ޣައްޒާއަށް ބޮޑެތި ބަލިތަކުގެ ނުރައްކާ އެބައޮތް: ޑަބްލިއުއެޗްއޯ

ޣައްޒާގެ ސިއްހީ ނިޒާމު ހަލާކުވެފައިވާއިރު، ޣައްޒާއަށް ބޮޑެތި ބަލިތަކުގެ ނުރައްކާ އެބައޮތްކަމަށް، ދުނިޔޭގެ ސިއްހަތު ޖަމްއިއްޔާ (ޑަބްލިއުއެޗްއޯ)އިން ބުނެފިއެވެ.

ޑަބްލިއުއެޗްއޯއިން ބުނީ، އިސްރާއީލާ ހަމާސްގެ ހަނގުރާމަވެރިންނާ ދެމެދު ހިނގި ހަމަނުޖެހުންތަކާ ގުޅިގެން، ހިފާފައިވާ ފަލަސްތީނުގެ ސަރަހައްދުގެ ސިއްހީ ނިޒާމު މިހާރުން މިހާރަށް ހަމައަކަށް ނޭޅުވިއްޖެނަމަ، ބޮމުގެ ހަމަލާތަކުގެ އަސަރުކޮށްފައިވާ ގިނައަދަދެއްގެ މީހުންނަށް، ދުނިޔެ ދުވަހަކުވެސް ދެކެފައިނުވާފަދަ ނުރައްކާތެރި ބަލިމަޑުކަމަކާ ކުރިމަތިލާން ޖެހިދާނެ ކަމަށެވެ.

ޣައްޒާގެ މައި ހޮސްޕިޓަލް (އައްޝިފާ ހޮސްޕިޓަލް) ސުންނާފަތިކޮށް، ހަލާކުކޮށްލުމަކީ "ހިތާމަވެރި ހާދިސާއެއް" ކަމަށް ސިފަކުރައްވަމުން ޑަބްލިއުއެޗްއޯގެ ތަރުޖަމާނު މާގްރެޓް ހެރިސް ވިދާޅުވީ، މި ސިއްހީ ނިޒާމު އަލުން ހަމައަކަށް ނޭޅުވިއްޖެނަމަ، ބޮމުގެ ހަމަލާގައި މަރުވި މީހުންނަށްވުރެ އޭގެ ފަހުން މަރުވާނެ މީހުން މާ ގިނަވާނެކަމަށެވެ.

މަހަކަށްވުރެ ގިނަ ދުވަހަށް ދިގުދެމިގެންދިޔަ ހަމަނުޖެހުންތަކުގައި ފަލަސްތީނުގެ 15000ށްވުރެ ގިނަ މީހުން މަރުވެ، އާބާދީ ބޮޑު ސަރަހައްދުގެ ސިއްހީ އިންފްރާސްޓްރަކްޗަރަށް ވަނީ ބޮޑެތި ގެއްލުންތަކެއް ލިބިފައެވެ. ކަރަންޓު ކެނޑި، ތެޔޮ ނުލިބި، އަދި އެއްވެސް ވަސީލަތެއް ނެތި، އަދި ގިނަ ހޮސްޕިޓަލްތަކެއްގެ ޚިދުމަތް މެދުކެނޑިފައި ވާއިރު، އިސްރާއީލުގެ ދިފާއީ ބާރުތަކުން ވަނީ ގިނަ ސިއްހީ ހިދުމަތްތެރިންތަކެއް ބަންދުވެސް ކޮށްފައެވެ.

އޭނާ ވިދާޅުވީ މި މައްސަލަތަކަށް ހައްލެއް ނުލިބިއްޖެނަމަ، ސިއްހީ ޚިދުމަތް ނުލިބުމުގެ ސަބަބުން އާންމު ސިއްހަތުގެ ކުއްލި ނުރައްކަލުގެ ހާލަތެއް އުފެދިދާނެކަމަށާއި، ފެނުގެ ޒަރީއާއިން ޖެހޭ ބަލިތަކާއި އިންފެކްޝަންތަކާއި ދާއިމީ ބަލިތަކަށް، 2 މިލިއަން މީހުންގެ އާބާދީގައި ފަރުވާ ނުލިބިދާނެކަމަށެވެ. ތަކުރާރުކޮށް ހިނގަމުންދާ ހަމަނުޖެހުންތަކާއި، މިހާރު ހިނގަމުންދާ ބްލޮކްޑައުންގެ އަސަރުތަކުން އަދިވެސް ޣައްޒާގެ އާންމުން ތިބީ ނުރައްކަލުގެ ތެރޭގައެވެ.

ޑަބްލިއުއެޗްއޯއިން ފަލަސްތީނުގެ ސިއްހަތާބެހޭ ފަރާތްތަކާ ގުޅިގެން، އާންމު ރައްޔިތުންގެ ފުރާނަ ސަލާމަތްކުރުމުގެ މަސައްކަތްތައް ކޯޑިނޭޓްކުރުމުގެ މަސައްކަތް ކުރަމުން އަންނައިރު، އިސްރާއީލުން އެ ސަރަހައްދަށް އަޅާފައިވާ ފިޔަވަޅުތަކުގެ ސަބަބުން އެކަމަށް ހުރަސްއެޅިފައިވާ ޑަބްލިއުއެޗްއޯއިން ބުނެއެވެ.

ޣައްޒާއާއި، ހުޅަނގު އައްސޭރީގެ ސަރަހައްދުގައި މިހާރު ކުރިމަތިވެފައިވާ ނުރައްކާތެރި ހާލަތު ދެމިއޮތްނަމަ، ޒަރޫރީ ސިއްހީ ޚިދުމަތްތައް ހޯދުމުގައި އަދިވެސް މަސްތަކެއް ނުވަތަ އަހަރުތަކެއް ނަގާނެކަމަށް އޭނާ ވިދާޅުވިއެވެ.