައްކަން ބޭނުން ނުވާ ކަމަށް ބަޔާން މިއުނިކްގެ ކޯޗު ތޯމަސް ޓުޗެލް ބުނެފި އެވެ.

ޓުޗެލް މިހެން ބުނީ އަރައުހޯ ހޯދުމަށް ބަޔާނުން މަސައްކަތް ކުރަމުން އަންނަ ކަމަށް އެކި އެކި މީޑިއާ ތަކުން ރިޕޯޓުކޮށްފައި ވަނިކޮށެވެ. އަރަައުހޯ ހޯދުމަށް އެންމެ ބޮޑަށް މަސައްކަތް ކުރަމުން އަންނަ އެއް ކުލަބަކީ ބަޔާން ކަމަށް މީޑިއާ ތަކުން ވަނީ ރިޕޯޓުކޮށްފަ އެވެ. އެ ކުލަބުން އަރައުހޯ ހޯދުމަށް މަސައްކަތް ކުރަނީ، އެ ޓީމުގެ ކޯޗު ތޯމަސް ޓުޗެލް ބޭނުންވެގެންނެވެ. އެކަމަށް ޓުޗެލް އިންތިހާ އަށް ބާރުއަޅާ ކަމަށް ވެސް ބުނެފައިވެއެވެ.

އެކަމާ ގުޅިގެން ވާހަކަ ދައްކަމުން ޓުޗެލް ބުނީ، އެކަމުގައި އެއްވެސް ސިފައެއްގައި ވާހަކަ ދައްކަން އޭނާ ބޭނުން ނުވާ ކަމަށެވެ. ހަމައެކަނި ދައްކާނީ ބަޔާންގައި ހިމެނޭ އެ ޓީމުގެ ކުޅުންތެރިން ވާހަކަ ކަމަށް ވެސް ޓުޗެލް ވަނީ ބުނެފަ އެވެ. އިތުރަށް އޭނާ ބުނީ އެހެން ކުލަބެއްގެ އެއްބަސްވުމެއްގެ ދަށުގައި ހުންނަ ކުޅުންތެރިން ވާހަކަ ދެއްކުމަކީ އެއްވެސް އިރެއްގައި އޭނާ ކޮށްއުޅޭ ކަމެއް ނޫން ކަމަށެވެ. ނަމަވެސް، ކުލަބުތަކުން ޓީމު ވަރުގަދަ ކުރުމަށް އަބަދު ވެސް މަސައްކަތް ކުރާނެ ކަމަށް އޭނާ ވަނީ ފާހަގަކޮށްފައެވެ.

އުމުރުން 24 އަހަރުގެ ކުޅުންތެރިޔާ ބާސެލޯނާ އަށް ބަދަލުވީ 2018 ވަނަ އަހަރުއެވެ. އެ ފަހަރު އެ ކުލަބާއެކު އޭނާ ސޮއި ކުރީ ފަސް އަހަރު ދުވަހުގެ އެއްބަސްވުމެއްގައެވެ. އޭގެ ފަހުން މިދިޔަ އަހަރު އޭނާ ވަނީ އެ ކުލަބުގެ އެއްބަސްވުން އައު ކޮށްފައެވެ. ބާސެލޯނާ އާއެކު އަރައުހޯ މިހާރު ސޮއި ކޮށްފައިވާ އެއްބަސްވުމުގެ މުއްދަތު ހަމަވާނީ 2026 ވަނަ އަހަރުގެ ޖޫން މަހުގެ ނިޔަލަށެވެ. އެހެން ނަމަވެސް، ބާސެލޯނާ އިން އޭގެ ކުރިން އަރައުހޯގެ އެއްބަސްވުން އައު ކުރުމަށް ހުށަހަޅާނެ ކަމަށް މީޑިއާ ތަކުން ވަނީ ބުނެފައެވެ.

ނަމަވެސް، އަރައުހޯ ދޫކޮށްލަން ބާސެލޯނާ އިން ބޭނުންނުވާކަމަށް ބުނެފައިވެއެވެ. ބާސެލޯނާގެ ކޯޗު ޒަވީ ހެނާންޑޭޒް ދެކޭ ގޮތުގައި އަރައުހޯ އަކީ އެ ޓީމަށް ވަރަށް މުހިންމު ކުޅުންތެރިޔެކެވެ. އަރައުހޯ ވަނީ މިހާތަނަށް ބާސެލޯނާ އަށް ކުޅެދިން 126 މެޗުން އަށް ލަނޑު ޖަހައިފައެވެ. އެ ޓީމާއެކު އޭނާ ވަނީ ތިން ތަށި ކާމިޔާބު ކޮށްފައެވެ. އޭގެ ތެރޭގައި ސްޕެނިޝް ލީގު، ކޮޕާ ޑެލް ރޭ އަދި ސްޕެނިޝް ސުޕަ ކަޕް ހިމެނެއެވެ.