"އެކުވެރިން މަރުވެއްޖެ، ކުޅޭނެ އެއްޗެއް ނެތް...އޮތީ ހަމަ އެކަނި ހުސް ވެލިގަނޑެއް": އެންމެ 8 އަހަރުގެ ކުއްޖެއްގެ ޝަކުވާ!

ހުރިހާ ކޮޅަކުން ފިއްތާލާފައި އޮތް ޣައްޒާ ކޮންޓްރޯލް ކުރަމުންދާ ޙަމާސް ޖަމާޢަތުގެ ވަސް، މި ދުނިޔެއިން ނައްތާލާނެ ކަމަށް ބުނެ ޔަހޫދީ އިޒްރޭލުން އެޔެއް މިޔެއް ބެލުމެއް ނެތި ޣައްޒާގައި ހިންގަން ފެށި ނަސްލު ދޮވެލުމުގެ ޤަތުލުޢާންމު، ހަފުތާއެއްހާ ދުވަހަށް މަޑުޖައްސާލުމަށްފަހު އަނެއްކާވެސް ވަރުގަދައަށް ހިންގަން ފެށީ ޑިސެމްބަރ 1 ވަނަ ދުވަހުއެވެ. ހިންދެމިލާނެ އެންމެ ހިނދުކޮޅެއްވެސް ނުލިބި، ޣައްޒާގެ ފަޒާ އަނެއްކާވެސް ޢުދުވާންތަކުގެ ކަޅު އަނދިރި ނާމާންކަމުން ވަށާ ބައްދާލިއެވެ. ނިމުމެއް ނެތް ޙަމަލާތަކުގެ ޝިކާރައަކަށްވެ، މި ދުނިޔެއަށް ފަހު ނޭވާ ދޫކުރަން ޖެހިދާނެ ފަދަ ކޯރެއްގައި ނޭވާ ހާސް ކުރުވަން ފެށިއެވެ. އިންސާނަކަށް ވީތީ ލިބިދޭ ދިރިހުރުމުގެ ޙައްޤުން މަޚްރޫމުކޮށް، ދިރިއުޅުމުގެ އެންމެ އަސާސީ ޙައްޤުތަކުންވެސް މަޚްރޫމު ކޮށްފައި ވާ ޙާލުގައި ގުނަން ދެން ޖެހޭނީ ކިހާ ދުވަހެއް ކަމެއް ނޭނގެއެވެ. ބޯނެ ފެން ފޮދެއް، ކާނެ އެއްޗެއް ޣައްޒާއަކު ނެތެވެ. ނުވިތާކަށް ބޭސްފަރުވާގެ ޚިދުމަތެއްވެސް ނެތެވެ.

ޣައްޒާގެ ދެކުނުގެ ސިޓީއެއް ކަމަށް ވާ ޚާން ޔޫނިސްގެ ރަށްބޭރުގައި އަޅާފައި ހުރި ވަގުތީ ކޭމްޕަކީ ގެދޮރު ގެއްލިފައިވާ 2000 އެއްހާ މީހުންނަށް ޚާއްޞަކޮށްގެން ފަރުމާކޮށްފައި ހުރި ކޭމްޕްއެކެވެ. ނަމަވެސް، އިޒްރޭލުގެ ޢުދުވާންތަކާއެކު، މިއަދު އެތަނުގައި އެކަނިވެސް 8000 މީހުން އެބަ ދިރިއުޅެއެވެ. އަމިއްލަ ގެދޮރު ދޫކޮށް، އެ ޙާލުގައި އުޅުން ނޫން އެހެން ގޮތެއް ނެތީއެވެ. ކޭމްޕު ތެރެއިން ބައްދަލުވާ ކޮންމެ މީހެއްގެ ފަރާތުންވެސް ތަފާތު ވާހަކަތައް އަޑު އިވެއެވެ. އެތައް ވާހަކައެއް ކިޔައިދޭން ބޭނުން ވެފައި ތިބި އެތައް ބަޔަކު އެބަ ތިއްބެވެ. ކޮންމެ މީހެއްގެ ވާހަކައިގައިވެސް ޢާންމު އެއް ކަމެއް އޮވެއެވެ. އެއީ ވޭނާއި ހިތާމައެވެ. ހިތްދަތިކަމާއި ކެކުޅުމެވެ.

ޢުމުރުން 75 އަހަރުގެ މުޚްތާރު ލޫލޫއަކީ ޣައްޒާގެ އުތުރުގައި ފޮތް ފަންސޫރު ވިއްކާ ފިހާރައެއް ހިންގި މީހެކެވެ. ދޮށީ ޢުމުރުގެ ދުވަސްތައް ގުނަމުންދާ މުޚްތާރަކީ ކެންސަރ ޕޭޝަންޓްއެކެވެ. ނަމަވެސް، އޮކްޓޯބަރ 7 ވަނަ ދުވަހު ފެށި ޢުދުވާންތަކާއެކު، އޭނާއަށްވެސް ވަނީ ފަރުވާ ކުރިއަށް ގެންދެވޭ ގޮތް ނުވެފައެވެ.

ޔާމީން ޝަބީރުގެ 3 އަހަރުގެ ދަރިފުޅަށް އެކަށީގެންވާ ޞިއްޙީ ފަރުވާއެއް ދެވޭ ގޮތެއް ނުވެއެވެ. އެ ދަރިފުޅުވެސް ބަލިވެ އުޅޭތާ އެތައް ދުވަހެއް ވެއްޖެއެވެ. އަޅާ ވޭނުން އެ ތުއްތު ކުއްޖާއަށް ކިރިއާ އޮވެލެވޭ ކަމެވެ.

ތުއްތު ޢުމުރުގެ ދުވަސްތައް ދޫކޮށް، ދުނިޔެ ތެރެއަށް ހިސާބަކަށް ލޯ ހުޅުވި، ކަންކަމާ ފިކުރުކޮށް ހަދަން ޢާންމު ގޮތެއްގައި ފަށަނީ ޢުމުރުން 6 ނޫނީ 7 އަހަރަށް އަޅާލުމުންނެވެ. ޢުމުރުން 8 އަހަރުގެ ޣަނީ އަބޫ ތައިމާ، އޭނާގެ ޢާއިލާއާއެކު ކޭމްޕުގައި ވަގުތީ ގޮތުން ހިޔާވަހިކަން ހޯދަމުންދާތާ މިހާރު މަހަކަށް ވުރެ ގިނަ ދުވަސްވެއްޖެއެވެ.

ޑިސެމްބަރ 1 ވަނަ ދުވަހު އިޒްރޭލުގެ ޢުދުވާންތައް އަނެއްކާވެސް އިތުރު ގަދަ ބާރާއެކު ފަށާފައި ވާ އިރު، ކޭމްޕަށް އަންނާނެ މީހުންގެ ޢަދަދު އިތުރުވުން ގާތެވެ. ހުސް އަތާ އައެއް ކަމަކު، ކޮންމެ މީހަކުވެސް އަންނަނީ ފެންކަޅި ކުރުވަނިވި އެތައް ވާހަކައެއް ހިފައިގެންނެވެ. އެ ވާހަކަތައް އަޑު އަހާނެ ކަންފަތްތަކާއި، އެ މަންޒަރުތައް ބަލާނެ ލޯތަށް ދުނިޔޭގެ އެކި ހިސާބުތަކުގައި އެބަ ތިއްބެވެ. ނެތީ، ނިރުބަވެރި ޔަހޫދީންނާއި، އެބައި މީހުންނަށް އެއްބާރުލުން ދޭ އެމެރިކާއާއި ހުޅަނގުގެ ޤައުމުތަކާ ދެކޮޅަށް ބަސް ބުނެ، ފަލަސްޠީނުގެ ރައްޔިތުންނަށް ޙައްޤު މިނިވަންކަން ހޯދައި ދިނުމަށް ޢަމަލީ ގޮތުން މަސައްކަތް ކުރާނެ ބައެކެވެ.

2.3 މިލިއަން މީހުންގެ އާބާދީއެއް އޮތް ޣައްޒާގެ 80 ޕަސެންޓް މީހުންނަކީ މިއަދު ގެދޮރު ނެތް މީހުންނެވެ. މުޅި ޣައްޒާއަށް ބަލާއިރު ސަލާމަތްކަން ކަށަވަރުވާނެ ހަމަ އެންމެ ތަންފުކެއްވެސް ނެތެވެ. އޮކްޓޯބަރ 7 ވަނަ ދުވަހުން ފަށައިގެން އެކަނިވެސް ޔަހޫދީން ވަނީ 1 ލައްކައަށް ވުރެ ގިނަ ރޮކެޓާއި ބޮން، ޣައްޒާއަށް ވައްޓާލާފައެވެ.