ފްރޭންކްފާޓް އަތުން ބަޔާނަށް ލަދުވެތި ބައްޔެއް

ޖަރުމަނު ލީގުގައި އައިންޓްރަކްޓް ފްރޭންކްފާޓާ ދެކޮޅަށް ކުޅުނު މެޗުން، ލަދުވެތި ގޮތަކަށް ޗެމްޕިއަން ބަޔާން މިއުނިކް ބަލިވެއްޖެއެވެ.

ލީގުގައި ހޮނިހިރު ދުވަހުގެ ރޭ ފްރޭންކްފާޓްގެ ދަނޑުގައި ކުޅުނު މެޗުގައި އެ ޓީމުން ބަޔާންގެ މައްޗަށް ކުރި ހޯދީ 5-1 އިންނެވެ. މިއީ މި ސީޒަންގެ ޖަރުމަނު ލީގުގައި ބަޔާން ބަލިވި ފުރަތަމަ މެޗެވެ.

މެޗު ފަށައިގެން 12 ވަނަ މިނެޓުގައި ފްރޭންކްފާޓުން ވަނީ ލަނޑު ޖަހައި ލީޑު ނަގައިފަ އެވެ. އެ ޓީމަށް ލީޑު ނަގައިދިނީ އޮމަރް މާމޮޝް އެވެ. އޭގެ ފަހުން މެޗުގެ 31 ވަނަ މިނެޓުގައި އެރިކް އެބިމްބޭ ވަނީ ފްރޭންކްފާޓްގެ ދެ ވަނަ ލަނޑު ޖަހައިފަ އެވެ. އޭގެ މިނެޓެއް ފަސް މިނެޓު ފަހުން ފްރޭންކްފާޓުން މެޗުގެ ތިން ވަނަ ލަނޑު ޖަހައި، ފުރިހަމަ ކޮންޓްރޯލެއް ހޯދިއެވެ. އެ ލަނޑު އެ ޓީމަށް ޖަހައިދިނީ ހޫގޯ ލާސަން އެވެ. ފުރަތަމަ ހާފުގެ ފުރިހަމަ ވަގުތު ހަމަވާން މިނެޓަކަށްވެފައި ވަނިކޮށް، ބަޔާންގެ ހަމައެކަނި ލަނޑު ޔޯސުއާ ކިމިކް ޖެހީ ލެރޯއީ ސާނޭ ތަނަވަސްކޮށްދިން ފުރުސަތެއްގައެވެ. ދެ ވަނަ ހާފު ފަށައިގެން ފަސް ވަނަ މިނެޓުގައި އެބިމްބޭ ވަނީ ފްރޭންކްފާޓްގެ ހަތަރު ވަނަ ލަނޑު ޖަހައިފައެވެ. އެ ޓީމުގެ ފަހު ލަނޑު، 60 ވަނަ މިނެޓުގައި ޖެހީ އަންސްގާ ނައުފްއެވެ.

ބައްޔާއެކު، ލީގު ތާވަލްގެ އެއް ވަނައިގައި އޮތް ބަޔާ ލެވަކޫސަނާ އަރާ ހަމަކުރަން ލިބުނު ފުރުސަތު ބަޔާނުން ވަނީ ނަގާލައިފައެވެ. މިހާތަނަށް ކުޅުނު 13 މެޗުން ބަޔާނަށް ލިބެނީ 32 ޕޮއިންޓެވެ. ހަމަ އެ އަދަދަށް މެޗު ކުޅެގެން އެއް ވަނައިގައި ލެވަކޫސަން އޮތީ 35 ޕޮއިންޓާއެކު އެވެ. ލީގުގައި އާދީއްތަ ދުވަހުގެ ރޭ ސްޓަޓްގާޓާ ދެކޮޅަށް ކުޅޭ މެޗުން މޮޅުވެ، ލީޑު ފުޅާ ކުރުމުގެ ފުރުސަތު ލެވަކޫސަނަށް އޮންނާނެއެވެ.