ފްލެޓާއި ގޯތީގެ މައްސަލައިގައި އަމަލުކުރަމުންދާ ގޮތުން ފެންނަނީ ސަރުކާރުގެ ހާމަކަން ބޮޑުކަމެއް ނެތްކަން: ޔާސިރު
29 ޖޫން 2024 | ހޮނިހިރު 09:29ރައްޔިތުންގެ އެއް ކަންބޮޑުވުމަކަށް އޮތީ މިދިޔަ ސަރުކާރުން ދޫކޮށްފައިވާ ފްލެޓުތަކަށް ވާނެ ގޮތަކާއިމެދު
ކުޅުދުއްފުށީ އުތުރު ދާއިރާގެ ކުރީގެ މެމްބަރު ޔާސިރު އަބްދުލް ލަތީފް
ފްލެޓާއި ގޯތީގެ މައްސަލައިގައި ސަރުކާރުގެ ހާމަކަން ބޮޑުކަމެއް ނެތްކަން ދޭހަވަމުންދާކަމަށް ކުޅުދުއްފުށީ އުތުރު ދާއިރާގެ ކުރީގެ މެމްބަރު ޔާސިރު އަބްދުލް ލަތީފް ވިދާޅުވެއްޖެއެވެ.
ރާއްޖެޓީވީގެ ފަލަސުރުޙީ ޕްރޮގްރާމްގައި ވާހަކަ ދައްކަވަމުން ޔާސިރު ވިދާޅުވީ، މިހާރުގެ ރައީސް ޑރ މުޙައްމަދު މުއިއްޒު ހައުސިންގ މިނިސްޓަރު ކަމުގައި ހުންނެވިއިރުވެސް ފްލެޓު ދޫކުރުމުގެ ކަންކަން ދިޔައީ ނުހަނު ހާމަކަން ކުޑަކޮށްކަން އެއީ ފެންނަން އޮތް ހަގީގަތެއް ކަމަށެވެ.
އޭގެ އިތުރުން، ރިޔާސީ އިންތިޚާބާއި މަޖިލިސް އިންތިޚާބު ނިމިގެން ދިޔައިރު ރައްޔިތުންގެ އެއް ކަންބޮޑުވުމަކަށް އޮތީ މިދިޔަ ސަރުކާރުން ދޫކޮށްފައިވާ ފްލެޓުތަކަށް ވާނެ ގޮތަކާއިމެދުކަމަށް ޔާސިރު ވިދާޅުވިއެވެ.
ޔާސިރު ވިދާޅުވީ، އޭރު އިންތިޚާބުތަކާ ދިމާކޮށް ދައްކަމުން ދިޔަ ވާހަކަތަކާ ސަރުކާރުން ޚިލާފުވާކަން މިއަދު ރައްޔިތުންނަށްވެސް އެނގެން ޖެހޭ ކަމަށެވެ.
މިއަދު ފްލެޓުތަކާއި ގޯތީގެ މައްސަލައަކީ އިންތިހާ ކަންބޮޑުވުން އެކަމުގައި އޮތް މައްސަލައެއްކަންވެސް ޔާސިރު ފާހަގަ ކުރެއްވިއެވެ.
ފްލެޓު ލިސްޓުގައި މައްސަލަ އުޅޭކަމަށް ބުނެ، މި މައްސަލަ އެންމެ ފުރަތަމަ ތަހުގީގު ކޮށްފައިވަނީ އެންޓި ކޮރަޕްޝަން ކޮމިޝަން (އޭސީސީ) އިންނެވެ.
އެގޮތުން އެ ލިސްޓުން ޝަރުތު ހަމަވަނީ ގާތްގަޑަކަށް އެންމެ 20 އިންސައްތަ ފޯމުގައި ކަމަށް އޭސީސީން ބުނެފައިވެއެވެ. މައްސަލައެއް ނެތް ފަރާތްތަކަށް ފްލެޓުތައް ދޫކުރުމުގެ މަސައްކަތްތައް ކުރިއަށް ގެންދިއުމަށް ހައުސިންގ މިނިސްޓްރީއާ އޭރު ހަވާލުކޮށްފައިވެއެވެ. ނަމަވެސް އެ މަސައްކަތް މިނިސްޓްރީން ކުރިއަށް ނުގެންގޮސް ސަރުކާރުން ވަނީ ފްލެޓު ކޮމިޓީއެއް އުފައްދާފައެވެ. ފްލެޓުތައް ދޫކުރަމުންދާނީ އެ ކޮމިޓީން މައްސަލަ ބެލުމުން ކަމަށް ހައުސިންގ މިނިސްޓްރީން ބުނެއެވެ. ފްލެޓުތައް ދޫކޮށް، ލިސްޓު ނޭރޭނެ އިރަކާއި، މަސައްކަތް ގޮސްފައިވާ ހިސާބު ބަލަން ގިނަ ބަޔަކު ބޭނުންވެއެވެ.
