ލޭބަރ ފޯސް ސާރވޭގެ ފީލްޑް ވާރކް މިމަހުގެ 15ން 21ށް ކުރިއަށްދާނެ ކަމަށާއި، އާއްމު ރައްޔިތުންގެ އެއްބާރުލުން ބޭނުންވާ ކަމަށް މޯލްޑިވްސް ބިއުރޯ އޮފް ސްޓެޓިސްޓިކްސްއިން ބުނެފިއެވެ.

ބިއުރޯއިން ނެރުނު ބަޔާނެއްގައި ބުނީ 2024 ގައި ކުރުމަށް ހަމަޖެހިފައިވާ ލޭބަރ ފޯސް ސަރވޭ ގްރޭޓަރ މާލެ ސަރަހައްދުގެ ރެމްޑަމްކޮށް ހޮވާލެވިފައިވާ ގޭބިސީތަކެއްގައި 28 އޮކްޓޫބަރު 2024 އިން ފެށިގެން ކުރިއަށް ގެންދާ ކަމަށެވެ. އަދި ލޭބަރ ފޯސް ސަރވޭގެ ފީލްޑް ވާރކް މިމަހުގެ 15ން 21ށް މާލެ، ވިލިމާލެ އަދި ހުޅުމާލެއިން ރެންޑަމްކޮށް ހޮވާލެވިފައިވާ ގޭބިސީތަކުގައި ކުރިއަށްގެން ގެންދާނެ ކަމަށެވެ.

ލޭބަރ ފޯސް ސަރވޭއަކީ ރާއްޖޭގެ ލޭބަރ މާކެޓާއި ގުޅޭ (ވަޒީފާގެ ބާޒާރާއި ގުޅޭ) މުހިންމު ތަފާސްހިސާބު އެއްކުރުމަށް ކުރެވޭ ވަރަށް މުހިންމު ގައުމީ ސާރވޭއެކެވެ. މިސަރވޭއިން އެއްކުރެވޭ މައުލޫމާތުން މަސައްކަތް ލިބިފައިވާ އާބާދީގެ ނިސްބަތް މަސައްކަތް ލިބިފައިނުވާ އާބާދީގެ ނިސްބަތް ފަދަ ލޭބަރ މާކެޓާއި ގުޅޭ އިންޑިކޭޓަރުތައް އެކުލަވާލެވޭނެއެވެ.

މިސަރވޭއިން މައުލޫމާތު ނެގޭނެ މައިގަނޑު ބައިތަކަކީ، މީހުންގެ އާންމު މައުލޫމާތު، ހިޖުރަކުރުން، ތައުލީމް، ވަޒީފާއާއި އާމްދަނީ ހޯދުމުގެ މަސައްކަތްކުރާ އާބާދީގެ ތަފްސީލް، އާމްދަނީ ލިބޭ މަސައްކަތް ހޯދާ އަދި ލިބިފައިނުވާ އާބާދީގެ ތަފްސީލް، އާމްދަނީ ލިބޭ އަދި އާމްދަނީ ނުލިބޭ ގޮތަށް ކުރާ މަސައްކަތާއި ގޭތެރޭގެ މަސައްކަތުގައި ވަގުތުހޭދަކުރާ މިންވަރު އަދި ހިލޭ ސާބަހަށް ކުރާ މަސައްކަތުގެ ތަފްސީލު ހިމެނެއެވެ.

ބިއުރޯއިން ބުނީ، ލޭބަރ ފޯސް ސަރވޭއަކީ ދިވެހިރާއްޖޭގެ ތަފާސްހިސާބު ގާނޫނުގެ ދަށުން ހުއްދަ ލިބިގެން ކުރާ ސަރވޭއެއް ކަމަށާއި، މިސަރވޭއިން އެއްކުރެވޭ ވަކި ފަރުދެއް ނުވަތަ ގޭބިސީއެއްގެ މައުލޫމާތަކީ ސިއްރެއް ގޮތުގައި ހިފެހެއްޓޭނެ އެއްޗެއް ކަމަށެވެ. އަދި މިގާނޫނުގައި ކަނޑައެޅިފައިވާ ގޮތަށް ހުއްދަ ލިބިގެން ސަރުކާރުގެ ބޭނުމަކަށް މައުލޫމާތު އެއްކުރުމުގެ މަސައްކަތުގައި އުޅޭ މީހަކު އެދިއްޖެނަމަ ކަނޑައެޅިފައިވާ މުއްދަތެއްގެ ތެރޭގައި ތެދު މައުލޫމާތު ދިނުމަކީ އާއްމުންގެ މަސްއޫލިއްޔަތެއް ކަމަށެވެ.

މިއީ ގޭބިސީގެ މެންބަރުންގެ އަގުހުރި ވަގުތާއި އެއްބާރުލުން ބޭނުންވާ ސަރވޭއެއްކަން ފާހަގަކޮށް އެއިދާރާއިން ބުނީ މި މުހިންމު މަސައްކަތުގައި ފުރިހަމައަށް އެއްބާރުލުން ދިނުމަށް ހޭދަވާ ވަގުތަކީ ރާއްޖޭގެ ތަފާސްހިސާބުގެ ނިޒާމު ހަރުދަނާ ކުރުމަށް ވެވޭ ގައުމީ ޚިދުމަތެއް ކަމަށެވެ. އަދި މިސަރވޭއަށް މައުލޫމާތު ހޯދުމަށް ބައްދަލުކުރަން ބޭނުންވާ ގޭބިސީގެ މީހުންނާއި، ފަސޭހައިން ބަދަލުކުރެވޭނެ އިންތިޒާމް ހަމަޖައްސައިދިނުމަށް ބިއުރޯއިން ވަނީ އެދިފައެވެ.