ފަހަތުން އަރައި މޮޅުވެ، ލިވަޕޫލް އެއް ވަނަ އަށް

އިނގިރޭސި ޕްރިމިއާ ލީގުގައި ބްރައިޓަންއާ ދެކޮޅަށް ކުޅުނު މެޗުން މޮޅުވެ، ލިވަޕޫލް އަނެއްކާ ވެސް އެއް ވަނަ އަށް ޖެހިލައިފި އެވެ.

ލިވަޕޫލްގެ އަމިއްލަ ދަނޑު، އެންފީލްޑުގައި ކުޅުނު މެޗު އެ ޓީމުން ކާމިޔާބު ކުރީ 2-1 އިންނެވެ. އެއީ މެޗުގައި ބްރައިޓަން އިން ލަނޑު ޖަހައި ކުރި ހޯދާފައި ވަނިކޮށް ފަހަތުން އަރައި ދެ ލަނޑު ޖަހައިގެންނެވެ. މެޗުގެ ފުރަތަމަ ހާފުގައި ބްރައިޓަން އިން ލިވަޕޫލް ކޮޅަށް ލަނޑު ޖަހައި ލީޑު ނެގި އެވެ. ނަމަވެސް ދެ ވަނަ ހާފުގައި ލިވަޕޫލުން ވަނީ ދެ ލަނޑު ޖަހައިފަ އެވެ.

މެޗު ފަށައިގެން 14 ވަނަ މިނެޓުގައި ބްރައިޓަން އަށް ލީޑު ނަގައިދިނީ ފާޑީ ކަޑިއޯގްލޫ އެވެ. އޭނާ އެ ލަނޑު ޖެހީ ޑެނީ ވެލްބެކް ތަނަވަސްކޮށްދިން ފުރުސަތެއްގަ އެވެ. މެޗުގެ ނަތީޖާ ހަމަހަމަ ކުރަން ލިވަޕޫލުން ކުރި މަސައްކަތް ކާމިޔާބު ކުރެވުނީ 69 ވަނަ މިނެޓުގަ އެވެ. ކެޕްޓަން ވާޖިލް ވެން ޑައިކް ތަނަވަސްކޮށްދިން ފުރުސަތެއްގައި އެ ލަނޑު ޖެހީ ކޯޑީ ގަކްޕޯ އެވެ. އޭގެ ތިން މިނެޓު ފަހުން ލިވަޕޫލްގެ ދެ ވަނަ ލަނޑު ޖެހީ މިޞްރުގެ ފޯވާޑު މުޙައްމަދު ޞަލާޙު އެވެ. އެއީ ކާޓިސް ޖޯންސް ތަނަވަސްކޮށްދިން ފުރުސަތެއްގައި ޞަލާޙު ޖެހި ލަނޑެކެވެ.

މޮޅާއެކު ލިވަޕޫލް އިން ވަނީ އެއް ވަނައިގައި ދެ ޕޮއިންޓުގެ ލީޑެއް ނަގައިފަ އެވެ. މިހާތަނަށް ލީގުގައި ކުޅެފައިވާ 10 މެޗުން ލިވަޕޫލަށް ލިބެނީ 25 ޕޮއިންޓެވެ. އަށް މެޗުން އެ ޓީމު މޮޅުވެފައިވާއިރު، އެއް މެޗު އެއްވަރުވެ އަނެއް މެޗުން ވަނީ ބަލިވެފަ އެވެ. އައު ކޯޗު އާން ސްލޮޓްގެ އިރުޝާދުގެ ދަަށުން ކުޅެމުން އަންނަ ލިވަޕޫލް އިން ރަނގަޅު ނަތީޖާތަކެއް ނެރެމުން އަންނައިރު، އަލުން އެއް ވަަނަ އަށް ޖެހިލެވުނީ ޗެމްޕިއަން މެންޗެސްޓަރ ސިޓީ ބަލިވުމުގެ ފައިދާ އާއެކު އެވެ.