ބާސެލޯނާ އިން އެތުލެޓިކޯ ބަލިކޮށްފި

ސްޕެނިޝް ލީގުގައި އެތުލެޓިކޯ މެޑްރިޑާ ދެކޮޅަށް ކުޅުނު މެޗުން އެންމެ ފަހުގެ ޗެމްޕިއަން ބާސެލޯނާ މޮޅުވެއްޖެ އެވެ.

އާދީއްތަ ދުވަހުގެ ރޭ ކުޅުނު މެޗު ބާސެލޯނާ އިން ކާމިޔާބު ކުރީ 1-0 އިންނެވެ. މެޗުން ބާސެލޯނާ މޮޅުވީ ފުރަތަމަ ހާފުގެ 28 ވަނަ މިނެޓުގައި ޕޯޗުގަލްގެ ޔާއޯ ފެލިކްސް ޖެހި ލަނޑުންނެވެ. އެ ލަނޑު އޭނާ ޖެހީ، ބްރެޒިލްގެ ރަފީނިއާ ތަނަވަސްކޮށްދިން ފުރުސަތެއްގަ އެވެ. މިއީ އެތުލެޓިކޯގައި ހުރުމަށްފަހު ލޯނު އެއްބަސްވުމެއްގެ ދަށުން ބާސެލޯނާ އަށް ބަދަލުވި ފެލިކްސް، އެ ޓީމަށް ޖަހައިދިން ފަސް ވަނަ ލަނޑެވެ. ސްޕެނިޝް ލީގުގައި އޭނާ ވަނީ ދެ ލަނޑު ޖަހައިފަ އެވެ. ބާސެލޯނާގައި ފެލިކްސް މޮޅަށް ކުޅެމުން އަންނައިރު، އެ ޓީމުގެ ކޯޗު ޒަވީ ހެނާންޑޭޒް ވަނީ ފެލިކްސްގެ ކުޅުމަށް ވަރަށް ބޮޑަށް ތައުރީފު ކޮށްފަ އެވެ.

މެޗުގައި ބާސެލޯނާ އިން ލީޑު ނެގި ފަހުން އެތުލެޓިކޯ އަށް ވަނީ ލަނޑު ޖަހައި، ނަތިޖާ ހަމަހަމަ ކުރާނެ ރަނގަޅު ފުރުސަތު ވެސް ލިބިފަ އެވެ. ނަމަވެސް އެ ޓީމުގެ މެމްފިސް ޑިޕާއި، އަލްވާރޯ މޮރާޓާ އަށް ލިބުނު ފުރުސަތުތަކުގެ ބޭނުން ކުރެވޭ ގޮތް ވަނީ ނުވެފަ އެވެ. އަނެއްކޮޅުން ބާސެލޯނާ އިން ލީޑު ފުޅާ ކުރުމަށް މަސައްކަތް ކުރިއިރު، އެތުލެޓިކޯގެ ގޯލު ކީޕަރު ވަނީ ރަނގަޅު ސޭވްތަކެއް ވެސް ކޮށްފަ އެވެ.

މޮޅާއެކު ބާސެލޯނާ އޮތީ ލީގު ތާވަލްގެ ތިން ވަނަ މަގާމުގަ އެވެ. އެއީ މިހާތަނަށް ކުޅުނު 15 މެޗުން 34 ޕޮއިންޓު ހޯދައިގެންނެވެ. ހަމަ އެ އަދަަދަށް މެޗު ކުޅެގެން އެތުލެޓިކޯ ހަތަރު ވަނައިގައި އޮތީ 31 ޕޮއިންޓާއެކު އެވެ.