އަންނަ އަހަރު ޖަނަވަރީ މަހުގެ 13 ވަނަ ދުވަހު ބޭއްވުމަށް ހަމަޖެހިފައިވާ, މާލެ ސިޓީގެ މޭޔަރުކަމުގެ މަގާމަށް، މ. ސީނުކަރަންކާގޭ އަދާމް އާޒިމް ކުރިމަތިލައްވަން ނިންމަވައި، ރައްޔިތުންގެ ތާއީދަށް އެދިވަޑައިގެންފިއެވެ. އާދަމް އާޒިމަކީ ފަހުގެ ތާރީޚެއްގައި ރާއްޖެ ދުށް އެންމެ ގާބިލު އަދި ގިނަ ރައްޔިތުންތަކެއްގެ ލޯތްބާއި އިހުތިރާމް، އަދި ޚާއްސަކޮށް ކަން ކުރައްވާ، ކެރޭ، އަދި ކަންކަން ކުރުމުގެ ވައްޓަފާޅި ހުރި ބޭފުޅެއްގެގޮތުގައި ގިނަބަޔަކު ސިފަކުރައްވާ ބޭފުޅެކެވެ.

ދިވެހިރާއްޖޭގެ އުމްރާނީ ތަރައްގީއާއި ގައުމު ބިނާކުރުމުގައި ހިއްސާވައި މައިގަނޑު އެއް މުއައްސަސާ ކަމުގައިވާ މޯލްޑިވްސް ޓްރާންސްޕޯރޓް އެންޑް ކޮންޓްރެކްޓިންގ ކޮމްޕެނީ ޕލކ (އެމްޓީސީސީ)ގެ މާލިމީއެއްގެ ގޮތުގައި ވޭތުވެ ދިޔަ 4 އަހަރު ހުންނެވި އާދަމް އާޒިމްގެ ތައުލީމީ ހަޔާތްޕުޅަށް ނަޒަރުހިންގާލާއިރު؛ އޭނާ ވަނީ އިނގިރޭސިވިލާތުގެ ނޮޓިނގްހަމް ޔުނިވަރސިޓީން މާސްޓަރސް އޮފް ބިޒްނަސް އިން ފައިނޭންސް، އަދި އިނގިރޭސިވިލާތުގެ ޔުނިވަރސިޓީ އޮފް އީސްޓް ލަންޑަންއިން ބެޗެލަރ އޮފް އާރޓްސް އިން އެކައުންޓިންގ އެންޑް ފައިނޭންސް ޑިގްރީ ހާސިލުކުރައްވާފައެވެ.

ވޭތުވެދިޔަ ވިއްސަކަށް އަހަރުގެ ތެރޭގައި އާދަމް އާޒިމް ވަނީ ރާއްޖޭގެ އެންމެ ބޮޑެތި ކުންފުނިތަކުގެ ތެރޭގައި ހިމެނޭ ކުންފުނިތަކުގެ އިސް މަގާމުތަކެއްގައި ގައުމަށް ޚިދުމަތްކުރައްވާފައެވެ. އެގޮތުން ސްޓޭޓް ޓްރޭޑިންގ އޯގަނައިޒޭޝަން ޕލކ، އަދި މޯލްޑިވްސް ވޯޓަރ އެންޑް ސުވަރޭޖް ކޮމްޕެނީގެ މެނޭޖިންގ ޑިރެކްޓަރުގެ މަގާމާއި، ބޭންކް އޮފް މޯލްޑިވްސްއާއި މޯލްޑިވްސް ސްޓްރަކްޗުރަލް ޕްރޮޑަކްޓްސްގެ ޑިރެކްޓަރުންގެ ބޯޑުގެ މެމްބަރުކަން ވަނީ ކުރައްވާފައެވެ.

އެމްޓީސީސީގެ ދިގު ތާރީޚަށް ބަލާއިރު، މިއަދު އެ ކުންފުނި ދަތުރުކޮށްފައިވާ ހިސާބަށް ގެނެސްދިނުމުގައި އާދަމް އާޒިމްގެ ލީޑަރޝިޕާއި، މަސައްކަތުގެ ރިވެތި އަޚްލާގާއި، މީހުން ބިނާކޮށް ތަމްރީން ކޮށްދިނުމުގެ ހުނަރު ބޮޑު ދައުރެއް އަދާކޮށްފައިވާކަން، މިއަދު އެކުންފުނި ދެކެމުންދާ ކާމިޔާބީ ހެކިވެއެވެ.

4500އަށްވުރެ ގިނަ މުވައްޒަފުން ގޮވައިގެން، ރޭވުންތެރިކަމާއި ވިސްނުންތެރިކަމާއެކު ކުންފުނި ހިންގުމުގެ މޭސްތިރިއަކަށް 2023 ނޮވެމްބަރ 28 ވަނަ ދުވަހާ ހަމައަށް ހުންނެވި އާދަމް އާޒިމް އެކުންފުންޏާ ހަވާލުވެވަޑައިގެން، ނިމިދިޔަ 2020، 2021 އަދި 2022 ވަނަ އަހަރުވެސް ވަނީ، ކުންފުނީގެ ތާރީޚުގައި ރިކޯޑްކުރެވިފައިވާ އެންމެ ރަނގަޅު މާލީ ނަތީޖާ ހޯއްދަވާދެއްވައި، ރާއްޖޭގެ އެފަދަ ދެވަނައެއް ނެތް ނަމޫނާ ކުންފުންޏަކަށް އެކުންފުނި ހައްދަވާދެއްވައި، ރައްޔިތުންގެ ލޯތްބާއި އިތުބާރު ހޯއްދަވާފައެވެ.

އާދަމް އާޒިމަކީ އެކަށައަޅުއްވާ ލަނޑުދަނޑިތަކާއި އިސްތިރާޖީ ރޭވުންތައް، ވަގުތު ޖައްސަވައިގެން ތަންފީޒުކުރައްވާ، އިލްމީ، ކެރޭ އަދި ރައްޔިތުންގެ އަޑުއައްސަވާ ލީޑަރެއްގެގޮތުގައި މުޅި ދިވެހިރާއްޖެ އިއްތިފާގުވާ، ގައުމު ފަޚުރުވެރިވާފަދަ މަސައްކަތްތަކެއް ކޮށްދެއްވާފައިވާ ބޭފުޅެކެވެ. ގިނަ ދިވެހި ރައްޔިތުންގެ ނަޒަރުގައި އާދަމް އާޒިމްގެ "ވާނެ" "ކުރާނެ" މި އެޓިޓިއުޑާއެކު ވެގެންދާނީ ރައްޔިތުންގެ އުއްމީދުތަކުގައި ހަގީގީ ކުލަ ޖައްސަވައިދެއްވާނެ ހަމައެކަނި ބޭފުޅާކަމުގައެވެ.