އިސްރާއީލާ ހަމާސްއާ ދެމެދު ހަދާފައިވާ، އަސީރުން ބަދަލުކުރުމުގެ އެއްބަސްވުން އަންނަ ހުކުރު ދުވަހަށް ފަސްކުރާނެ ކަމަށް އިސްރާއީލުގެ އިސް އޮފިޝަލަކު ބުނެފިއެވެ. މި އެއްބަސްވުމަށް އަމަލުކުމުގެ މަސައްކަތް ބުރާސްފަތި ދުވަހު ފެށުމަށް ކުރިން ހަމަޖެހިފައި ވީނަމަވެސް، ހުކުރު ދުވަހަށް ފަސްކުރަން އިސްރާއީލުން ވަނީ ނިންމާފައެވެ. މި އެއްބަސްވުމުގެ ދަށުން، ޣައްޒާއަށް އެހީތެރިކަން ފޯރުކޮށްދިނުމުގެ ގޮތުން އިސްރާއީލު ސިފައިން ހަތަރު ދުވަހަށް ހަމަލާތައް މެދުކަނޑާލާނެ ކަމަށް ވަނީ ކުރިން އެއްބަސްވެފައެވެ.

އިސްރާއީލުގެ ނޭޝަނަލް ސެކިއުރިޓީ ކައުންސިލްގެ ޑިރެކްޓަރު ޓްޒާޗީ ހަނެގްބީ ބުދަ ދުވަހު ނެރުއްވި ބަޔާނެއްގައި ވިދާޅުވީ، މަޝްވަރާތައް އަދިވެސް ކުރިއަށްދާކަމަށާއި އެއްބަސްވުން ފައިނަލްކުރަން ތައްޔާރުވެފައި ވާކަމަށެވެ.

ހާރެޓްޒްއާ ހަވާލާދީ އިސްރާއީލުގެ އޮފިޝަލަކު ވިދާޅުވީ، އިސްރާއީލުގެ އަސްކަރީ އޮޕަރޭޝަންތައް ހަތަރު ދުވަހަށް މެދުކަނޑާލުން ވެސް ލަސްވާނެ ކަމަށާއި، އެ އެއްބަސްވުމަށް ރަސްމީކޮށް އަމަލުކުރަންދެން ޣައްޒާގެ ވައިގެ އަދި އެއްގަމު މަގުން ހަމަލާތައް ދެމުން ގެންދާނެކަމަށެވެ.

އެމެރިކާގެ ނޭޝަނަލް ސެކިއުރިޓީ ކައުންސިލްގެ ތަރުޖަމާނު އެޑްރިއެން ވޮޓްސަން ވިދާޅުވީ އެއް ދުވަސް ލަސްވުމުން އޭގެ މާނައަކީ އެއްބަސްވުން ނުރައްކަލުގެ ތެރެއަށް ވެއްޓިފައިވާކަން ނޫންކަމަށާއި، އެއީ ދެފަރާތުންވެސް ބަރާބަރަށް އެއްބަސްވެފައިވާ އެއްބަސްވުމެއް ކަމަށެވެ.

އިސްރާއީލުގެ ކެބިނެޓުން ވަނީ، އަސީރުން ބަދަލުކުރުމުގެ އެއްބަސްވުމަށް އަންގާރަ ދުވަހުގެ ރޭ ރުހުން ދީ އެއްބަސްވެފައެވެ. ގަތަރާއި މިސްރު އަދި އެމެރިކާގެ މެދުވެރިއެއްގެ ގޮތުގައި އޮވެ، ވެފައިވާ މިއެއްބަސްވުމުގެ ދަށުން ހަމާސްއިން އިސްރާއީލުގެ 50 މީހުން ދޫކޮށްލާނެއެވެ. އިސްރާއީލުގެ ދިފާއީ ބާރު (އައިޑީއެފް)އިން ވެސް ޣައްޒާއަށް ދޭ ހަމަލާތައް ހަތަރު ދުވަހަށް ހުއްޓާލާނެއެވެ. އަދި މީގެ އިތުރުން ހަމާސްއިން މިނިވަންކުރާ އިތުރު ދިހަ މީހަކަށް، އިތުރު އެއް ދުވަހަށް އޮޕަރޭޝަންތައް މެދުކަނޑާލާނެ ކަމަށްވެސް އެ އެއްބަސްވުމުގައި ވެއެވެ.

ހަމާސްއިން ބުނީ ހަތަރު ދުވަހުގެ މުއްދަތަކަށް ޣައްޒާގެ ދެކުނުގެ ސަރަހައްދުގައި ދެމުންދާ ހަމަލާތައް ހުއްޓާލުމަށާއި އަދި އުތުރުން ހަމަލާތައްވެސް ކޮންމެ ދުވަހެއްގެ ވަކި ވަގުތުތަކަކަށް ލިމިޓް ކުރުމަށްވެސް އިސްރާއީލުން އެއްބަސްވެފައިވާ ކަމަށެވެ.

އދ.ގެ ހިޔާތައް ހިމެނޭ ގޮތަށް، އިސްރާއީލު ސިފައިން އިވެކުއޭޝަން ޒޯނަށް ހަމަލާތައް ދެމުން ގެންދާކަމަށް އިންސާނީ ހައްގުތަކަށް މަސައްކަތްކުރާ ޖަމާއަތްތަކުން ތުހުމަތުކުރިނަމަވެސް، ފަލަސްތީނުގެ އާންމުން އެމީހުންގެ އަމިއްލަ ސަލާމަތަށްޓަކައި ދެކުނުގެ ސަރަހައްދުތަކަށް ހުސްކުރުމަށް އައިޑީއެފްއިން ވަނީ އިލްތިމާސްކޮށްފައެވެ. އިސްރާއީލުން ބުނަމުން ދަނީ ހަމަލާދެނީ ހަމައެކަނި އަސްކަރީ އަމާޒުތަކަށް ކަމަށެވެ.

މިދިޔަ އޮކްޓޯބަރު މަހުގެ ހަތްވަނަ ދުވަހު ހަމާސް ޖަމާއަތުން އިސްރާއީލަށް ދިން ހަމަލާގައި 200އަށްވުރެ ގިނަ މީހުން ރަހީނުކުރިއިރު، އެ ހަމަލާގައި 1،200އެއްހާ މީހުން ވަނީ މަރުވެފައެވެ. އިސްރާއީލުގެ އޮފިޝަލުން ބުނާގޮތުގައި، ހައްޔަރުކުރި މީހުންގެ ތެރޭގައި؛ އެމެރިކާ، ތައިލެންޑް، އިނގިރޭސިވިލާތް، ފްރާންސް، އާޖެންޓީނާ، ޖަރުމަނުވިލާތް، ޗިލީ، ސްޕެއިން އަދި ޕޯޗުގަލްގެ ރައްޔިތުން ހިމެނެއެވެ.

ހަމާސްގެ ބާރުގެދަށުގައި އޮންނަ ފަލަސްތީނުގެ އެންކްލޭވްގެ ސިއްހީ އޮފިޝަލުން ބުނާގޮތުގައި، އިސްރާއީލުން ވަނީ ޣައްޒާއަށް ހަފުތާތަކެއް ވަންދެން ވައިގެ ހަމަލާތަކެއް ދީ، ފަލަސްތީނުގެ 13،000ށްވުރެ ގިނަ މީހުން ޝަހީދުކޮށްލާފައެވެ.