2020 އަދި 2021 ވަނަ އަހަރު ޒަކާތު ފަންޑުން މަތީ ތައުލީމް ހާސިލްކުރާ ދަރިވަރުންނަށް 11.9 މިލިއަން ރުފިޔާ ޚަރަދުކޮށްފައިވޭ
ޒަކާތު ފަނޑުން 2020 ވަނަ އަހަރު 13 ދަރިވަރުންނަށް ފައިސާ ދީފައިވޭ
ޒަކާތް ބަލައިގަތުން
2020 އަދި 2021 ވަނަ އަހަރު ޒަކާތު ފަންޑުން މަތީ ތައުލީމް ހާސިލްކުރާ ދަރިވަރުންނަށް 11.9 މިލިއަން ރުފިޔާ ޚަރަދުކޮށްފައިވާކަން އިސްލާމިކް މިނިސްޓްރީން ހާމަކޮށްފިއެވެ.
އިސްލާމިކް މިނިސްޓްރީން އެފަދައިން ބުނެފައި ވަނީ މަޖިލީހުގެ މާފަންނު މެދު ދާއިރާގެ މެންބަރު އިބްރާހީމް ރަޝީދު ކުރެއްވި ސުވާލަށް ކުރީގެ އިސްލާމިކް ޑރ. އަހުމަދު ޒާހިރު އަލީ ދެއްވާފައިވާ ޖަވާބުގައެވެ.
މި ސުވާލަކީ 2022 ވަނަ އަހަރުގެ ސެޕްޓެމްބަރު މަހުގެ 15 ދުވަހު ލިޔުމުން ޖަވާބު ހޯދުމަށް ކުރައްވާފައިވާ ސުވާލެކެވެ.
ޒަކާތު ފަންޑުން ކިޔަވާ ދަރިވަރުންނަށް ޚަރަދުކުރުމަށް ކަނޑައަޅާ ފައިސާ އެ ދަރިވަރުންނާއި ހަވާލުކުރާ ގޮތާއި ބެހޭ ގޮތުން މެންބަރު ވަނީ ސުވާލުކުރައްވާފައެވެ. އަދި އެ ފައިސާގެ ތަފްސީލްތަކަށް ވަނީ އެދިވަޑައިގެންފައެވެ.
ޖަވާބުގައި ކުރީގެ އިސްލާމިކް މިނިސްޓަރު ވިދާޅުވެފައިވަނީ ޒަކާތު ފަނޑުން 2020 ވަނަ އަހަރު 13 ދަރިވަރުންނަށް ފައިސާ ޒަކާތު ފަންޑުން ދީފައިވާކަމަށެވެ. އެ 13 ދަރިވަރުންނަށް ދީފައިވާ ފައިސާގެ ޖުމުލަ އަދަދަކީ 508،242.00 (ފައްސަތޭކަ އަށް ހާސް ދުއިސައްތަ ސާޅީސް ދެ ރުފިޔާ) އެވެ. އަދި 2021 ވަނަ އަހަރު 180 ދަރިވަރުންނަށް ވަނީ ފައިސާ ދީފައިވާކަމަށެވެ. އަދި އެ ދަރިވަރުންނަށް ދީފައިވަނީ 11،405،086.96 (އެގާރަ މިލިއަން ހަތަރު ސަތޭކަ ފަސްހާސް އަށްޑިހަ ހަ ރުފިޔާ ނުވަދިހަ ލާރި)އެވެ.
