ޑި ޒާބީ ބުނީ އޭނާ ހުންނާނީ ބްރައިޓަންގައި ކަމަށް

އޭނާ ހުންނަން ބޭނުން ވަނީ ބްރައިޓަންގައި ކަމަށާއި، އެ ކުލަބު ދޫކޮށްލަން ބޭނުންނުވާ ކަމަށް، ރޮބަޓް ޑި ޒާބީ ބުނެފި އެވެ.

އުމުރުން 44 އަހަރުގެ އިޓަލީގެ ކޯޗު މިހެން ބުނީ އޭނާގެ މުސްތަޤުބަލާ ގުޅޭ ގޮތުން ގިނަ ވާހަކަތަކެއް ދެކެވެމުން އަންނަނިކޮށެވެ. އޭނާގެ ހޯދުމުގެ ޝައުޤުވެރިކަން ލިވަޕޫލުން ވަނީ ފާޅުކޮށްފަ އެވެ. އޭރު ވެސް ޑި ޒާބީގެ ކުރިމަގާ ގުޅޭ ގޮތުން ދެކެވެމުން ދިޔަ ވާހަކަތަކަށް އޭނާ ވަކި އެއްޗެއް ނުބުނެ އެވެ.

ޑި ޒާބީ ބުނީ އޭނާ ހުންނާނީ ބްރައިޓަންގައި ކަމަށާއި، އެ ކުލަބުގެ ސަޕޯޓަރުން އަދި ކުޅުންތެރިން ދެކެ އޭނާ ވަރަށް ލޯބިވާ ކަމަށެވެ. ޚާއްސަކޮށް ކުލަބުގެ ވެރިން އޭނާ އަށް ވަރަށް އިޙުތިރާމް ކުރާ ކަމަށާއި، ކުރިއަށް ދިޔުމުގައި އެމީހުންގެ އެހީތެރިކަން އަދި ހިތްވަރު ވަރަށް ބޮޑަށް ލިބޭ ކަމަށް ވެސް އޭނާ ބުންޏެވެ.

މީގެ އިތުރުން އޭނާ ބުނީ، ކުލަބު ދޫނުކުރާނެ ވާހަކަ އާއި، ކުލަބާއެކު ކުރިއަށް ދާނެ ވާހަކަ ސަޕޯޓަރުން އަދި ވެރިންނަށް ވެސް އަންގާފައިވާނެ ކަމަށެވެ. އެ ކުލަބަށް އޮތް ލޯބި ދަމަހައްޓަން ބޭނުންވާ ކަމަށާއި، ކެތްތެރިކަމާއެކު އެންމެން ކުރިއަށް ދިޔުމަކީ އޭނާ ބޭނުންވާ ގޮތް ކަމަށް ވެސް ޑި ޒާބީ ވަނީ ބުނެފަ އެވެ.

ބްރައިޓަންގެ ކޯޗުކަމާ އޭނާ ހަވާލުވީ 2022 ވަނަ އަހަރު އެވެ. އެ ކުލަބާއެކު އޭނާ ސޮއި ކުރި ހަތަރު އަހަރު ދުވަހުގެ އެއްބަސްވުން ހަމަވާނީ 2026 ވަނަ އަހަރުގެ ޖޫން މަހުގެ ނިޔަލަށެވެ. މީޑިއާ ތަކުގައި ބުނެފައިވާ ގޮތުން ބްރައިޓަން އިން ބޭނުން ވަނީ ޑި ޒާބީގެ އެއްބަސްވުން އައުކޮށް، އޭނާ އެކުލަބުގައި ބަހައްޓާށެވެ.