ޣައްޒާގެ އުތުރުގެ ޖަބާލިއާ ރެފިއުޖީ ކޭމްޕްގައި ދިރިއުޅޭ އެއް އާއިލާއެއްގެ 50 ށް ވުރެ ގިނަ މީހުން  އިސްރާއީލުގެ އަސްކަރީ ހަމަލާއެއްގައި ޝަހީދުވެފައިވާ ކަމަށް ފަލަސްތީނުގެ އޮފިޝަލުން ބުނެފި އެވެ.

އަލްޖަޒީރާއިން ރިޕޯޓްކޮށްފައިވާ ގޮތުގައި ފަލަސްތީނުގެ ޚާރިޖީ ވަޒީރު ރިޔާދު އަލް މާލިކީ ވިދާޅުވީ ޖަބާލިއާއަށް ދިން ހަމަލާގައި ކާފައިން ފެށިގެން ދައްތަމެންނާ ހަމައަށް ކަދުއުރާ އާއިލާގެ 52 މީހަކު މުޅިން ނައްތާލެވިފައިވާ ކަމަށެވެ. އަލްމާލިކީ ވިދާޅުވީ މަރުވި އާއިލާގެ 52 މީހުންގެ ނަންތަކުގެ ލިސްޓެއް އޭނާގެ އަތުގައި އެބައޮތް ކަމަށެވެ.

މި ހަމަލާއާ ގުޅޭ ގޮތުން އިސްރާއީލުގެ އަސްކަރިއްޔާއިން އަދި ވަކި އެއްޗެއް ބުނެފައެއް ނުވެއެވެ. އިސްރާއީލުން ބުނެފައިވަނީ ޣައްޒާއަށް ބޮން އެޅުމުގެ ކެމްޕެއިން އަމާޒުކޮށްފައިވަނީ ހަމާސް ފަދަ ހަނގުރާމަވެރި ޖަމާއަތްތަކާ ގުޅުން ހުރި ހަނގުރާމަވެރިންނަށް އެކަނި ކަމަށާއި އެ ޖަމާއަތްތަކުން އާންމުން އިންސާނީ އައްޑަނައެއްގެ ގޮތުގައި ބޭނުންކުރާ ކަމަށް ތުހުމަތުކުރާ ކަމަށެވެ.

ޤަދޫރާ ޢާއިލާގެ 52 މީހުން އެއްހަމަލާއެއްގައި ޝަހީދުވެފައިވާއިރު، ރިޕޯޓްތައް ބުނާގޮތުގައި މިއީ މީގެ މަހެއްހާ ދުވަސް ކުރިން ހުޅަނގު އައްސޭރީގައި އިސްރާއީލުން ދިން ހަމަލާތަކުގައި، ފަލަސްޠީނުގެ ރައްޔިތުންނާ ދެކޮޅަށްދިން އެންމެ ނުރައްކާތެރި ހަމަލާއެވެ.

މިފަދަ ހަމަލާތަކާއި، އަދި ސިއްހީ އިދާރާތަކަށާއި، ސްކޫލްތަކަށް އިސްރާއީލުގެ ހަމަލާތައް އަމާޒުވަމުންދާތީ އިންސާނީ ޙައްޤުތަކަށް މަސައްކަތްކުރާ ފަރާތްތަކުން ބުނަނީ ޣައްޒާގައި އިސްރާއީލުން ހިންގަމުންދަނީ ހަނގުރާމައެއް ނޫންކަމަށާއި، އެއީ ސީދާ ނަސްލު ނައްތާލުމުގެ ޤަތުލް ޢާއްމެއް ކަމަށެވެ.

އިސްރާއީލްގެ ހަމަލާތަކަށް މަހަކަށް ވުރެ ގިނަދުވަސްވެފައިވާއިރު، އިސްރާއީލާއި، ޣައްޒާ ކޮންޓްރޯލްކުރާ ހަމާސްއާއި ދެމެދު ވަނީ އެއްބަސްވުމެއް އެކުލަވާލައިފައެވެ. ހަމާސް އިން ނެރުނު ބަޔާނެއްގައި ވަނީ އިސްރާއީލުގެ ޖަލުތަކުން ފަލަސްތީނުގެ 150 އަންހެނުންނާއި ކުޑަކުދިން ދޫކޮށްލުމުގެ ބަދަލެއްގެ ގޮތުން ހަމާސްގެ ރަހީނުންގެ ތެރެއިން ބަންދުކޮށްފައިވާ 50 އަންހެނުންނާއި ކުޑަކުދިން މިނިވަންކުރާނެކަން ކަށަވަރުކޮށްދީފައެވެ.

މީގެ އިތުރުން އިސްރާއީލުން ވެސް ޣައްޒާގައި ހިންގާ ހުރިހާ އަސްކަރީ ހަރަކާތްތަކެއް ހުއްޓާލުމަށާއި، އިންސާނީ، ސިއްހީ އަދި ތެލުގެ އެހީ އުފުލާ އެތައް ސަތޭކަ ޓްރަކްތަކެއް އެ ސަރަހައްދަށް ވަނުމުގެ ހުއްދަ ދިނުމަށް ބުނެފައިވެއެވެ.

މިދިޔަ މަހުގެ 7 ވަނަ ދުވަހުން ފެށިގެން ކުރަމުން އަންނަ ހަނގުރާމަައިގައި ފުރަތަމަ ފަހަރަށް ހަމަލާދިނުން ހުއްޓާލުމަށް އެއްބަސްވެފައިވާއިރު، މިހާތަނަށް މި ހަނގުރާމައިގައި ޣައްޒާއިން 14100 މީހުން ވަނީ މަރުވެފައެވެ. އަދި 2.3 މިލިއަން މީހުން ދިރިއުޅެމުން އަންނަ ޣައްޒާއިން 1.7 މިލިއަން މީހުން ވަނީ ގެދޮރު ގެއްލިފައެވެ.