2022 ވަނަ އަހަރުގެ ބޯހިމެނުމުގެ މައުލޫމާތު އަތޮޅު ފެންވަރުގައި ހިއްސާކޮށް، ތަމްރީންތަކެއް ކުރިއަށް ގެންދިއުމަށް 20 ޓްރޭނަރުން ހޯދަނީ
އޮންލައިންކޮށް ޓްރޭނަރުންގެ އެޕްލިކޭޝަން ފޯމު ހުށަހެޅޭނެ
ބޯހިމެނުމުގެ މަސައްކަތުގެ ތެރެއިން
2022 ވަނަ އަހަރުގެ ބޯހިމެނުމުގެ މައުލޫމާތު އަތޮޅު ފެންވަރުގައި ހިއްސާކޮށް ބޯހިމެނުމުގެ މައުލޫމާތު ބޭނުންކުރުމަށް މީހުން ތަމްރީންކޮށްދޭނެ 20 ޓްރޭނަރުން ހޯދުމަށް އިއުލާންކޮށްފިއެވެ.
މޯލްޑިވްސް ބިއުރޯ އޮފް ސްޓެޓިސްޓިކްސްއިން ބުނީ 2022 ވަނަ އަހަރު ކުރިއަށް ގެންދެވުނު ބޯހިމެނުމުގެ މައުލޫމާތު އާއްމުކުރެވިފައިވާ ކަމަށާއި، ބޯހިމެނުމުގެ ނަތީޖާއަށް ބިނާކޮށް އަތޮޅު ޕްރޮފައިލް ތައްޔާރު ކުރަމުންދާ ކަމަށެވެ. މި މައުލޫމާތު އަތޮޅުތަކާއި ހިއްސާކޮށް ރަށު ފެންވަރުގައި ބޯހިމެނުމުގެ މައުލޫމާތު ބޭނުންކުރަން ދަސްކޮށް ދިނުމަށް އަތޮޅުތަކުގައި ތަމްރީން ކުރިއަށް ގެންގޮސް ދޭނެ 20 ޓްރެއިނަރުން ހޯދުމަށް ބޭނުންވާ ކަމަށެވެ.
ބިއުރޯ އޮފް ސްޓެޓިސްޓިކްސްއިން ބުނީ މިމަސައްކަތަށް ކުރިމަތިލައިގެން ހޮވޭ ފަރާތްތަކަށް 3 ދުވަހުގެ ތަމްރީން ޕްރޮގްރާމްއެއް ކުރިއަށް ގެންދިޔުމަށް ހަމަޖެހިފައިވާ ކަމަށާއި، މި ތަމްރީން ފުރިހަމަކުރުމަށްފަހު އަތޮޅުތަކުގައި 2 ދުވަހުގެ ތަމްރީން ޕްރޮގްރާމްއެއް ކުރިއަށް ގެންދިޔުމަށް ހަމަޖެހިފައިވާ ކަމަށެވެ. މި މަސައްކަތުގައި ހަރަކާތްތެރިވާ ފަރާތްތަކަށް ތަމްރީނު ދުވަސްވަރު އަދި މަސައްކަތުގައި ހޭދަވާ ދުވަސްތަކަށް އެލަވަންސް ދިނުމަށްވަނީ ހަމަޖެހިފައިވާ ކަމަށެވެ. މިއެލަވަންސް ދިނުމަށް ހަމަޖެހިފައިވަނީ ތަމްރީނު ފުރިހަމަކޮށް، މަސައްކަތް ފުރިހަމަކޮށް ނިމުމުން ކަމަށް ބިއުރޯ އޮފް ސްޓެޓިސްޓިކްސްއިން ބުނެއެވެ.
އެހެންކަމުން 2022ގެ ސެންސަސް ޑިސެމިނޭޝަންގައި ޓްރޭނަރެއްގެ ގޮތުން ހަރަކާތްތެރިވާން ބޭނުންވާ ފަރާތްތައް 02 ނޮވެމްބަރ 2023ގެ 14:00ގެ ކުރިން ބިއުރޯގެ ވެބްސައިޓްhttps://statisticsmaldives.gov.mv/applicationform/census2022dissemination/form.php އިން އޮންލައިންކޮށް ޓްރޭނަރުންގެ އެޕްލިކޭޝަން ފޯމު ފުރިހަމަކޮށް ހުށަހެޅުމަށް ވަނީ އެދިފައެވެ.
މިމަސައްކަތާއި ގުޅޭ އިތުރު މަޢުލޫމާތު ބޭނުންވާނަމަ ބިއުރޯގެ ވެބްސައިޓް އަދި މި މިބިއުރޯގެ ފޯނު ނަންބަރު 3008400 / 3008408 އަށް ގުޅުމަށް ވެސް އެދިފައިވެއެވެ.
