މޯލްޑިވްސް ކަރެކްޝަނަލް ސަރވިސް (އެމްސީއެސް)ގެ ޚިދުމަތާ އަލަށް ގުޅޭ އޮފިސަރުންނަށް ހިންގި "ސެޓްފިކެޓް 3 އިން ކަސްޓޯޑިއަލް މެނޭޖްމަންޓް އެންޑް ސެކިއުރިޓީ" ޕްރޮގްރާމުގެ ދަސްވެނިވުމުގެ ރަސްމިއްޔާތު ބާއްވައިފިއެވެ.

މިއީ ކަރެކްޝަންސްގެ ޖަލު އޮފިސަރުންގެ އަސާސީ ތަމްރީން ޕްރޮގްރާމްގެ 28 ވަނަ ބެޗެވެ. މި ރަސްމިއްޔާތު ބާއްވާފައިވަނީ ހޮނިހިރު ދުވަހުގެ ރޭ މާފުށީ ޖަލުގައެވެ.

ތިން މަސް ދުވަހުގެ މުއްދަތަކަށް ކުރިއަށްގެންދިޔަ މި ޓްރެއިނިން ފެށީ 22 ޖުލައި 2023ގައެވެ. މި ޕްރޮގްރާމުގައި 38 ފަރާތަކުން ބައިވެރިވިއިރު, އޭގެ ތެރެއިން 37 ޓްރޭނީން ކާމިޔާބުކަމާއެކު މި ޕްރޮގްރާމް ފުރިހަމަކޮށްފައިވާ ކަމަށް ކަރެކްޝަންސްއިން ބުންޏެވެ.

މި ރަސްމިއްޔާތުގައި ހުރިހާ ދަސްވެނިންނަށް ސެޓްފިކެޓް ހަވާލުކޮށްފައިވާއިރު، ހަޔަރ ޑިސްޓިންކްޝަން ހާޞިލްކުރި ފަރާތްތަކަށް ވަނީ މެޑަލް އަރުވާފައެވެ. އަދި އެންމެ ދުޅަ ހެޔޮ ފިރިހެން އޮފިސަރާއި، ތަޢުލީމީ ރޮނގުން އެންމެ މޮޅު އޮފިސަރާއި، އަމަލީ ގޮތުން އެންމެ މޮޅު އޮފިސަރުގެ އިތުރުން "ކޮމިޝަނަރ އޮފް ޕްރިޒަންސް އެވޯޑް" ހޮވައި، ސެޓްފިކެޓް އަދި ޝީލްޑް ވަނީ ދީފައެވެ.

"ބެސްޓް އޯލް ރައުންޑް" އަށް ހޮވިފައިވަނީ ޕްރައިވެޓް މުޙައްމަދު ހިޝާމް އިސްމާޢީލްއެވެ. އޭނާއަށް ސެޓްފިކެޓާއި ޝީލްޑް، ސޭޝް އަދި ބެރޭ ވަނީ ހަވާލުކޮށްފައެވެ. އަދި ކޮންމެ ޕްލެޓޫންއަކުން އެންމެ ފާހަގަކޮށްލެވޭ އޮފިސަރުންނަށް ޝީލްޑް ދީފައިވާއިރު، އެންމެ މޮޅު ޕްލެޓޫން ހޮވައި ވަނީ ޓްރޮފީ ދީފައެވެ.

މި ރަސްމިއްޔާތުގައި ދަސްވެނިންނަށް ހުވާލައިދެއްވާފައިވަނީ ޣާޒީ އަލްއުސްތާޛު ފައިޞަލް އާދަމްއެވެ.

މި ރަސްމިއްޔާތުގައި ވާހަކަފުޅު ދައްކަވަމުން މިނިސްޓަރ އޮފް ހޯމްލޭންޑް ސެކިއުރިޓީ އެންޑް ޓެކްނޮލޮޖީ އަލީ އިޙްސާން ވިދާޅުވީ ކަރެކްޝަންސްއަކީ މި ވަގުތު ހޯމް މިނިސްޓްރީގެ ދަށުން ހިނގަމުން އަންނަ އެންމެ މުހިއްމު އެއް މުއައްސަސާކަމަށާއި ދިވެހިރާއްޖޭގެ ޤާނޫނުތަކާއި ގަވާއިދުތަކުގެ ތެރެއިން މުޖުތަމައުން އެކަހެރިވެ، ބާކީވެ، އެއްފަރާތް ވެފައިވާ ހުރިހާ ރައްޔިތުންގެ ފުރިހަމަ ޒިންމާ ނަގާ، އެ ރައްޔިތުން މުޖްތަމައަށް އަނބުރާ ގެނައުމުގެ ޒިންމާއާ ހަވާލުވެފައިވާ ވަރަށް މުހިންމު މުއައްސަސާއެއް ކަމަށެވެ. އަަދި ކަރެކްޝަނުން ތަމްރީނުކުރާ އޮފިސަރުންނަކީ އެ މުވައްސަސާއެއްގެ އެންމެ ބޮޑު އެއް ރައުސުލްމާލު ކަމަށާއި އެއިރެއްގަ ދެވެންއޮންނަ އެންމެ މޮޅު ތަމްރީނެއް އެ މުއައްސަސާއެއްގައި ތިބޭ އޮފިސަރުންނަށް ދެވޭތޯ ބައްލަވާނެ ކަމަށް ވިދާޅުވިއެވެ.

ކޮމިޝަނަރ އޮފް ޕްރިޒަންސް ޙަސަން ޒަރީރު ވަނީ ދިވެހި އާ ޖީލުގެ ކިބައިގައި ޤައުމިއްޔަތާއި ޑިސިޕްލިން ބިނާކުރުމާއި ދީނީ ތަރަހައިގެ މުހިއްމުކަން ފާހަގަކުރައްވާފައެވެ. އަދި އޮފިސަރުން އުފުލަން ޖެހޭ މަސްއޫލިއްޔަތަކީ ވަރަށް ވަރުގަދަ މަސްއޫލިއްޔަތެއް ކަމަށާއި އަޒުމް ކަނޑަ އަޅަންޖެހޭނީ މުޖްތަމައުގައި ގަދަރު ލިބިދޭ އޮފިސަރުންނަށް ވުމަށް ކަމަށެވެ. ޖަލު ތެރޭގައި ދަންނަ ގާތް މީހަކު އޮތަސް، އަޒުމުކަނޑަ އަޅާ، އަމަލު ކުރަން ޖެހޭނީ ކުރާ ހުވާއާ އެއްގޮތަށް ކަމަށް ކޮމިޝަނަރ ނަސޭހަތްތެރިވެލެއްވިއެވެ.

އައިކޯސްޓްއިން ކުރަމުން ގެންދާ މަސައްކަތްތަކަށް އަލިއަޅުއްވާ ލައްވަމުން ކޮމިޝަނަރ ވިދާޅުވީ އައިކޯސްޓް ތަރައްޤީކޮށް، ޑިޕްލޮމާ އަދި ޑިގްރީ ފެންވަރުގެ ކޯސްތައް ހިންގޭނެ ގޮތް ހެދުމަށް މަސައްކަތްކުރައްވާނެ ކަމަށެވެ. އަދި ދަސްވެނިންނަށް ނަސޭހަތްތެރިވެލެއްވީ ވަޒީފާގެ މާހައުލާ ގުޅުމުގެ ފަހުން ރައްޓެހިންނާއި ދަންނަ މީހުންގެ ކިބައިން ގޯސް ހުށަހެޅުމެއް އަންނަ ކަމުގައިވަނީނަމަ، އެކަންކަމަށް ނޫނެކޭ ބުނުމަށެވެ.