ޕީޕީއެމްގެ މައްސަލަ ހޫނުވެ، ސްޕޯކްސްޕަރސަންގެ މަގާމަށްޓަކައި ކޯޅެން ފަށައިފިއެވެ.
ޕީޕީއެމްގެ މައްސަލަ ހޫނުވެފައިވަނީ، ޕީޕީއެމް އޮފީހުގައި، ކުރީގެ މިނިސްޓަރު މުހައްމަދު މަލީހު ޖަމާލާއި، އައްބާސް އާދިލް ރިޒާއާއި، މަޖިލީހުގެ ކުރީގެ މެންބަރު މުހައްމަދު ވަހީދު (ލޯޔަރު ވައްޑެ) އާއި، އަދިވެސް ބައެއް ބޭފުޅުން ނޫސްވެރިންގެ ބައްދަލުވުމެއް ބޭއްވެވުމާ ގުޅިގެންނެވެ.
އެ ބައްދަލުވުމުގައި ޕީޕީއެމްގެ ސެކްރެޓަރީ ޖެނެރަލް މުހައްމަދު ތޮލާލް، ޕާޓީ ހިންގުމާމެދު އުޒުރުވެރިވާކަމަށް ޔާމީނަށް ދެންނެވިކަމަށާއި، ހީނާވެސް މަގާމުން އިސްތިއުފާ ދީފައިވާކަމަށް އައްބާސް ވަނީ ވިދާޅުވެފައެވެ. އެހެންނަމަވެސް ހީނާއާއި ތޮލާލްވެސް ވަނީ އެ ތުހުމަތުތައް ދޮގުކޮށްފައެވެ.
މި މައްސަލަތައް ފެންމަތިވެފައިވާއިރު، ބުދަ ދުވަހު ޕީޕީއެމްގެ މީޑިއާ ގްރޫޕުގައި ނޫސްވެރިޔަކު ވަނީ ސްކްރީން ޝޮޓެއް ހިއްސާކޮށްފައެވެ. އައްބާސް އާދިލް ރިޒާ، ހީނާ ވަލީދަށް ފޮނުވިކަމަށް ބުނާ މެސެޖުގައި ވަނީ، ހީނާގެ ބަލި ހާލަތު މިވަގުތު ހުރިގޮތުން އެ މަގާމުން އޭނާ ދުރުކުރެއްވުމުގެ މަޝްވަރާތައް ރައީސް ޔާމީން، އައްބާސްއާއެކު ކުރެއްވިކަަމަށެވެ. އަދި ހޮނިހިރު ދުވަހުން ފެށިގެން ޕީޕީއެމްގެ ސްޕޯކްސްމަންގެ މަގާމާ ހަވާލުވާނެ ކަމަށެވެ. ހީނާ ވަނީ އައްބާސްއަށް ޝުކުރު އަދާކުރައްވައި ހެޔޮ ދުއާ ފޮނުވާފައެވެ.
ޕީޕީއެމްގެ މީޑިއާ ގްރޫޕަށް ނޫސްވެރިޔަކު އެ ސްކްރީން ޝޮޓް ހިއްސާކުރައްވަމުން، އެކަަމާމެދު ވިދާޅުވާނީ ކީކޭތޯ ހީނާއަށް ވަނީ ސުވާލު ކޮށްފައެވެ. އެ މެސެޖަށް އެއްޗެއް ބުނަންޖެހޭނެތޯއާއި އެ މެސެޖް ފޮނުވާފައިވަނީ ޕާޓީގެ ކޮން ހައިސިއްޔަތެއް އޮތް ބޭފުޅެއްތޯ ހީނާ ވަނީ ސުވާލު އުފައްދާފައެވެ. އެ ނޫސްވެރިޔާ ވަނީ އެ ސުވާލު އައްބާސް މެސެޖްކުރިއިރު ކުރިނަމަ ރަނގަޅުވީސް ކަމަށް ބުނެފައެވެ.
އެއަށްފަހު މި މެސެޖްތަަކަށް އެޕާޓީގެ މުހައްމަދު ތޮލާލް ވަނީ، ހައިސިއްޔަތެއް ނެތް މީހަކު ފޮނުވާ މެސެޖަށް ޖަވާބު ދޭން ނުވަތަ އިތުރު ސުވާލެއް ކުރަން ޖެހޭތޯ ސުވާލު އުފައްދާފައެވެ. މި މެސެޖްތަކާ ގުޅިގެން އިތުރު ނޫސްވެރިޔަކު ވަނީ، ހައިސިއްޔަތު އޮތް ބޭފުޅުންނަށް ޕީޕީއެމް އޮފީހުގެ ނޫސްވެރިންގެ ބައްދަލުވުމެއް ބޭއްވުމަށްފަހު އެ ހިނގާ ކަންކަން ސާފުކޮށްދިނުމަށް ކެރިވަޑައިގަންނަވާނެތޯ ތޮލާލާ ސުވާލު ކޮށްފައެވެ. އެެހެންނަމަވެސް އެ ސުވާލަަކަށް ތޮލާލް އަދި ހީނާވެސް ޖަވާބެއް ނުދެއެވެ.
ކުރީގެ ރައީސް ޔާމީނާއި ރައީސުލްޖުމްހޫރިއްޔާ ޑރ. މުހައްމަދު މުއިއްޒާ ދެބޭފުޅުން އުޅުއްވަނީ "ރުޅި" ހައްދަވައިގެން ކަަމަށް ބައެއް މީޑިއާތަކުން ރިޕޯޓްކޮށްފައިވާއިރު، ރައީސް ޔާމީން އެކުލަވައިލެއްވި ސްޓިއަރިންގ ކޮމެޓީގައި ހިމެނޭ މެމްބަރުން ވަނީ ވަކި މީޑިއާ ގްރޫޕެއްވެސް މިހާރު ހަދާފައެވެ.
އަދި އެ ކޮމެޓީގައި ހިމެނިވަަޑައިގަންނަވާ އަދި ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) ގެ ސެނެޓަރު މުހައްމަދު މަލީހު ޖަމާލް، ޕާޓީ ބައިބައިކުރައްވަން އުޅުއްވާ ކަމަށް ބުނެ ސަސްޕެންޑް ކޮށްފައިވާއިރު، އޭނާ ކުރައްވަމުން ގެންދަވާ މަސައްކަތްޕުޅަކީ ރައީސް ޔާމީންގެ ސީދާ ލަފާފުޅުގެ މަތިން ކުރައްވަމުންދާ ކަމެއް ކަމަށާއި، ދެކޮޅު ނުބައްލަވައި އަދި ޕްރެސް ކޮންފަރެންސްވެސް ނުބައްލަވައި ޕީޕީއެމްގެ ދެ ޑެޕިއުޓީ ލީޑަރަކަށް ނުކުރެވޭނެ ކަމެއް ކުރައްވާފައިވާ ކަމަށް މަލީހު ވަނީ ސަން އޮންލައިނަށް ވިދާޅުވެފައެވެ. އަދި ރައީސް ޔާމީނާއި ޕީޕީއެމްގެ ދިފާއުގައި ކުރައްވާ މަސައްކަތްޕުޅުގައި ފަހަތަށް ޖެހިވަޑައިނުގަންނަވާނެ ކަމަށްވެސް ވިދާޅުވިއެވެ.
ރައީސް ޔާމީން މިނިވަން ކުރުމަކީ ޕީއެންސީގެ ރައީސް އަދި ރައީސް ޑރ. މުހައްމަދު މުއިއްޒުގެ ރިޔާސީ ވައުދުފުޅެކެވެ. ނަމަވެސް އެމަނިކުފާނަށް އިއްވާފައިވާ 11 އަހަރުގެ ޖަލު ހުކުމް އަދިވެސް ދެމިއެބައޮތެވެ.
