އެމްޑީޕީގެ ސަރުކާރަކީ މަތި ބަރު ސަރުކާރެއް ކަމަށް ބުނެ، ފާޑު ކިޔާފައިވޭ
ކުޅުދުއްފުށި އުތުރު ދާއިރާގެ މެންބަރު ޔާސިރު އަބްދުއްލަތީފު
ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ސަރުކާރު ހިންގުމުގެ ހަރަދުކުޑަ ކުރުމަށް މަސައްކަތް ކުރާ ތަން ނުފެންނަ ކަމަށާއި ފެންނަނީ ކޯޅިކޯޅިއަށް ސްޓޭޓް މިނިސްޓަރުންނާއި ސިޔާސީ މަގާމުތަކަށް ބޭފުޅުން އައްޔަންކުރައްވާ މަންޒަރު ކަމަށް ކުޅުދުއްފުށި އުތުރު ދާއިރާގެ މެންބަރު ޔާސިރު އަބްދުއްލަތީފު ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި މެންބަރު ޔާސިރު ވިދާޅުވީ ކުރީގެ ރައީސް އިބްރާހީމް މުހައްމަދު ސާލިހުގެ ސަރުކާރުގެ ހަރަދު ވަރަށް ބޮޑު ކަމަށާއި، އެމްޑީޕީގެ ސަރުކާރަކީ މަތި ބަރު ސަރުކާރެއް ކަމަށް ވިދާޅުވެ ވަރަށް ބޮޑަށް ޕީޕީއެމް/ޕީއެންސީގެ އިސް ބޭފުޅުން ފާޑު ވިދާޅުވެފައިވާ ކަމަށެވެ.
މެންބަރު ޔާސިރު ވިދާޅުވީ ރައީސް މުއިއްޒު ވެރިކަމަށް ވަޑައިގެންނެވީ ވެސް ސަރުކާރު ހިންގުމުގެ ހަރަދު ކުޑަކުރައްވާނެ ކަމުގެ ވައުދުފުޅާއެކު ކަމަށެވެ. ނަމަވެސް އެ މަންޒަރު ފެނިވަޑައިނުގަންނަވާ ކަމަށާއި އެގޮތަށް އަމަލުނުކުރައްވާކަން ހާމަވަމުންދާ ކަމަށް މެންބަރު ޔާސިރު ވިދާޅުވިއެވެ. އެގޮތުން ކޯޅިކޯޅިއަށް ސްޓޭޓް މިނިސްޓަރުން އައްޔަން ކުރެއްވުމާއި ސިޔާސީ މަގާމުތަކަށް ބޭފުޅުން ހަމަޖެއްސެވުމާއި ކުންފުނިތަކުން މުސާރަ ސިއްރުކުރުމަށްފަހު މުވައްޒަފުން ނަގަމުންދާ ކަމަށް މެންބަރު ޔާސިރު ވިދާޅުވިއެވެ.
މީގެ އިތުރުން މެންބަރު ޔާސިރުގެ ވާހަކަފުޅުގައި ވަނީ މުލިއާގެ ޒީނަތްތެރި ކުރުމަށާއި ހުވާކުރެއްވުމުގެ ރަސްމިއްޔާތަށް މިލިއަނުން ހަރަދުކުރެއްވިކަން ފާހަގަކުރައްވާފައެވެ.
ރައީސް އިބްރާހީމް މުހައްމަދު ސާލިހުގެ ސަރުކާރުގައި ހަރަދުކުޑަ ކުރުމަށް ބައެއް މަސައްކަތްތައް ކޮށްފައިވާކަން ފާހަގަކުރައްވައި މެންބަރު ޔާސިރު ވިދާޅުވީ ކަރަންޓު، ތެޔޮ އަދި ކާޑުން ސަބްސިޑީ އިން ބޮޑު ހޭދައެއް ކުރާ ކަމަށާއި އެފަދަ ސަބްސިޑީ ހަރަދުތައް ކުޑަކުރުމަށް ކުރަންޖެހޭ ހުރިހާ މަސައްކަތެއްކޮށްފައިވާ ކަމަށެވެ. ނަމަވެސް މިކަން އައު ސަރުކާރުން ކުރާނެ ކަމާއިމެދު ސުވާލު އުފެދިފައިވާ ކަމަށް މެންބަރު ޔާސިރު ވިދާޅުވިއެވެ. މެންބަރު ޔާސިރު ވިދާޅުވީ އާސަންދަ ރީފޯމް ކުރުމުގެ މަސައްކަތް ވެސް އެމްޑީޕީގެ ސަރުކާރުގައި ކޮށްފައިވާ ކަމަށާއި، 2023 ގައި އާސަންދަ ރީފޯމް ކޮށްގެން 492 މިލިއަން ރުފިޔާގެ ހަރަދު ކުޑަކުރެވޭނެ ކަމަށް ބަޖެޓްގައި އަންދާޒާކޮށްފައި އެބައޮތް ކަމަށެވެ. އަދި ވިދާޅުވީ މިކަންކަން ތަންފީޒުނުކޮށްފިނަމަ ބަޖެޓަށް ވަރަށް ބުރަވާނެ ކަމަށެވެ.
