ބްރައިޓަން ކައިރިން އާސެނަލް އެއްވަރު
ފުރަތަމަ ދެ މެޗުން އެ ޓީމު މޮޅުވެފައިވާއިރު، ތިން ވަނަ މެޗުން އެއްވަރުވެ ލިބުނު ހަތް ޕޮއިންޓާއެކު އާސެނަލް އޮތީ ދެ ވަނައިގަ އެވެ.
އާސެނަލް އަދި ބްރައިޓަން ކުޅުނު މެޗުގެ ތެރެއިން
އިނގިރޭސި ޕްރިމިއާ ލީގުގައި ބްރައިޓަންއާ ދެކޮޅަށް ކުޅުނު މެޗުން އާސެނަލް އެއްވަރުވެއްޖެ އެވެ.
އާސެނަލްގެ އަމިއްލަ ދަނޑުގައި ހޮނިހިރު ދުވަހުގެ ހަވީރު ކުޅުނު މެޗު އެއްވަރުވީ 1-1 އިންނެވެ. މެޗުގައި އާސެނަލް އިން ފުރަތަމަ ލަނޑު ޖަހައި ލީޑު ނަގާފައި ވަނިކޮށް، ބްރައިޓަން އިން ވަނީ ފަހަތުން އަރައި ނަތީޖާ ހަމަހަމަ ކޮށްފަ އެވެ.
މެޗުގެ ފުރަތަމަ ހާފުގެ 38 ވަނަ މިނެޓުގައި އާސެނަލަށް ލީޑު ނަގައިދިނީ ކައި ހަވާޓްޒް އެވެ. އޭނާ އެ ލަނޑު ޖަހަން ފުރުސަތު ތަނަވަސްކޮށްދިނީ ބުކަޔޯ ސަކާ އެވެ. މެޗުގެ ދެ ވަނަ ހާފުގައި އާސެނަލް އަށް އެންމެ ބޮޑު ގެއްލުމެއް ދެއްކީ، ދެ ވަނަ ރީނދޫ ކާޑާ އެކު ރަތް ކާޑު ދައްކައި، ޑެކްލަން ރައިސް ދަނޑުން ފޮނުވާލުމުންނެވެ. މެޗުގެ ބާކީ ބައި ދިހަ ކުޅުންތެރިންނާ އެކު ކުޅެމުން ދިޔަ އާސެނަލް ކޮޅަށް ބްރައިޓަން އިން ލަނޑު ޖެހީ 58 ވަނަ މިނެޓުގަ އެވެ. ބްރައިޓަންގެ އެ ލަނޑު ޖެހީ ޖޮއާއޯ ޕެޑްރޯ އެވެ.
މިއީ އައު ސީޒަންގެ ލީގުގައި އާސެނަލް އިން ކުޅުނު ތިން ވަނަ މެޗެވެ. ފުރަތަމަ ދެ މެޗުން އެ ޓީމު މޮޅުވެފައިވާއިރު، ތިން ވަނަ މެޗުން އެއްވަރުވެ ލިބުނު ހަތް ޕޮއިންޓާއެކު އާސެނަލް އޮތީ ދެ ވަނައިގަ އެވެ.
