ޣައްޒާއަށް ހަމަލާދިނުން ވަގުތީގޮތުން ހުއްޓާލުމަށް ޔަހޫދީން އެއްބަސްވެއްޖެ

ފަލަސްތީނުގެ ޣައްޒާއަށް ހަމަލާދިނުން ވަގުތީގޮތުން ހުއްޓާލުމަށް ޔަހޫދީން އެއްބަސްވެއްޖެއެވެ.

އަލްޖަޒީރާގައި ބުނެފައިވަނީ ހަމާސްގެ ބެލުމުގެ ދަށަށް ގެންދިޔަ ގާތްގަނޑަކަށް 50 މީހުން މިނިވަން ކުރެވޭނެ ގޮތަށް، ވަގުތީގޮތުން ހަމަލާދިނުން ހުއްޓާލުމުގެ އެއްބަސްވުމަކަށް ކެބިނެޓުން އެއްބަސްވެފައިވާ ކަމަށެވެ.

ހަމަލާތައް ވަގުތީ ގޮތުން ހުއްޓާލުމުގެ އެއްބަސްވުމަކަށް އައީ ގަތަރު މެދުވެރިއެއްގެ ރޯލް އަދާކޮށް ހެދި އެއްބަސްވުމެއްގެ މަޝްވަރާތަކަށް ފަހު ބުދަ ދުވަހުގެ ހެނދުނުގެ ވަގުތެއްގައެވެ. ނަމަވެސް އިސްރާއީލުގެ މީޑިއާތަކުން ބުނެފައިވަނީ ބޮޑުވަޒީރު ބެންޖަމިން ނަތަންޔާހޫގެ ސަރުކާރުގެ ވަޒީރުންގެ މެދުގައި ހޫނު ބަހުސްއެއް މި މައްސަލައިގައި ހިނގާފައިވާ ކަމަށެވެ.

ކެބިނެޓްގެ 38 މެންބަރުންގެ ތެރެއިން ހަނގުރާމަ ހުއްޓާލުމާ ދެކޮޅަށް ވޯޓު ދެއްވީ އެންމެ ތިން މެންބަރުން ކަމަށްވާ ގައުމީ ސަލާމަތީ މިނިސްޓަރު އިޓަމާ ބެން ގްވީރާއި އޭނާގެ އެންމެ ކަނާތު ސިޔާސީ ޕާޓީގެ އިތުރު ދެ މެންބަރުންނެވެ.

ޔަހޫދީ ދައުލަތުގެ ބޮޑުވަޒީރުގެ އޮފީހުން ބުނީ މި އެއްބަސްވުމުގެ ދަށުން ހަމާސްއިން ހަތަރު ދުވަހަށް "ހަމަލާ ބަދަލުކުރުން ހުއްޓާލާ" މި މުއްދަތުގެ ތެރޭގައި މަދުވެގެން 50 އަންހެނުންނާއި ކުޑަކުދިން ދޫކޮށްލަން ޖެހޭނެ ކަމަށެވެ. މީގެ އިތުރުން އިތުރު 10 ރަހީނުން ދޫކޮށްލާނަމަ ކޮންމެ 10 ރަހީނަކަށް ހަަމަލާ ދިނުން އިތުރު އެއް ދުވަހަށް މަޑުކޮށްލާނެ ކަމަށް ބުނެފައި ވާއިރު، އޭގެ ބަދަލުގައި ފަލަސްތީނުގެ ގައިދީން ދޫކޮށްލުމުގެ ވާހަކަ ދައްކާފައި ނުވެއެވެ.

ޣައްޒާ ކޮންޓްރޯލްކުރާ ހަމާސް އިން ނެރުނު ބަޔާނެއްގައި ވަނީ އިސްރާއީލުގެ ޖަލުތަކުން ފަލަސްތީނުގެ 150 އަންހެނުންނާއި ކުޑަކުދިން ދޫކޮށްލުމުގެ ބަދަލެއްގެ ގޮތުން ހަމާސްގެ ރަހީނުންގެ ތެރެއިން ބަންދުކޮށްފައިވާ 50 އަންހެނުންނާއި ކުޑަކުދިން މިނިވަންކުރާނެކަން ކަށަވަރުކޮށްދީފައެވެ.

މީގެ އިތުރުން އިސްރާއީލުން ވެސް ޣައްޒާގައި ހިންގާ ހުރިހާ އަސްކަރީ ހަރަކާތްތަކެއް ހުއްޓާލުމަށާއި، އިންސާނީ، ސިއްހީ އަދި ތެލުގެ އެހީ އުފުލާ އެތައް ސަތޭކަ ޓްރަކްތަކެއް އެ ސަރަހައްދަށް ވަނުމުގެ ހުއްދަ ދިނުމަށް ބުނެފައިވެއެވެ.

މިދިޔަ މަހުގެ 7 ވަނަ ދުވަހުން ފެށިގެން ކުރަމުން އަންނަ ހަނގުރާމަައިގައި ފުރަތަމަ ފަހަރަށް ހަމަލާދިނުން ހުއްޓާލުމަށް އެއްބަސްވެފައިވއިރު، މިހާތަނަށް މި ހަނގުރާމައިގައި ޣައްޒާއިން 14100 މީހުން ވަނީ މަރުވެފައެވެ. އަދި 2.3 މިލިއަން މީހުން ދިރިއުޅެމުން އަންނަ ޣައްޒާއިން 1.7 މިލިއަން މީހުން ވަނީ ގެދޮރު ގެއްލިފައެވެ.