ޕީޕީއެމް/ޕީއެންސީ ސަރުކާރުގައި، ސަރުކާރުގެ ކުންފުނިތަކުން އެއްބަސްވުންތައް ހަދަމުންދަނީ ރަނގަޅަށް ވައްކަން ކޮށްލެވޭ ގޮތަށް: މެންބަރު އަބްދުލްޣަފޫރު
މި މައްސަލާގެ ޒިންމާ އެޗްޑީސީން ނަގަންޖެހޭ، މިއީ އިހުލާސްތެރިކަމެއް ނެތުމުން ދިމާވާ މައްސަލަތައް
ރައްޔިތުންގެ މަޖިލީހުގައި ހަނިމާދޫ ދާއިރާގެ މެންބަރު އަބްދުލްޣަފޫރު މޫސާ ވާހަކަދައްކަވަނީ
ޕީޕީއެމް/ޕީއެންސީ ސަރުކާރުގައި، ސަރުކާރުގެ ކުންފުނިތަކުން އެއްބަސްވުންތައް ހަދަމުންދަނީ ރަނގަޅަށް ވައްކަން ކޮށްލެވޭ ގޮތަށް ކަމަށް ރައްޔިތުންގެ މަޖިލީހުގެ ހަނިމާދޫ ދާއިރާ އަބްދުލްޣަފޫރު މޫސާ ވިދާޅުވެއްޖެއެވެ.
ކޭ-ޕާކް ރެސިޑެންސްގެ ނަމުގައި ހުޅުމާލޭގައި ފެށި ހައުސިންގ މަޝްރޫއުއާ ގުޅިގެން ދިމާވި މައްސަލަތައް ހައްލުނުވެ ދިގުލައިގެންދިޔުމާމެދު ގަލޮޅު އުތުރު ދާއިރާގެ މެންބަރު މުހައްމަދު އިބްރާހީމް ހުށަހެޅުއްވި ގަރާރަށް ބަހުސްކުރައްވަމުން މެންބަރު އަބްދުލްޣަފޫރު ވިދާޅުވީ މިފަދަ ގެއްލުންތައް ރައްޔިތުންނަށް ވަމުންދަނީ ކަނޑައެޅިގެން ދައުލަތަށް ގެއްލުންވާ ގޮތަށް އެއްބަސްވުންތައް ހަދާފައި ހުންނާތީ ކަމަށާއި، އެ އެއްބަސްވުންތަކުގައި ބަދަލުގެ ބައި ހިމެނުމަށް އެތައް ފަހަރަކު މާލިއްޔަތު ކޮމެޓީގައި މަޝްވަރާ ކުރުމަށްފަހު ސަރުކާރުގެ ކުންފުނިތަކުގެ ވެރިންނަށް އަންގާފައިވާ ކަމަށެވެ.
ސަރުކާރުގެ އެކިއެކި ކުންފުނިތަކާއެކު މަޝްވަރާކުރުމަށްފަހު ހައްލު ގެނެވޭނެ ގޮތްތައް ހާމަކުރި ނަމަވެސް އަދި މިހާތަނަށް ހެދޭ އެއްވެސް އެއްބަސްވުމެއްގައި މިފަދަ ކަންކަން ހިމަނާފައިނުވާ ކަމަށް އޭނާ ވިދާޅުވިއެވެ. އަދި ވިދާޅުވީ އެއްބަސްވުންތައް ހަދަމުންދަނީ ރަނގަޅަށް ވައްކަން ކޮށްލެވޭ ގޮތަށް ކަމަށާއި، ދައުލަތަށް ގެއްލުން ލިބޭ ގޮތަށް ކަމަށެވެ.
ރަނގަޅަށް ވައްކަން ކޮށްލެވޭ ގޮތަށް ކޮންމެ ކުންފުންޏަކުން އެގްރިމެންޓް ހެދިއަސް ހަދަމުން މިގެންދަނީ. އޭގެ ދަށުން ނިމޭއިރުގައި ދެފަރާތަށް ބައި އަޅާލައިގެން ދައުލަތުން ފައިސާ ނަގަން މިޖެހެނީ. މިހެން މިކަންކަން ވެގެން ނުވާނެ. ދައުލަތް ހިމާޔަތް ކުރެވެންޖެހޭނެ. ދައުލަތް ހިމާޔަތް ކުރެވިގެން ރައްޔިތުން ހިމާޔަތް ކުރެވޭނީ އިއްޒަތްތެރި ރައީސް. އޭގެ ނުބައި ރަނގަޅު ނޫން ނަތީޖާތައް އަޅުގަނޑުމެންނަށް ފެންނަމުން މިދަނީ. މިކަހަލަ އެތައްއެތައް މައްސަލައެއް އެބަހުރި ކުރިއަށް ނުނިމި އިއްޒަތްތެރި ރައީސް. އެތައް އެގްރިމެންޓެއްގައި ސޮއިކުރެވިފައި. އެތައް ބަޔަކަށް ފައިސާ ދޭންޖެހޭ. ބައިވަރު މައްސަލަތައް އެބަހުރި. ޕީޕީއެމް ސަރުކާރުގައި އެމްރިމެންޓް ހަދާފައި އަދި އިތުރަށް އަންނަން ޕައިޕްލޭންގައި އެބަހުރި ވަރަށް ގިނަކަންތައްތައް.ރައްޔިތުންގެ މަޖިލީހުގެ ހަނިމާދޫ ދާއިރާ އަބްދުލްޣަފޫރު މޫސާ
ކޭ-ޕާކުގެ މައްސަލައަށް އިޝާރާތް ކުރައްވައި މެންބަރު އަބްދުލްޣަފޫރު ވިދާޅުވީ މި މައްސަލާގެ ޒިންމާ އެޗްޑީސީން ނަގަންޖެހޭ ކަމަށާއި، މިއީ އިހުލާސްތެރިކަމެއް ނެތުމުން ދިމާވާ މައްސަލަތައް ކަމަށެވެ.
މި ކޭޕާކު މައްސަލައާއި ސީވޯލްގެ މައްސަލައަކީ ފުރިހަމައަށް އެޗްޑީސީން ޒިންމާ އުފުލަންޖެހޭ ކަމެއް. އެބޭފުޅުން ބިން ހަވާލުކުރަނީ. އެބޭފުޅުން ހަވާލުކުރާއިރުގައި އެވަރުގެ އިންވެސްޓެއް ކުރެވޭވަރުގެ ބައެއްތޯ ބަލަންޖެހޭނެ. އެއާއެކު އެކަން ކުރުމަށްޓަކައި މޯގޭޖެއް ބަހައްޓަން ޖެހޭނެ އިއްޒަތްތެރި ރައީސް. އޭރުން ރައްޔިތުންގެ ފައިސާ ހިމާޔަތް ކުރެވޭނީ. އަދި ނެގޭ ފައިސާއަކީ ސީދާ އެޗްޑީސީގެ ބެލުމުގެ ދަށުން އެ ޕްރޮޖެކްޓްގެ ދަށުން ހަރަދު ކުރެވޭނެ ފައިސާކަމުގައި ވެގެންދިޔާމަ ރައްޔިތުން ބިކަވެގެން އުޅޭކަށް ނުޖެހޭނެ. އެހެނެއް ނޫން ކަންކަން ވަނީއެއް. ކުންފުނީގެ އެމްޑީއަށްވުމަށްފަހު ކުންފުނީގެ އަސާސީ ގަވާއިދަށް ބެލުމެއް ނެތް. ގެސްޓްހައުސްތައް އެޅުމަށް ކައުންސިލްތަކާއެކު އެގްރިމެންޓް ވެސް ހަދަނީ. ބައްލަވާ ހައްޖު ކޯޕްރޭޝަނުން މިއަދު ހައްދަވާގެން އުޅޭ އެއްޗެއް. ގެސްޓްހައުސް ވިޔަފާރިއަށް ހައްޖު ކޯޕްރޭޝަނުން ވަންނަނީ. ކޮބައިތޯ ކުންފުނީގެ މެންޑިޑޭޓް.ރައްޔިތުންގެ މަޖިލީހުގެ ހަނިމާދޫ ދާއިރާ އަބްދުލްޣަފޫރު މޫސާ
މީގެ އިތުރުން މެންބަރު އަބްދުލްޣަފޫރު ވަނީ ސްޓެލްކޯއިން ބެޓަރީ ސައިކަލު ގެންނާތީ އެކަމަށް ވެސް ފާޑު ވިދާޅުވެފައެވެ. އޭނާ ވިދާޅުވީ އެއީ މިގައުމުގައި ހިނގާ އެއްޗެއް ނޫން ކަމަށާއި، ދިރާސާއެއް ކުރުމެއްނެތި އެތައް މިލިއަން ރުފިޔާއެއް ބޭކާރު ކުރާ ކަމަށެވެ.
މެންބަރު އަބްދުލްޣަފޫރު ވިދާޅުވީ ކަމެއް ގައުމުގައި އަލަށްފަށާނަމަ އެކަމަކާ ގުޅޭ ރަނގަޅު ދިރާސާއެއް ހަދަންޖެހޭ ކަމަށާއި، އެއީ ގައުމަށް އެކަށީގެންވާ ކަމެއްތޯ ބަލަންޖެހޭ ކަމަށެވެ. ދުނިޔާގެ އެހެން ގައުމުތަކުގައި ވެސް ކަންކަން ކުރާ އުސޫލަކީ އެއީ ކަމަށް އޭނާ ވިދާޅުވިއެވެ. ނަމަވެސް ޕީޕީއެމް/ޕީއެންސީގެ ސަރުކާރުތަކުން މިހެން ކުރާ ކަންކަމުން ދައުލަތުން އެތައް މިލިއަން ރުފިޔާއެއް ހަރަދުކޮށް ދައުލަތަށް ވަނީ ބޮޑެތި ގެއްލުން ކަމަށް މެންބަރު އަބްދުލްޣަފޫރު ވިދާޅުވިއެވެ.
