ޔާސިރު ގޮވާލެއްވީ ސިޔާސީ މީހުންގެ މުސާރަކުޑަކޮށް، ކުރީގެ މެމްބަރުންނަށް ދޭ އިންޝުއަރެންސް ވެސް މިވަގުތު ކަނޑާލުމަށް
28 ޖޫން 2024 | ހުކުރު 14:40ސަރުކާރުގެ ރިކަރަންޓް ޚަރަދު ކުޑަކުރުމަށް އެކި ފިޔަވަޅުތައް އެޅުން ހިމެނޭ ކަމަށް ސަރުކާރުން ބުނޭ
ކުޅުދުއްފުށީ އުތުރު ދާއިރާގެ ކުރީގެ މެމްބަރު ޔާސިލް އަބްދުއް ލަތީފް ފަލަ ސުރުހީ ޕްރޮގްރާމްގައި ވާހަކަދައްކަވަނީ
އިގްތިސާދީ ގޮތުން ޚަރަދުކުޑަ ކުރުމަށް ސިޔާސީ މީހުންގެ މުސާރަކުޑަކޮށް، ކުރީގެ މެމްބަރުންނަށް ދޭ އިންޝުއަރެންސް ވެސް މިވަގުތު ކަނޑާލުމަށް ރައްޔިތުންގެ މަޖިލީހުގެ ކުޅުދުއްފުށީ އުތުރު ދާއިރާގެ ކުރީގެ މެމްބަރު ޔާސިލް އަބްދުއް ލަތީފް ވިދާޅުވެއްޖެއެވެ.
އޭނާ އެފަދައިން ވިދާޅުވީ ރާއްޖެޓީވީގެ ފަލަސުރުޙީ ޕްރޮގްރާމްގައި ވާހަކަދައްކަވަމުންނެވެ.
ޔާސިރު ވަނީ ދައުލަތުގެ ޚަރަދު ކުޑަކުރަން ގިނަ ފިޔަވަޅު ތަކެއް އަޅުއްވަން ރައީސް ޑރ. މުހައްމަދު މުއިއްޒު ނިންމަވާފައިވާކަން ފާހަގަކުރައްވާފައެވެ. އެގޮތުން ސަރުކާރުގެ ރިކަރަންޓް ޚަރަދު ކުޑަކުރުމަށް އެކި ފިޔަވަޅުތައް އެޅުން ހިމެނޭ ކަމަށް ރައީސް ޑރ. މުއިއްޒު ވިދާޅުވެފައިވާ އިރު މިހާރު އެ ވާހަކަތައް ދައްކަމުން ދަނީ އިގްތިސާދު ދަމަހައްޓަން އެ ނޫން ގޮތެއް ނެތްކަން ޔަޤީންވުމުން ކަމަށް ޔާސިރު ވިދާޅުވިއެވެ. ނަމަވެސް އިދިކޮޅު ފަރާތްތަކުން އައީ މި ސަރުކާރުން އިޤްތިސާދަށް ދޭން ޖެހޭ ސަމާލުކަން ނުދޭތީ އެކަމާއި ދެކޮޅަށް ވަކާލާތުކުރަމުން ކަމަށް ޔާސިރު ވިދާޅުވިއެވެ. އަދި ޚަރަދުތައް ކުޑަ ކުރާ ނަމަ އެކަން ފަށަން ވާނީ ސިޔާސީ މީހުންނާއި ހަމައިން ކަމަށް ޔާސިރު ވިދާޅުވިއެވެ. މި ވަގުތު ރައްޔިތުންނަށް ނުލިބޭ އިންޝުއަރެންސް އެއް އިނާޔަތެއް ކުރީގެ މެމްބަރުންނަށް ވެސް ލިބެން ޖެހޭ ކަމަށް ޤަބޫލު ނުކުރައްވާ ކަމަށް ޔާސިރު ވަނީ ވިދާޅުވެފައެވެ.
މި ސަރުކާރަށް އިގްތިސާދު ދަމަހައްޓަން ރަނގަޅު ނިންމުންތަކެއް ނިންމަން ނޭނގުނު ކަމަށް ޔާސިރު ވިދާޅުވިއެވެ. މިއަދު ފެންނަނީ އެކަމުގެ ނަތީޖާ ކަމަށާއި ރާއްޖޭގެ އިގްތިސާދު ދަށް ވަނީ ކުރީ ސަރުކާރުގެ ސަބަބުން ކަމަށް ބުނުމުގެ ފުރުސަތު ނެތް ކަމަށް ޔާސިރު ވަނީ ވިދާޅުވެފައެވެ. މީގެ އިތުރުން ރައްޔިތުންގެ އަތުން ނަގާ ޓެކްސް ބޮޑުކުރުމަކީ ވަރަށް ބޮޑު ދަތިކަމަކަށް ވާނެ ކަމަށް އޭނާ ވަނީ ވިދާޅުވެފައެވެ.
ސަރުކާރުން ޚަރަދުކުޑަކުރަން ނިންމާފައިވާ ކަންކަން ހާމަކުރައްވަމުން ރައީސް މުއިއްޒު ވަނީ ސިޔާސީ މަޤާމުތަކުގެ އަދަދު މަދުކުރުމާއި، އެކި މުނާސަބަތުތަކުގައި ބާއްވާ ޙަފްލާތަކަށް ކުރާ ޚަރަދުތައް ކުޑަކުރުން ނުވަތަ ނުބޭއްވުމަށް ނިންމާފައިވާ ކަަމަށް ވިދާޅުވެފައެވެ. މީގެ އިތުރުން ޚަރަދު ކުޑަކުރުމަށް ބޮޑެތި ފިޔަވަޅުތަކެއް އަޅާނެ ކަަމަށް ސަރުކާރުން ވަނީ ބުނެފައެވެ.
