އިނގިރޭސި ޕްރިމިއާ ލީގުގައި ބްރައިޓަންއާ ދެކޮޅަށް ކުޅުނު މެޗުން ވެސް، މެންޗެސްޓަރ ސިޓީ ބަލިވެއްޖެ އެވެ.

ބްރައިޓަންގެ އަމިއްލަ ދަނޑުގައި ކުޅުނު މެޗުގައި އެ ޓީމުން ވަނީ 2-1 އިން ސިޓީގެ މައްޗަށް ކުރި ހޯދައިފަ އެވެ. މެޗުގައި ފުރަތަމަ ލަނޑު ޖަހައި ކުރި ހޯދީ ވެސް ސިޓީ އިންނެވެ. ނަމަވެސް ބްރައިޓަން އިން ވަނީ ފަހަތުން އަރައި ދެ ލަނޑު ޖަަހައިގެން މެޗުން މޮޅުވެފަ އެވެ.

މެޗުގެ ފުރަތަމަ ހާފުގައި ސިޓީ އިން ވަނީ ލަނޑު ޖަހައި ކުރި ހޯދައިފަ އެވެ. އެގޮތުން މެޗުގެ ފުރަތަމަ ހާފުގެ 34 ވަނަ މިނެޓުގައި ސިޓީ އަށް ލީޑު ނަގައިދިނީ ނޯވޭގެ ފޯވާޑު އާލިން ހާލަންޑް އެވެ. އޭނާ އެ ލަނޑު ޖެހީ އޮމަރް މާމޫޝް ތަނަވަސްކޮށްދިން ފުރުސަތެއްގަ އެވެ.

ނަމަވެސް މެޗުގެ ދެ ވަނަ ހާފުގައި ބްރައިޓަން އިން ވަނީ ލަނޑު ޖަހައިގެން ނަތީޖާ ހަމަހަމަ ކޮށްފަ އެވެ. ދެ ވަނަ ހާފުގެ 67 ވަނަ މިނެޓުގައި ބްރައިޓަން އިން ނަތީޖާ ހަމަހަމަ ކުރީ އެ ޓީމަށް ލިބުނު ޕެނަލްޓީ ކާމިޔާބު ކޮށްގެންނެވެ. އެ ޕެނަލްޓީ ކާމިޔާބުކޮށް ބްރައިޓަން އަށް ނަތީޖާ ހަމަހަމަ ކޮށްދިނީ ޖޭމްސް މިލްނާ އެވެ.

އޭގެ ފަހުން މެޗުގައި ސިޓީ އިން ލީޑު ނަގަން މަސައްކަތް ކުރަމުން ދަނިކޮށް، ފަހު ވަގުތުގައި ބްރައިޓަން އިން ވަނީ ދެ ވަނަ ލަނޑެއް ޖަހައިފަ އެވެ. މެޗުގެ ފުރިހަމަ ވަގުތު ހަމަވާން މިނެޓަކަށް ވެފައި ވަނިކޮށް، ބްރައިޓަން އަށް އެ ލަނޑު ޖަހައިދިނީ ބްރަޖަން ގުރުޑާ އެވެ.

އައު ސީޒަންގެ ޕްރިމިއާ ލީގުގައި ސިޓީ އިން ކުޅުނު ފުރަތަމަ މެޗުގައި ވުލްވްސް އަތުން މޮޅުވި ނަމަވެސް، ދެ ވަނަ މެޗުގައި ވަނީ ޓޮޓެންހަމް އަތުން ބަލިވެފަ އެވެ. ތިން ވަނަ މެޗުގައި ބްރައިޓަން އަތުން ބަލިވެފައިވާއިރު، މި ސީޒަން ސިޓީ އިން ފަށަން ޖެހުނީ ދަށްކޮށެވެ.

މެޗަށް ފަހު ވާހަކަ ދައްކަމުން ސިޓީގެ ކޯޗު ޕެޕް ގާޑިއޯލާ ބުނެފައި ވަނީ، ސިޓީ އިން ކުރަމުން އަންނަ ގިނަ ކަންކަމާ މެދު އޭނާ ގަޔާވާ ކަމަށެވެ. އެގޮތުން ޓޮޓެންހަމް މެޗުން ބަލިވި ނަމަވެސް، އެ މެޗުގައި ވެސް ސިޓީ އިން ރަނގަޅު ކަންތައްތަކެއް ކުރި ކަމަށާއި، އެގޮތަށް ބްރައިޓަން މެޗުގައި ވެސް ސިޓީ އިން ރަނގަޅު ކަންތައްތަކެއް ކުރި ކަމަށް ގާޑިއޯލާ ބުންޏެވެ.

އެހެން ނަމަވެސް، ސިޓީ އަށް މެޗުން މޮޅުވުމަށް ލިބުނު ފުރުސަތުގެ ބޭނުން ނުކުރެވުނު ކަމަށާއި، ސިޓީ ކޮޅަށް ލަނޑެއް ވަތް ވަގުތުން ފެށިގެން އެ ޓީމުގެ މަސައްކަތަށް މަޑު ޖެހުމެއް އައި ކަމަަށް ގާޑިއޯލާ ބުންޏެވެ. ބްރައިޓަން އަތުން ބަލިވި ނަމަވެސް ގާޑިއޯލާ ބުނީ، އަދި ކިރިޔާ ސީޒަން ފެށުނީ ކަމަށާއި، ކުރިއަށް އޮތީ ދިގު ދަތުރެއް ކަމަށެވެ.