ކަރަބޯ ކަޕްގެ ގަދަ 16 ވަނަ ބުރުގައި ބްރައިޓަންއާ ދެކޮޅަށް ކުޅުނު މެޗުން މޮޅުވެ، އެންމެ ފަހުގެ ޗެމްޕިއަން ލިވަޕޫލް އިން މުބާރާތުގެ ކުއާޓަރ ފައިނަލްގެ ފުރުސަތު ހޯދައިފި އެވެ.

ބްރައިޓަންގެ އަމިއްލަ ދަނޑުގައި ބުދަ ދުވަހުގެ ރޭ ކުޅުނު މެޗު ލިވަޕޫލް އިން ކާމިޔާބު ކުރީ 3-2 އިންނެވެ. މެޗުގައި ދެ ޓީމުގެ ވެސް ލަނޑުތައް ފެނުނީ ފަހު ހާފުގަ އެވެ. މެޗުގެ ފުރަތަމަ ހާފުގައި ލިވަޕޫލް އިން ވަނީ ލަނޑު ޖެހުމަށް ފުރުސަތުތަކެއް ތަނަވަސްކޮށްފަ އެވެ.

މެޗުގެ ދެ ވަނަ ހާފު ފަށައިގެން ފުރަތަމަ މިނެޓުގެ ތެރޭގައި ލިވަޕޫލް އިން ވަނީ ލަނޑު ޖަހައި ލީޑު ނަގައިފަ އެވެ. ޓައިލާ މޯޓަން ތަނަވަސްކޮށްދިން ފުރުސަތެއްގައި އެ ޓީމަށް ލީޑު ނަގައިދިނީ ކޯޑީ ގަކްޕޯ އެވެ. އޭގެ ފަހުން މެޗުގެ 63 ވަނަ މިނެޓުގައި ގަކްޕޯ ވަނީ އިތުރު ލަނޑެއް ޖަހައި ލިވަޕޫލަށް ލީޑު ފުޅާ ކޮށްދީފަ އެވެ.

ބްރައިޓަން އިން ވަނީ މެޗުގެ 81 ވަނަ މިނެޓުގައި ލަނޑެއް ޖަހައި އުންމީދު ހޯދައިފައެވެ. އެ ލަނޑު އެ ޓީމަށް ޖަހައިދިނީ ސިމޮން އަޑިންގްރާ އެވެ. އޭގެ ހަތަރު މިނެޓު ފަހުން ލުއިސް ޑިއާޒް ވަނީ ލިވަޕޫލްގެ ތިން ވަނަ ލަނޑު ޖަހައި، ދެ ލަނޑުގެ ލީޑެއް ހޯދައިދީފަ އެވެ. މެޗުގައި ބްރައިޓަންގެ ދެ ވަނަ ލަނޑު ތޯރިގު ލަމްޕްޓޭ ޖެހީ މެޗުގެ 90 ވަނަ މިނެޓުގަ އެވެެ.

ކަރަބޯ ކަޕްގެ ކުއާޓަރ ފައިނަލް އިން ލިވަޕޫލް ފުރުސަތު ހޯދިއިރު، ކުއާޓާ ފައިނަލްގައި ލިވަޕޫލް ކުޅޭނީ ސައުތެމްޓާންއާ ދެކޮޅަށެވެ. މި ސީޒަނާ ދިމާކޮށް ލިވަޕޫލްގެ ކޯޗުކަމާ ހަވާލުވި އާން ސްލޮޓްގެ އިރުޝާދުގެ ދަށުން އެ ޓީމުން އަންނަނީ ރަނގަޅު ނަތީޖާތަކެއް ނެރެމުންނެވެ.