7 ކުންފުންޏެއްގެ އިސްވެރިންނަށް ބޭފުޅުން ހަމަޖައްސަވަން ނަން ފޮނުއްވައިފި

7 ކުންފުންޏެއްގެ އިސްވެރިންނަށް ބޭފުޅުން އައްޔަންކުރައްވަން، ރައީސުލްޖުމްހޫރިއްޔާ ޑރ. މުހައްމަދު މުއިއްޒު ނަންތައް ފޮނުއްވައިފިއެވެ.

އެގޮތުން، ރީޖަނަލް އެއާޕޯޓްސްގެ މެނޭޖިން ޑިރެކްޓަރަކަށް ހަމަޖައްސަވަން ނަން ފޮނުއްވާފައިވަނީ ރައްޔިތުންގެ މަޖިލީހުގެ ބިލެތްދޫ ދާއިރާގެ ކުރީގެ މެމްބަރު އަހުމަދު މުބީނެވެ. އޭނާއަކީ މަޖިލީހުގެ ނިމިދިޔަ ދައުރުގައި މެމްބަރުކަން ކުރެއްވި ބޭފުޅެކެވެ. އޭނާ މަޖިލީހަށް ހޮވިވަޑައިގަތީ ޖޭޕީގެ ޓިކެޓުގައެވެ. ނަމަވެސް ފަހުން އޭނާ ވަނީ ޕީޕިއެމާ ގުޅިވަޑައިގެންފައެވެ.

މީގެ އިތުުރުން ދައުލަތުގެ މީިޑިއާ ކަމަށްވާ ޕީއެސްއެމްގެ މެނޭޖިންގ ޑިރެކްޓަރުގެ މަގާމަށް ޒީނާ ޒާހިރު އައްޔަންކުރައްވަން ވަނީ ނަން ފޮނުއްވާފައެވެ. ޒީނާއަކީ މީޑިއާގައި ގިނަ ދުވަހު މަސައްކަތްކުރެއްވުމުގެ އިތުރުން، މޯލްޑިވްސް ބްރޯޑްކާސްޓިންގ ކޮމިޝަން (އެމްބީސީ)ގެ މެންބަރުކަން ކުރައްވާފައިވާ ބޭފުޅެކެވެ. އަދި ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ)ގެ ސީއީއޯގެ މަގާމަށް ޕީޕީއެމްގެ ތަރުޖަމާނު ހީނާ ވަލީދުގެ ނަން ވަނީ ފޮނުއްވާފައެވެ. އޭނާއަކީވެސް މީޑިއާގައި ގިނަ ދުވަހު ޚިދުމަތްކުރައްވާފައިވާ ބޭފުޅެކެވެ.

މީގެ އިތުރުން އާސަންދަ ކުންފުނީގެ މެނޭޖިންގ ޑިރެކްޓަރުކަމުގެ މަގާމަށް، ހެންވޭރު ދެކުނު ދާއިރާގެ އެމްޑީޕީގެ ކުރީގެ މެމްބަރު މުހައްމަދު އަބްދުލްކަރީމް (ރުކުމާ)، އަރބަންކޯގެ އެމްޑީއަކަށް ޕީއެންސީގެ ޕީޖީ ލީޑަރު އަދި ފެލިދޫ ދާއިރާގެ މެމްބަރު އިބްރާހީމް ފަޒުލް ރަޝީދު ވަނީ ހަމަޖައްސަވާފައެވެ. ފަޒުލް ވަނީ މީގެ ކުރިން އެމްޑަބްލިއުއެސްސީގެ މެނޭޖިންގ ޑިރެކްޓަރުގެ މަގާމު އަދާކުރައްވާފައެވެ. އެއީ ކުރީގެ ރައީސް އަބްދުﷲ ޔާމީނުގެ ސަރުކާރުގައެވެ.

ރައީސް ޑރ. މުއިއްޒު ވަނީ ފެނަކަ ކޯޕަރޭޝަންގެ މެނޭޖިންގ ޑިރެކްޓަރަކަށް ޕީޕީއެމްގެ ސެނެޓް މެމްބަރު އަދި ރައްޔިތުންގެ މަޖިލީހުގެ މަޑަވެލީ ދާއިރާގެ މެމްބަރު މުއާޒު މުހައްމަދު ރަޝީދު އައްޔަންކުރައްވަން ފޮނުއްވާފައެވެ. އަދި އެމްއޭސީއެލްގެ އެމްޑީއަކަށް މޯލްޑިވްސް ކަސްޓަމްސް ސަރވިސަސްގެ ކުރީގެ ކޮމިޝަނަރ ޖެނެރަލް އިބްރާހިމް ޝަރީފް ވަނީ އައްޔަންކުރައްވާފައެވެ.

މި ބޭފުޅުން އައްޔަންކުރުމުގެ މަސައްކަތުގެ އަޕްޑޭޓެއް ހޯދުމަށް ޕީސީބީގެ ބަހެއް ހޯދުމަށް ކުރި މަސައްކަތް ވަނީ ކާމިޔާބުވާގޮތް ނުވެފައެވެ. އެނގިފައިވާގޮތުން މި ހަފުތާގެތެރޭގައި ކުންފުނިތަކަށް އައްޔަންކުރައްވާ ބޭފުޅުން އައްޔަންކުރައްވައި ނިންމެވުމަށް ދަނީ މަސައްކަތްކުރަމުންނެވެ.