ރާއްޖޭގައި އެކަނިވެރި މައިންގެ ގޮތުގައި 5443 މީހުން!
ރާއްޖޭގެ އާބާދީގެ 31 އިންސައްތައަކީ ކުޑަކުދިން
މަންމައަކު އޭނާގެ ދަރިފުޅާއެކު
ރާއްޖޭގައި އެކަނިވެރި މައިންގެ ގޮތުގައި 5443 މީހުން އެބަތިބިކަމަށް މޯލްޑިވްސް ބިއުރޯ އޮފް ސްޓެޓިސްޓިކްސް އިން އާއްމުކޮށްފައިވާ ތަފާސްހިސާބުތަކުން ދައްކައިފިއެވެ.
އެ އިދާރާއިން ކުޑަކުދިންގެ ދުވަހާ ގުޅުވައިގެން އަންގާރަ ދުވަހު އާއްމުކުރި ތަފާސްހިސާބުތަކުން ދައްކާ ގޮތުގައި 2022 ގެ ނިޔަލަށް ރާއްޖޭގައި އެކަނިވެރިމައިންގެ އިނާޔަތް ލިބޭ ތިބީ 5443 މީހުންނެވެ. އަދި ދައުލަތުގެ ބެލުމުގެ ދަށުގައި ތިބޭ ކުދިން ފޮސްޓާ ކުރާ ބެލެނިވެރިންގެ ތެރޭގައި 148 މީހުން އެބަތިބިކަމަށް ވެސް ވަނީ ފާހަގަކޮށްފައެވެ. މިއީ އެންސްޕާއާ ހަވާލާދީ ނޭޝަނަލް ބިއުރޯ އޮފް ސްޓެޓިސްޓިކްސް އިން އާއްމުކޮށްފައިވާ އަދަދުތަކެކެވެ.
މިދިޔަ އަހަރު އެކުލަވައިލި ބޯހިމެނުމުގެ ނަތީޖާއިން ދައްކާ ގޮތުގައި ރާއްޖޭގެ އާބާދީގެ 31 އިންސައްތައަކީ ކުޑަކުދިންނެވެ. އެއީ 119،159 ކުދިންނެވެ. މީގެ ތެރޭގައި 61،150 ފިރިހެން ކުދިންނާއި 58،009 އަންހެން ކުދިން ހިމެނެއެވެ.
ރާއްޖޭގައި ދިރިއުޅޭ ކުޑަކުދިންގެ އާބާދީގެ 38 އިންސައްތަ ކުދިން ދިރިއުޅެނީ މާލެ ސަރަަހައްދުގައެވެ. އެއީ 45,252 ކުދިންނެވެ. އަދި އަތޮޅުތެރޭގައި ދިރިއުޅެނީ 73,907 ކުދިންނެވެ.
ނޭޝަނަލް ބިއުރޯ އޮފް ސްޓެޓިސްޓިކްސް އިން ހާމަކޮށްފައިވާ ގޮތުގައި 5 އަހަރާއި 17 އަހަރާ ދެމެދުގެ ކުދިންގެ ތެރޭގައި 3.8 އިންސައްތަ ކުދިންނަކީ ނުކުޅެދުންތެރިކަމެއް ހުންނަ ކުދިންނެވެ. އެގޮތުން އާއްމުކޮށް ކުޑަކުދިންގެ ފެނުމާއި ހަނދާންބަލިވުމާއި މުއާމަލާތްކުރުމުގައި ނުކުޅެދުންތެރިކަން ހުންނަކަން ފާހަގަކުރެވިފައިވާ ކަމަށް ވަނީ ބުނެފައެވެ.
މިދިޔަ އަހަރު މިނިސްޓްރީ އޮފް ސޯޝަލް އެންޑް ފެމިލީ ޑެވެލޮޕްމަންޓަށް ހުށަހެޅި ކުޑަކުދިންނާ ގުޅުންހުރި މައްސަލަތަކުގެ އަދަދުތައް ވެސް ނޭޝަނަލް ބިއުރޯ އޮފް ސްޓެޓިސްޓިކްސް އިން ވަނީ އާއްމުކޮށްފައެވެ. އެގޮތުން 18 އަހަރުން ދަށުގެ ކުޑަކުދިންނަށް ކުރާ އަނިޔާގެ އެކި ބާވަތްތަކުގެ 1،287 މައްސަލައެއް ހުށަހަޅާފައިވާ ކަަމަށާއި މީގެ ތެރޭގައި 567 ފިރިހެން ކުދިންނާ ގުޅުންހުރި މައްސަލަ އަދި 720 އަންހެން ކުދިންނާ ގުޅުންހުރި މައްސަލަ ހިމެނޭ ކަމަށް ވަނީ ރިޕޯޓް ކޮށްފައެވެ.
