ބްރައިޓަން އަށް ތާރީޚީ ދުވަހެއް، ޔޫރޮޕާ ލީގުގެ ދެވަނަ ބުރަށް!
މިއީ ބްރައިޓަން ޔޫރަޕްގައި ވާދަކުރި ފުރަތަމަ ފަހަރު
މެޗަށްފަހު ބްރައިޓަން ކުޅުންތެރިން އުފާފާޅުކުރަނީ
ބްރައިޓަންއިން ޔޫރަޕްގެ ފުޓްބޯޅައިގައި ތާރީޚީ މޮޅެއް ހޯދާ, ޔޫރޮޕާ ލީގުގެ ދެވަނަ ބުރުން ޖާގައެއް ކަށަވަރުކޮށްފިއެވެ.
ޔޫރަޕްގެ ފުޓްބޯޅައިގައި ވާދަކުރާ ފުރަތަމަ ފަހަރު ބްރައިޓަން އިން ދެވަނަ ބުރު ޔަޤީންކުރީ 1-0 ން އޭއީކޭ އެތެންސް ބަލިކޮށްގެންނެވެ. މިމޮޅާއެކު ބްރައިޓަން އަށް ދެވަނަ ބުރު ޔަޤީންވިއިރު މިވަގުތު އޮތީ ޕޮއިންޓެއްގެ ފަރަގަކާއެކު ދެވަނާގައެވެ. ގްރޫޕްގެ އެއްވަނާގައި އޮތީ 11 ޕޮއިންޓާއެކު މާސޭ އެވެ. ބްރައިޓަން އަށް ލިބިފައިވަނީ ފަސް މެޗުން 10 ޕޮއިންޓެވެ. ގްރޫޕް ސްޓޭޖްގައި ބާކީ އަދި އެއް މެޗު އޮތުމުން ގްރޫޕްގެ އެއްވަނަ ހޯދުމުގެ ފުރުޞަތުވެސް އެބައޮތެވެ. އޭއީކޭ އެތެންސް އަތުން ބްރައިޓަން މޮޅުކޮށްދިން ލަނޑު ޕެނަލްޓީ އަކުން ޖެހީ ޕެޑްރޯ އެވެ.
މެޗަށްފަހު ބްރައިޓަންގެ ކޯޗު ރޮބާޓޯ ޑި ޒާބީ ބުނީ މިއީ ކްލަބަށް ތާރީޚީ ދުވަހެއް ކަމަށެވެ. ކްލަބާއި ސަޕޯޓަރުންނަށްވެސް މިއީ ޚާއްޞަ ދުވަހެއް ކަމަށް މިސީޒަންގައި ބްރައިޓަންއާއެކު ރަނގަޅު މަސައްކަތްތަކެއް ކުރަމުން އަންނަ ކޯޗު ބުންޏެވެ. ވެސްޓް ހޭމް ޔުނައިޓެޑް ވެސް ވަނީ ޔޫރޮޕާ ލީގުގެ ދެވަނަ ބުރު ޔަޤީން ކޮށްފައެވެ.
