ހަނގުރާމައިގައި 5000ށް ވުރެ ގިނަ އިސްރާއީލު ސިފައިން ޒަޚަމްވެފައިވޭ، %58 ސިފައިންނަށް ވަނީ ސީރިއަސް އަނިޔާތައް ލިބިފައި

ޣައްޒާ ހިފުމަށް އިސްރާއީލުން އޮކްޓޯބަރ މަހުގެ 7 ވަނަ ދުވަހުން ފެށިގެން ކުރިޔަށްގެންދާ ހަނގުރާމައިގައި މިހާތަނަށް އިސްރާއީލުގެ 5000ށް ވުރެ ގިނަ ސިފައިންނަށް އެކި ވަރުގެ ޒަޚަމްތައް ލިބިފައިވާކަމަށް އިސްރާއީލުގެ ޑިފެންސް މިނިސްޓްރީ އާ ހަވާލާދީ އިސްރާއީލުގެ މީޑިޔާތަކުން ރިޕޯޓްކޮށްފިއެވެ.

އިސްރާއީލުގެ ނޫހަކުން ހޮނިހިރު ދުވަހު ހާމަކޮށްފައިވާ ގޮތުގައި އިސްރާއީލުގެ ޑިފެންސް މިނިސްޓްރީން މިހާތަނަށް އާންމުކޮށްފައިވާ ރަސްމީ މައުލޫމާތަށް ބަލާއިރު މީގެތެރެއިން 2000ށް ވުރެ ގިނަ ސިފައިންނަށް ލިބުނު ޒަޚަމްތަކުގެ ސަބަބުން ވަނީ ނުކުޅެދޭ ހާލަތަށް ގޮސްފައެވެ. އަދި 58 އިންސައްތައަށް ވުރެ ގިނަ ސިފައިންގެ އަތާ ފައި ވަނީ ވަރަށް ބޮޑަށް ޒަޚަމްވެފައެވެ. އަދި އެކަމުގެ ސަބަބުން އެމީހުން ގެ އަތާއި ފައި ވަނީ ބުރިކޮށްލަންޖެހިފައެވެ.

ނޫހުގައި ރިޕޯޓް ކޮށްފައިވާ ގޮތުގައި 5000ށް ވުރެ ގިނަ ސިފައިންނަށް އެކި ވަރުގެ ޒަޚަމްތައް ލިބިގެން ވަނީ އިސްރާއީލުގެ ހޮސްޕިޓަލުތަކަށް ގެންގޮސްފައެވެ. އެނޫހާ ވާހަކަދައްކަމުން އިސްރާއީލު ޑިފެންސް ރިހެބިލިޓޭޝަން ޑިޕާޓްމަންޓްގެ ޑެޕިޔުޓީ ޑިރެކްޓަރ ޖެނެރަލް ލިމޯރ ލުރިއަޔާރ ބުނީ މިއީ އިސްރާއީލު ސިފައިން މީގެކުރިން ދުވަހަކުވެސް ތަޖުރިބާކޮށްފައި ނުވާކަމެއްކަމަށެވެ.

އިސްރާއީލު އަސްކަރިއްޔާއިން ބުނާގޮތުގައި އޮކްޓޯބަރ މަހުގެ 7 ވަނަ ދުވަހުގެ ފަހުން މަދުވެގެން 420 އިސްރާއީލު ސިފައިން ވަނީ މަރުވެފައެވެ.

އިސްރާއީލުން ޣައްޒާ ހިފުމަށް ކުރަމުންދާ ހަނގުރާމަ ފަށާފައިވަނީ އޮކްޓޯބަރ މަހުގެ 7 ވަނަ ދުވަހު ހަމާސްގެ މުޖާހިދުން ކުއްލި ގޮތަކަށް އިސްރާއީލަށް ހަމަލާދީ 1200ށް ވުރެ ގިނަ މީހުން މަރާލުމާއި ގުޅިގެންނެވެ. މިހަމަލާތައް 7 ދުވަހުގެ މުއްދަތަށް ދެ ފަރާތުން އެއްބަސްވެގެން މެދުކަނޑާލިއިރު އަލުން ހަމަލާތައް ދޭން ފަށާފައިވަނީ ޑިސެމްބަރ މަހުގެ 1 ވަނަ ދުވަހުއެވެ. އޭގެފަހުން އިސްރާއީލުން ވަނީ ކުރިޔަށްވުރެ ހަމަލާތައް ވަރުގަދަކޮށްފައެވެ.

އިސްރާއީލުން ޣައްޒާއަށް ދެމުންދާ ހަމަލާތަކުގައި ފަލަސްތީނުގެ 17000ށް ވުރެ ގިނަ މީހުންގެ ފުރާނަ ވަނީ ގެއްލިފައެވެ. އަދި 46،000ށް ވުރެ ގިނަ މީހުންނަށް އެކި ވަރުގެ އަނިޔާތައް ލިބިފައިވާއިރު އެތައް ހާސް ބަޔަކު އަދިވެސް ވަނީ އިމާރާތްތަކުގެ ދަށުގައެވެ. އިސްރާއީލުން އަންނަނީ މުޅި ޣައްޒާއަށް ހަމަލާދީ ޣައްޒާގެ މުޅި އިންފްރާސްޓްރަކްޗަރ ހަލާކުކޮށްލަމުންނެވެ.