ހަނގުރާމަ ހުއްޓާލުމަށް ގޮވާލައި، އދ.ގެ ސަލާމަތީ މަޖިލީހުން ފާސްކުރަން އުޅުނު ޤަރާރު އެމެރިކާއިން ވީޓޯކުރުމުން، ފަލަސްޠީނުގެ އޮފިޝަލުން ފާޑުކިޔައިފިއެވެ.
ފަލަސްޠީނުގެ އޮފިޝަލުން ނުރުހުން ފާޅުކޮށް އެމެރިކާއަށް ފާޑުކީ، ޣައްޒާއަށް އިސްރާއީލުން ދެމުންދާ ޙަމަލާތައް މިހާރުން މިހާރަށް ހުއްޓާލުމަށް ގޮވާލައި އދ.ގެ ސަލާމަތީ މަޖިލީހުން ފާސްކުރަން އުޅުނު ޤަރާރަށް ދެކޮޅުހެދި ޤައުމަކީ ހަމައެކަނި އެމެރިކާއަށް ވާތީ ކަމުގައި ރިޕޯޓްތައް ބުނެއެވެ.
ގާތްގަނޑަކަށް ދެ ހަފުތާއެއްހާ ދުވަހުގެ މުއްދަތަށް އިސްރާއީލުން ދެމުން ގެންދާ ޙަމަލާތަކާއި، ފަލަސްޠީނުގެ ރޮކެޓް ހަމަލާތައް ހުއްޓާލުމަށް ގޮވާލާފައިވާ ޑްރާފްޓް ޤަރާރަށް ކައުންސިލްގެ އަޣުލަބިއްޔަތުން ތާއީދުކުރިއެވެ. ނަމަވެސް އެމެރިކާއިން އެ ޤަރާރާ ދެކޮޅުހެދުމުން އެ ޤަރާރުވަނީ ފެއިލްވެފައެވެ. ސަލާމަތީ މަޖިލީހުގައި ޤަރާރާ ދެކޮޅަށް ވޯޓްދިނީ އެމެރިކާ އެކަންޏެވެ.
ފަލަސްޠީނުގެ އދ.ގެ މަންދޫބު ރިޔާޟް މަންޞޫރު ވަނީ، ވީޓޯއަކީ ވަރަށް ނުރައްކާތެރި އަދި ނިކަމެތި ކަމެއް ކަމަށް ވިދާޅުވެ، އިސްރާއީލްގެ އިސްތިޢުމާރީ ބާރުތަކުން، ވަށާލާފައިވާ ޣައްޒާއަށް ބޮން އެޅުމުގެ މަސައްކަތް ހުއްޓުމެއްނެތި ކުރިއަށް ގެންދިއުމަށް އިސްރާއީލަށް އެމެރިކާއިން ޙިމާޔަތް ދީފައިވާކަމަށް ވިދާޅުވެފައެވެ. އަދި އެ ޤަރާރުގެ ޑްރާފްޓް ބަލައިނުގަތުމުގެ ސަބަބުން، ފަލަސްޠީނުގެ އާންމުންނާ ދެކޮޅަށް އިސްރާއީލުން ދެމުންގެންދާ ޙަމަލާތައް ކުރިއަށް ގެންދިއުމަށް ހިތްވަރު ލިބޭކަމަށް އޭނާ ވިދާޅުވިއެވެ.
ސަލާމަތީ މަޖިލީހުގައި ފާސްކުރަން އުޅުނު ޤަރާރަށް އެމެރިކާ ވީޓޯކޮށްފައި މި ވަނީ، އޮކްޓޯބަރު މަހުގެ 7 ވަނަ ދުވަހުން ފެށިގެން ޣައްޒާގައި ހިންގަމުންދާ ލާއިންސާނީ ހަމަނުޖެހުންތަކާ ގުޅިގެން ޣައްޒާގައި މަރުވި މީހުންގެ އަދަދު 17،400އަށްވުރެ މައްޗަށް އަރާފައިވާ ދަނޑިވަޅެއްގައެވެ.
އދ.ގެ ވޯލްޑް ފުޑް ޕްރޮގްރާމްގެ ތަރުޖަމާނަކު ވިދާޅުވީ ހަނގުރާމައިގެ ސަބަބުން 77،000ށްވުރެ ގިނަ ޣައްޒާގެ ރައްޔިތުން ގެދޮރު ގެއްލި، މުޅި ސަރަޙައްދުގައި "ހަލަބޮލިކަމާއި މާޔޫސްކަން" އުފެދިފައިވާ ކަމަށެވެ. އޭނާ ވިދާޅުވިގޮތުގައި ގެދޮރު ގެއްލިފައިވާ އެތައް ބަޔަކު މަގުމަތީގައި ދިރިއުޅެމުން ދަނީ ކާބޯތަކެއްޗާއި ފެނާއި އެހެނިހެން އަސާސީ ވަޞީލަތްތަކާ ނުލައެވެ.
ހަމަނުޖެހުންތައް ނިމުމަކަށް ގެނައުމަށް ބައިނަލްއަޤްވާމީ ޕްރެޝަރު ބޮޑުވެފައިވާ ދަނޑިވަޅެއްގައި ސަލާމަތީ މަޖިލީހުން މިހާރު ދަނީ އިޞްލާޙުކޮށްފައިވާ ޤަރާރަކަށް މަޝްވަރާކުރުމަށް މަސައްކަތް ކުރަމުންނެވެ. ނަމަވެސް އެމެރިކާއިން އެކަމާ ދެކޮޅުހެދުމުން، ޣައްޒާގެ ޙާލަތު ދުވަހެއް ދުވަހަކަށް ގޯސްވަމުން ދިޔަނަމަވެސް، އިސްރާއީލަށް އަވަސް ކާމިޔާބީއެއް ފެންނާކަށް ނެތެވެ.
