ރާއްޖޭގެ ޒުވާނުންގެ އާބާދީ އަކީ 45 އިންސައްތަ
ރާއްޖޭގެ ޖުމްލަ އާބާދާއަކީ 579،330
މާލޭގެ މަގުމަތި
ރާއްޖޭގެ އާބާދީގައި ޒުވާނުން ހިއްސާކުރަނީ 45 އިންސައްތަކަމަށް މޯލްޑިވްސް ބިއުރޯ އޮފް ސްޓެޓިސްޓިކްސް އިން ހާމަކޮށްފިއެވެ.
ބައިނަލްއަގްވާމީ ޒުވާނުންގެ ދުވަހާ ގުޅުވައި މޯލްޑިވްސް ބިއުރޯ އޮފް ސްޓެޓިސްޓިކްސް އިން އާންމުކޮށްފައިވާ ތަފާސްހިސާބުތަކަށް ބަލާއިރު ރާއްޖޭގެ ޖުމްލަ އާބާދީއަކީ 579،330 (ފަސް ލައްކަ ހަތްދިހަ ނުވަ ހާސް ތިންސަތޭކަ ތިރީސް) އެވެ. ރާއްޖޭގެ ޒުވާނުންގެ ގޮތުގައި ބަލަނީ އުމުރުން 18 އަހަރާއި 35 އަހަރާ ދެމެދުގެ މީހުންނެވެ.
އެ އުމުރުފުރައިގެ 258،923 (ދެ ލައްކަ ފަންސާސް އަށް ހާސް ނުވަސަތެކަ ތޭވީސް) މީހުން އެބަތިއްބެވެ. އުމުރުން 15 އަހަރާއި 24 އަހަރާ ދެމެދުގެ 97،039 މީހުން އެބަތިއްބެވެ.
މީގެއިތުރުން މޯލްޑިވްސް ބިއުރޯ އޮފް ސްޓެޓިސްޓިކްސް އިން ހާމަކޮށްފައިވާ ގޮތުގައި ރާއްޖޭގައި އުޅޭ ޒުވާނުންގެ އާބާދީގެ 53 އިންސައްތައަކީ ބިދޭސީންނެވެ. ޒުވާނުންގެ އާބާދީގައި ދިވެހިން ހިއްސާކުރަނީ 47 އިންސައްތައެވެ.
މިއަހަރުގެ ޒުވާނުންގެ ދުވަހުގެ ޝިއާރަކީ "ޖީލުތަކުގެ މެދުގައި އެއްބައިވަންތަކަން" މިއެވެ. މިއަހަރުގެ ޒުވާނުންގެ ދުވަސް ކުލަގަދަކޮށް ފާހަގަކުރުމަށް ހަމަޖެހިފައިވަނީ ކުޅުދުއްފުށި ސިޓީގައެވެ.
